REGİONLAR
Ağcabədidə iqtisadiyyatın əsas sahələri üzrə məhsul buraxılışının həcmi 24,9 faiz artıb
Ağcabədi, 14 fevral, Tahir Ağaməmmədov, AZƏRTAC
2018-ci ildə Ağcabədi rayonunda iqtisadiyyatın əsas sahələri üzrə məhsul buraxılışının həcmi 601.016,9 min manat olub. Bu, əvvəlki illə müqayisədə 24,9 faiz çoxdur. Bu dövrdə 37.701,6 min manatlıq sənaye, 185.419,8 min manatlıq kənd təsərrüfatı məhsulları istehsal edilib, əsas kapitala 298.495,6 min manat investisiya yönəldilib. 2017-ci illə müqayisədə sənaye məhsulları istehsalı 28,4 faiz, kənd təsərrüfatı məhsulları istehsalı 11,6 faiz, əsas kapitala yönəldilən investisiyalar 40,8 faiz artıb. İl ərzində 2116-sı daimi olmaqla, 4452 yeni iş yeri açılıb.
AZƏRTAC-ın bölgə müxbiri xəbər verir ki, bu faktlar Ağcabədi rayonunda 2018-ci ilin sosial-iqtisadi inkişafının yekunlarına həsr olunan hesabat yığıncağında səsləndirilib. Yığıncaq iştirakçıları əvvəlcə ümummilli lider Heydər Əliyevin şəhərin mərkəzində ucaldılan abidəsi önünə gül-çiçək düzüb, sonra mədəniyyət mərkəzinin foyesində Ağcabədidə istehsal edilən məhsulların sərgisinə, rayonun sosial-iqtisadi inkişafını əks etdirən stendlərə və videoslayda baxıblar.
İcra hakimiyyətinin başçısı Şahin Məmmədovun məruzəsində bildirilib ki, həyata keçirilən məqsədyönlü tədbirlər nəticəsində rayonun iqtisadiyyatı daha da inkişaf edib, şəhər və kəndlərdə tikinti-quruculuq və abadlıq işləri sürətlənib. Hesabat dövründə Ağcabədi şəhərinin Heydər Əliyev, Üzeyir Hacıbəyli prospektlərində, İsmət Qayıbov və Nəsimi küçələrində yerləşən çoxmənzilli yaşayış binalarında əsaslı təmir işləri aparılıb. Heydər Əliyev və Üzeyir Hacıbəyli prospektlərinin kəsişməsində saat qülləsi tikilib, 7 saylı körpələr evi-uşaq bağçası əsaslı təmir edilib. Qarabağ Atçılıq Kompleksinin tikintisi və Hacıbədəlli-Pərioğullar-Təzəkənd kəndlərarası avtomobil yolunun yenidənqurması işləri başa çatdırılaraq istifadəyə verilib. Ağcabədi şəhərinin içməli su təchizatı və kanalizasiya sisteminin yenidən qurulması layihəsi çərçivəsində 2018-ci ildə 8600 su sayğacı quraşdırılıb, 84,5 kilometr kanalizasiya, 97,8 kilometr su xətti çəkilib. Rayonun Şotlanlı və Biləyən kəndləri təbii qazla təmin olunub. Əhalinin elektrik enerjisi ilə təminatının yaxşılaşdırılması üçün Arazbar, Yuxarı Qiyaməddinli, Aran, Aşağı Avşar, Hüsülü, Kəbirli, Avşar və Xocavənd kəndlərində SİP kabel xətti çəkilib. Salmanbəyli və Qaradolaq kənd tam orta məktəbləri üçün binaların tikintisinə başlanılıb. İl ərzində rayon ərazisində 139 min 625 ədəd müxtəlif növ həmişəyaşıl, meşə agacları və tut tingləri əkilib. Hazırda Heydər Əliyev, Üzeyir Hacıbəyli prospektində, Xəlfərəddin və Nəsimi küçələrində abadlıq və təmir-bərpa işləri, “ASAN xidmət” mərkəzinin, Sukanal idarəsinin inzibati binasının, 2 saylı körpələr evi-uşaq bağçası üçün 100 yerlik binanın, Avtovağzal kompleksinin, Hüsülü bələdiyyəsi ərazisində dənli bitki toxumlarının emalı zavodunun tikintisi davam etdirilir.
Yığıncaqda aqrar sahədə əldə olunan uğurlardan danışılarkən bildirilib ki, 2018-ci təsərrüfat ilində 106 min 959 ton taxıl, 23 min 304 ton pambıq, 28 min 956 ton şəkər çuğunduru, 17 min 440 ton qarğıdalı, 4430 ton soya, 13 min 324 ton bostan məhsulları, 37 ton barama istehsal olunub. Heyvanların cins tərkibinin yaxşılaşdırılması məqsədilə 2018-ci ildə 5054 baş iribuynuzlu heyvan süni yolla mayalandırılıb, 3228 baş cins tərkibi yaxşılaşdırılmış buzov doğulub. 2018-ci ildə Şərq-Qərb İdarəetmə İnstitutu, ABŞ-ın Beynəlxalq İnkişaf Agentliyi və Azərbaycan Hökuməti tərəfindən birgə maliyyələşdirilən, Azərbaycanda Sosial-İqtisadi İnkişaf Fəaliyyəti (SEDA) proqramı çərçivəsində rayonun Təzəkənd və Bala Kəhrizli kəndlərində yem emalı məntəqəsinin tikintisi layihəsi həyata keçirilib.
Yığıncaqda elektrik enerjisi, təbii qaz və içməli su ilə təminat, təhsilin, mədəniyyətin, səhiyyənin inkişafı istiqamətində görülən işlər ətraflı təhlil olunub, qazanılan uğurlardan, mövcud problemlərin aradan qaldırılması yollarından və 2019-cu ildə görüləcək işlərdən bəhs edilib.
Prezident Administrasiyasının məsul işçisi Əflatun Rufiyev yığıncaqda çıxış edərək, Prezident İlham Əliyevin rəhbərliyi ilə Azərbaycanda həyata keçirilən sosial-iqtisadi inkişafdan, əldə olunan uğurlardan, habelə qarşıda duran vəzifələrdən danışıb.
Sonda qərar layihəsi oxunub, yığıncaq iştirakçıları adından Prezident İlham Əliyevə müraciət qəbul edilib.