REGİONLAR


Ağdam, Füzuli və İmişli rayonlarında Qarabağ müharibəsi əlilləri və şəhid ailələrinə fərdi evlər verilib FOTO VİDEO

Füzuli, 25 sentyabr, Tahir Ağaməmmədov, AZƏRTAC

Əmək və Əhalinin Sosial Müdafiəsi Nazirliyi tərəfindən şəhid ailələri və Qarabağ müharibəsi əlilləri üçün Ağdam, Füzuli və İmişli rayonlarında inşa edilən 19 fərdi yaşayış evi sahiblərinə təqdim olunub.

AZƏRTAC-ın bölgə müxbiri xəbər verir ki, Füzuli rayonunun İkinci Mahmudlu kəndində evlərin təqdim edilməsi tədbirində nazirliyin tabeliyindəki Sosial Xidmətlər Agentliyinin İdarə heyətinin sədri Vüqar Behbudov, Füzuli Rayon İcra Hakimiyyəti başçısının müavini Süleyman Əliyev iştirak edib.

Tədbirlərdə Prezident İlham Əliyevin sosial siyasətinin əsasında vətəndaş amilinin dayandığı, həssas əhali qruplarının rifahına yönələn tədbirlərin geniş vüsət aldığı vurğulanıb. Ölkəmizdə Qarabağ müharibəsi veteranlarının, əlillərin və şəhid ailələrinin sosial müdafiəsinin gücləndirilməsi, onların mənzil-məişət şəraitinin yaxşılaşdırılması sahəsində həyata keçirilən tədbirlərdən danışılıb. Bildirilib ki, ötən dövrdə şəhid ailələrinə və ölkəmizin ərazi bütövlüyü, müstəqilliyi və konstitusiya quruluşunun müdafiəsi ilə əlaqədar əlilliyi olan şəxslərə 8205 mənzil və fərdi ev təqdim edilib. Bu istiqamətdə işlər hazırda uğurla davam etdirilir.

Sosial Xidmətlər Agentliyinin İdarə heyətinin sədri Vüqar Behbudov jurnalistlərə müsahibəsində bildirib ki, şəhid ailələrinin və Qarabağ müharibəsi əlillərinin mənzillə təminatı proqramı ildən-ilə genişləndirilir. Şəhid ailələrinə və Qarabağ müharibəsi əlillərinə ötən il 934 mənzil və fərdi ev verilib. Dövlət başçısının tapşırığına əsasən 2020-ci ildə şəhid ailələrinə və müharibə əlillərinə rekord sayda, yəni azı 1500 mənzil və fərdi ev verilməsi nəzərdə tutulur. Bu gün Füzuli, Ağdam və İmişli rayonlarında təqdim edilən fərdi evlər də daxil olmaqla, artıq 617 mənzil və fərdi ev (o cümlədən 554 mənzil, 63 fərdi ev) verilib. Qalan evlər də ilin sonunadək veriləcək.

Vüqar Behbudov qeyd edib ki, müharibə veteranlarının avtomobillərlə təmin olunması sahəsində də tədbirlər davam etdirilir. Cari ildə 400 nəfər müharibə əlilinə avtomobil verilməsi nəzərdə tutulub. Artıq 150 nəfər avtomobillə təmin olunub. Qalan 250 avtomobil də tezliklə müharibə əlillərinə təqdim ediləcək.

Yeni fərdi yaşayış evi ilə təmin olunan şəhid ailələrinin üzvləri və Qarabağ müharibəsi əlilləri onların rifahına göstərilən yüksək qayğıya görə Prezident İlham Əliyevə minnətdarlıqlarını bildiriblər.

Fərdi evlə təmin olunan müharibə əlili Şahbuz Abbasov deyib: "Ailəmiz 5 nəfərdən ibarətdir. İnanırdım ki, digər müharibə əlilləri kimi bizim ailəmiz də evlə təmin olunacaq. Bu gün bu istəyimiz gerçəkləşdi. Ailəmiz üçün tam təmirli ev verildi. Çox sevinirik. Müharibə əlillərinə, şəhid ailələrinə daim diqqətlə yanaşan Prezidentimizə minnətdaram".

Alxanlı kənd sakini Zakir Şəmiyev də neçə vaxt idi ki, ev növbəsində olduğunu bildirib. “Bu gün mənim ailəmə də ikiotaqlı ev verildi. Çox razıyıq. Prezidentimizə minnətdaram. Ehtiyac olarsa, yenə də Vətənimiz uğrunda döyüşlərə getməyə hazıram", - deyə o əlavə edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.