REGİONLAR
Ağdamda Azərbaycan Uşaqlarının V Ümumrespublika Forumunun iştirakçılarının seçimi aparılıb VİDEO
Ağdam, 25 avqust, Tahir Ağaməmmədov, AZƏRTAC
Bu il noyabr ayında Azərbaycan Uşaqlarının V Ümumrespublika Forumu keçiriləcək. Bununla əlaqədar Ailə, Qadın və Uşaq Problemləri üzrə Dövlət Komitəsi tərəfindən ölkəmizin şəhər və rayonlarından forumda iştirak edəcək uşaqların seçilməsi məqsədilə görüşlərə başlanılıb.
AZƏRTAC-ın bölgə müxbiri xəbər verir ki, Ağdam rayon Heydər Əliyev Mərkəzində keçirilən görüşdə rayon tərəfindən təqdim edilən 21 uşaq müsahibəyə cəlb edilib. Ailə, Qadın və Uşaq Problemləri üzrə Dövlət Komitəsinin Ağdam Uşaq və Ailələrə Dəstək Mərkəzi tərəfindən fəallığı və intellektual səviyyəsi ilə fərqlənən, fikirlərini sərbəst şəkildə ifadə etməyi bacaran, sosial fəallığı ilə fərqlənən iki uşaq seçilib. Müsahibədə Regional İnkişaf İctimai Birliyinin nümayəndələri də iştirak edib.
Ailə, Qadın və Uşaq Problemləri üzrə Dövlət Komitəsinin Ağdam Uşaq və Ailələrə Dəstək Mərkəzinin direktoru Yaqut Qəhrəmanova AZƏRTAC-ın bölgə müxbirinə bildirib ki, Forumun keçirilməsində məqsəd uşaqların öz hüquqlarına dair qərarların qəbul olunmasında iştirakını təmin etmək, onlara problemlərinin həlli ilə bağlı təşəbbüslər irəli sürmək və təkliflər vermək imkanı yaratmaq, həmçinin ictimaiyyətin diqqətini uşaq hüquqlarının qorunmasına yönəltməkdir. Forum öz fəaliyyətində Azərbaycan Respublikası Konstitusiyasını, Uşaq Hüquqları haqqında BMT Konvensiyasını, Uşaq hüquqları haqqında Azərbaycan Respublikasının Qanununu, uşaq hüquqlarının müdafiəsinə dair beynəlxalq hüquq və milli qanunvericiliyi əsas götürür. Forumda şəhid, qazi və döyüşçü ailələrindən olan, milli azlıqları, sağlamlıq imkanları məhdud və valideyn himayəsindən məhrum olan uşaqları təmsil edən nümayəndələrin də iştirakı nəzərdə tutulub. Ağdam Uşaq və Ailələrə Dəstək Mərkəzi tərəfindən avqust ayı ərzində Ağdamla yanaşı, Ağcabədi, Bərdə və Tərtər rayonları üzrə də forumda iştirak edəcək uşaqların seçilməsi həyata keçiriləcək.