REGİONLAR
Ağdamda "Qələmini silaha dəyişən Mədət" kitabının təqdimatı olub
Ağdam, 29 may, Tahir Ağaməmmədov, AZƏRTAC
Ağdam rayonunun Quzanlı qəsəbəsində 44 günlük Vətən müharibəsində şəhidlik zirvəsinə ucalmış Mədət Qənbərova həsr edilmiş "Qələmini silaha dəyişən Mədət" kitabının təqdimatı olub. Kitabın müəllifi rayon ziyalısı Tahirə İmanovadır. Tədbirdə şəhidin doğmaları, rayon icra hakimiyyətinin, ictimaiyyətin nümayəndələri, ziyalılar iştirak ediblər.
AZƏRTAC-ın bölgə müxbiri xəbər verir ki, tədbir iştirakçıları əvvəlcə ümummilli lider Heydər Əliyevin abidəsini ziyarət edib. Sonra Quzanlı qəsəbəsindəki Şəhidlər xiyabanı ziyarət olunub, respublikamızın ərazi bütövlüyü uğrunda canından keçən Vətən övladlarının məzarları üzərinə tər gül dəstələri qoyulub, şəhidlərin ruhuna dualar oxunub.
Heydər Əliyev Mərkəzində keçirilən tədbirdə çıxış edənlər ötən il sentyabrın 27-də başlanan və tarixə "44 günlük müharibə" kimi düşən Vətən müharibəsindən, Azərbaycan ordusunun qəhrəmanlığından, şəhid Mədət Qənbərovun şərəfli ömür və döyüş yolundan danışıblar. Bildirilib ki, otuz ilə yaxın işğal altında qalan torpaqlarımız müzəffər ordumuzun, əsgər və zabitlərimizin şücaəti, qəhrəmanlığı sayəsində azad edildi. Bu müqəddəs yolda zabit və əsgərlərimizin bir qismi şəhid, bir qismi isə qazi oldu. Vətən müharibəsində şəhidlik zirvəsinə ucalanlardan biri də Ağdam rayon sakini Qənbərov Mədət Əzim oğludur.
Məlumat verilib ki, Mədət Qənbərovun ailəsi Ağdam rayonunun Mollalar kəndindən məcburi köçkün düşüb. Mədət ata-baba yurdu Mollalarda doğulmasa da, hər zaman doğma torpaqların həsrəti ilə yaşayıb. Gəncə Dövlət Universitetinin Filologiya fakültəsinin məzunu olan Mədət Qənbərov 2020-ci ilin iyulunda Ermənistan silahlı qüvvələrinin Azərbaycan-Ermənistan dövlət sərhədinin Tovuz rayonu istiqamətində təxribatı zamanı könüllü olaraq cəbhə bölgəsinə getmək üçün Səfərbərlik və Hərbi Xidmətə Çağırış üzrə Dövlət Xidmətinin rayon bölməsinə müraciət edib. 2020-ci il sentyabrın 27-də cəbhədə düşmənin növbəti təxribatlarına qarşı ordumuzun keçirdiyi əks-hücum əməliyyatları zamanı torpaqlarımızın azadlığı uğrunda döyüşlərə qatılıb. Suqovuşan-Talış istiqamətində gedən döyüşlərdə şəhidlik zirvəsinə ucalıb. Azərbaycan Respublikası Prezidentinin Sərəncamı ilə əsgər Mədət Qənbərov ölümündən sonra “Vətən uğrunda” medalı ilə təltif edilib.
Çıxışlarda doğma Vətəni, torpağı uğrunda öz canını əsirgəməyən oğullarımızın şərəfli ömür yolunun gənc nəslin vətənpərvərlik, insanpərvərlik, torpağa bağlılıq ruhunda tərbiyə olunmasında əsl örnək və nümunə olacağı bildirilib.
Şəhidin anası Bəsti Vəliyeva ailəsi adından kitabın müəllifinə, tədbirin təşkilatçılarına və iştirakçılara minnətdarlıq edib, Vətən uğrunda canlarından keçən qəhrəman övladlarımızın qanının yerdə qalmadığını, düşməndən qisas alındığını, torpaqlarımızın işğaldan azad olunduğunu bildirib.
Mərasimin sonunda iştirakçılara "Qələmini silaha dəyişən Mədət" kitabı hədiyyə edilib. Həmin gün İmamqulubəyli qəsəbəsində şəhid Mədət Qənbərovun xatirəsinə inşa edilmiş bulağın açılışı olub.