Ağdam, 4 sentyabr, AZƏRTAC

Ağdam rayonu Qaradağlı kəndindən olan Vətən müharibəsi şəhidi İsizadə Elvin Azim oğlunun doğum günü qeyd edilib. Yaşasaydı Elvinin 20 yaşı olacaqdı...

AZƏRTAC-ın bölgə müxbiri xəbər verir ki, şəhid Elvin İsizadənin doğum günü ilə əlaqədar rayon icra hakimiyyətinin nümayəndələri, şəhidin ailə üzvləri, yaxınları, dostları, Qarabağ müharibəsi veteranları, qazilər Quzanlı qəsəbəsindəki Şəhidlər xiyabanına gələrək onun məzarı üzərinə gül-çiçək dəstələri düzüb, ruhuna dualar oxuyublar.

Qaradağlı kəndində şəhidin xatirəsinə inşa edilmiş bulağın önündə davam edən tədbirdə, əvvəlcə Azərbaycanın Dövlət Himni səsləndirilib, respublikamızın ərazi bütövlüyü uğrunda canından keçən Vətən övladlarının xatirəsi bir dəqiqəlik sükutla yad edilib. Mərasimdə çıxış edənlər Azərbaycan Ordusunun 44 günlük müharibədə şücaətindən, Elvin İsizadənin qısa, lakin mənalı həyat və döyüş yolundan danışıblar. Bildirilib ki, şəhid İsizadə Elvin Azim oğlu musiqiçi idi. Asəf Zeynallı adına musiqi kollecində təhsil alan Elvin sevimli tarını silaha dəyişərək haqq savaşına qoşulub. Vətən müharibəsində Füzuli, Xocavənd, Cəbrayıl, Qubadlı istiqamətində gedən döyüşlərdə iştirak edib. Sərras atıcı kimi düşmənə sarsıdıcı zərbələr endirib. Arzusu cəbhədən qayıtdıqdan sonra Konservatoriyada oxumaq, tar ifaçılığı üzrə tanınmış şəxs olmaq idi. Bütün arzularını, həmçinin canını Vətənə qurban verən gənc musiqiçi oktyabrın 26-da Füzuli istiqamətində gedən döyüşlərdə şəhid olub. Şəhid Elvin İsizadə Vətən müharibəsində göstərdiyi şücaətə görə ölümündən sonra “Vətən uğrunda” və “Xocavəndin azad olunmasına görə” medalları ilə təltif edilib.

Çıxışlarda vurğulanıb ki, 44 günlük Vətən müharibəsində Azərbaycan gəncliyi vətənpərvərliyini, əzmini bütün dünyaya nümayiş etdirdi. Torpaqlarımızın azadlığı uğrunda şəhid olan Elvin və onun kimi Vətən oğullarının xatirəsi hər bir azərbaycanlının qəlbində əbədi yaşayacaq.

Tədbirdə məktəblilər Vətənə, şəhidlərə həsr olunmuş şeirlər söyləyiblər.