CƏMİYYƏT


Ağdaş rayonunda icbari tibbi sığortanın tətbiqi ilə bağlı tədbir keçirilib

Bakı, 14 mart, AZƏRTAC 

İcbari Tibbi Sığorta üzrə Dövlət Agentliyi Ağdaş rayonunda icbari tibbi sığortanın tətbiqi ilə əlaqədar Heydər Əliyev Mərkəzində və Habil Əliyev adına musiqi məktəbində rayon sakinləri ilə görüş keçirib.

Bu barədə AZƏRTAC-a Dövlət Agentliyinin ictimaiyyətlə əlaqələr sektorundan bildirilib.

Tədbiri giriş sözü ilə açan Ağdaş Rayon İcra Hakimiyyətinin başçısının müavini Aynur Novruzova qeyd edib ki, tibbi xidmətlərin Ağdaş rayon sakinlərinin hər biri üçün əlçatan olması və icbari tibbi sığortanın tətbiqi ilə bağlı çevikliyin artırılması üçün zəruri olan bütün mexanizmlər dövlət başçısının müvafiq Fərmanında öz əksini tapıb.

Ağdaş rayonunda keçirilən tədbirlərdə Agentliyin əməkdaşları Sadiq Mədətov və Tural Qulu icbari tibbi sığortanın əhəmiyyəti və üstünlükləri haqqında təqdimatla çıxış ediblər. Çıxışçılar icbari tibbi sığortanın tətbiqi sahəsində görülən işlər haqqında məlumat verib, Azərbaycanda universal və dayanıqlı tibbi sığorta modelinin tətbiqini Agentliyin əsas prioriteti olduğunu vurğulayıblar.

Bununla yanaşı, tədbir iştirakçılarına baza zərfi çərçivəsində təminat verilən 1829 adda tibbi xidmətlər haqqında ətraflı məlumat verilib. Bildirilib ki, pilot layihə çərçivəsində təminat verilən tibbi xidmətlərdən 480-ni ambulator, 677-si stasionar, 6-sı təcili və təxirəsalınmaz, 18-i ilkin səhiyyə, 23-ü isə fizioterapevtik tibbi xidmətlərə aiddir. Həmçinin 459 laborator müayinəyə və 166 həyati vacib, dəyəri yüksək xidmətlərə təminat verilir.

Tədbirlərin sonunda agentliyin əməkdaşları əhalini maraqlandıran sualları cavablandırıblar.

Əhalinin məlumatlandırılması məqsədi ilə keçirilən tədbirlərdə bukletlər paylanılıb, posterlər vurulub.

Qeyd edək ki, İcbari Tibbi Sığorta üzrə Dövlət Agentliyi Ağdaş Rayon İcra Hakimiyyəti ilə birlikdə mart və aprel ayları ərzində əhali ilə silsilə maarifləndirici görüşlərin keçirilməsini nəzərdə tutub.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.