Bakı, 8 iyul, AZƏRTAC

Azərbaycan Ağsaqqallar Şurasının çoxsaylı üzvləri Sizin rəhbərliyiniz altında Vətənimizin inkişafı naminə aparılan işlərdə yaxından iştirak edirlər və bundan sonra da edəcək, zəngin həyat təcrübəsindən faydalanaraq əhalinin bütün təbəqələrinin Zati-alinizin ətrafınızda daha sıx birləşməsi, gənclərin milli-mənəvi dəyərlərə hörmət və vətənpərvərlik ruhunda tərbiyə olunması sahəsində üzərilərinə düşən vəzifələri layiqincə yerinə yetirəcəklər.

AZƏRTAC xəbər verir ki, bu fikirlər Azərbaycan Ağsaqqallar Şurasının iyulun 6-da keçirilən iclasında qəbul edilən Azərbaycan Respublikasının Prezidenti İlham Əliyevə müraciətində yer alıb.

Müraciətdə, həmçinin deyilir: “2020-ci il sentyabrın 29-da keçirilən növbədənkənar qurultayda yenidən formalaşdırılan Azərbaycan Ağsaqqallar Şurası oktyabr ayından başlayaraq fəaliyyətini ölkəmizdə davam edən pandemiya ilə mübarizə və işğalçı Ermənistanla müharibə şəraitinə uyğun qurmağa çalışıb. Əhali arasında vətənpərvərlik ruhunun yüksəldilməsi, bütün imkanların ərazi bütövlüyümüzün bərpası üçün səfərbər olunması istiqamətində geniş təbliğat işləri aparılıb. Həm Silahlı Qüvvələrimizə, həm də 44 günlük Vətən müharibəsində şəhid olanların ailələrinə və qazilərimizə maddi və mənəvi qayğı göstərilməsi daim diqqət mərkəzində olub.

Şuranın yerli təşkilatlarının fəaliyyətini müasir tələblər səviyyəsində qurmaq üçün təşkilati işlərə başlanılıb, cari-ilin yanvar-iyun aylarında Şuranın bütün rayon və şəhər təşkilatlarının konfransları keçirilərək yeni əsasnamələri qəbul olunub.

Azərbaycan Ağsaqqallar Şurası üzvlərinin və məsul işçilərinin mövcud pandemiya şəraitində Operativ Qərargah tərəfindən qoyulmuş məhdudiyyətlərə əməl etməklə müvafiq rayon və şəhər İcra hakimiyyətləri ilə sıx əməkdaşlıq şəraitində keçirilməsini təşkil etdikləri bu konfranslarda çıxış edənlər xalqımızın milli-mənəvi dəyərlərinin, tarixi ənənələrinin qorunması, təmsil etdikləri ərazidə sosial-iqtisadi və humanitar inkişafa dəstək verilməsi istiqamətində ağsaqqalların qarşısında duran vəzifələrə diqqət yetiriblər. Bununla yanaşı, hər bir bölgənin konfrans iştirakçıları ölkəmizdə dayanıqlı ictimai-siyasi sabitliyin təmin edilməsində, əhalinin sosial-rifah halının yaxşılaşdırılmasında, həyata keçirilən islahatlar nəticəsində iqtisadiyyatın dinamik inkişafına nail olunmasında Sizin misilsiz əməyinizi, müdrik və cəsarətli siyasətinizi yüksək qiymətləndiriblər. Xüsusən 44 günlük Vətən müharibəsində Ali Baş Komandanı olduğunuz müzəffər Silahlı Qüvvələrimiz tərəfindən Ermənistan ordusunun darmadağın edilməsini, 30 ilə yaxın işğal altındakı torpaqlarımızın işğaldan azad olunmasını təmin etdiyinizə görə Sizə sonsuz minnətdarlıqlarını bildiriblər.

Rayon və şəhərlərdə keçirilən konfransların yekunlarını müzakirə edən Şura iclasının iştirakçıları Vətən müharibəsində qazanılan parlaq Qələbədə, erməni ordusunun darmadağın edilib təslimçilik aktına imza atdırmaqla bu ordunun “məğlubedilməzliyi” barədə uydurmaların puça çıxarılmasında Sizin son 17 ildə bəyan etdiyiniz “güclü dövlət–güclü ordu” strategiyanızın uğurla həyata keçirilməsi ilə yanaşı, sarsılmaz iradənizin, müdrik sərkərdəlik qabiliyyətinizin, daima düşmənin başına enməyə hazır olan “dəmir yumruğ”unuzun danılmaz rolunu qeyd ediblər. Biz ərazi bütövlüyümüzü təmin edərək işğal altındakı torpaqlara görə xalqımızın keçirdiyi utanc hisslərini aradan qaldırdığınıza, xüsusən ağsaqqal atanızın-xalqımızın ümummilli lideri Heydər Əliyevin vəsiyyətinə əməl edərək qürur mənbəyimiz olan Şuşa şəhərini erməni vandallarının tapdağından azad etdiyinizə görə ölkə ağsaqqallarının dərin təşəkkürlərini Sizə çatdırırıq. Böyük qürur hissi ilə qeyd edirik ki, ölkəmizin mədəni-ictimai həyatında mühüm rol oynayan, öz sıralarında respublikamızın müdrik ağsaqqallarını, dəyərli ziyalılarını, ictimai-siyasi xadimlərini birləşdirən Azərbaycan Ağsaqqallar Şurası hər zaman olduğu kimi, 44 günlük Vətən müharibəsi dövründə də Sizin uğurlu daxili və xarici siyasətinizi təbliğ edib, əhaliyə və ordumuza mənəvi dəstək olub”.