REGİONLAR


Əhalinin kütləvi tibbi müayinəsi xalqın sağlamlığına göstərilən qayğının təzahürüdür

Ağdam, 16 may, Tahir Ağaməmmədov, AZƏRTAC

Vətəndaşların sağlamlığının qorunması, göstərilən tibbi xidmətlərinin səviyyəsinin və keyfiyyətinin yüksəldilməsi ölkəmizdə həyata keçirilən sosial siyasətin prioritet istiqamətlərindəndir. Dövlətimizin əhalinin sağlamlığına göstərdiyi diqqətin göstəricisidir ki, ölkəmizdə səhiyyənin maddi-texniki bazasının möhkəmləndirilməsi istiqamətində kompleks tədbirlər həyata keçirilir, şəhərlərdə, rayon mərkəzlərində, qəsəbə və kəndlərdə müasir tibbi avadanlıqlarla təchiz olunmuş yeni xəstəxanalar, tibb məntəqələri tikilərək istifadəyə verilir, səhiyyə xidmətinin yaxşılaşdırılması üçün ardıcıl, təxirəsalınmaz tədbirlər görülür. Bu baxımdan Prezident İlham Əliyevin tapşırığına əsasən, 2014-cü ildən başlayaraq ölkə vətəndaşlarının tibbi müayinəyə cəlb edilməsini xüsusi qeyd etmək lazımdır. Dövlətimizin başçısının ölkə vətəndaşlarının pulsuz tibbi müayinədən keçirilməsi ilə bağlı verdiyi tapşırığın uğurla reallaşdırılması vətəndaşların sağlamlığına göstərilən qayğının təzahürüdür. Tibbi müayinələrin keçirilməsi xəstəliklərin erkən aşkar olunması və vaxtında müalicəsinə, beləliklə də, əhalinin sağlamlığının, xalqımızın genefondunun qorunmasına xidmət edir.

Müayinələr respublikamızın hər yerində olduğu kimi, Qarabağ bölgəsində də uğurla həyata keçirilir. Əhalinin sağlamlığının qorunmasına yönələn bu tədbirin yüksək mütəşəkkilliklə keçirilməsini təmin etmək üçün rayonlarda xüsusi komissiyalar yaradılır, tibb ocaqlarında iş qrafiki tərtib edilir. Sakinlər rayon mərkəzi xəstəxanalarında, poliklinikalarda, müalicə diaqnostika mərkəzlərində, həmçinin iri kənd və qəsəbələrdəki səhiyyə ocaqlarında müayinə olunurlar. Yüksəkixtisaslı həkimlərdən ibarət briqadalar yerlərdə əhalinin müayinəsini həyata keçirirlər.

Əvvəlki illərdə olduğu kimi bu il də fevral ayından başlayaraq üç ay davam edən əhalinin kütləvi dispanserizasiyası uğurla başa çatıb. Cəbhə bölgəsində yerləşən Ağdam rayonunda tibbi aksiyadan 40 min 433 nəfər yararlanıb. Rayon mərkəzi xəstəxanasında və kəndlərdəki sahə xəstəxanalarında aparılan müayinələr zamanı xəstəlik aşkar edilən vətəndaşlardan 385 nəfər ambulator, 156 nəfər stasionar müalicəyə cəlb edilib. 163 nəfər ixtisaslaşmış tibb müəssisəsinə göndərilib, 45 nəfərin üzərində cərrahiyə əməliyyatı aparılıb.

Ağcabədidə tibbi müayinələrin keçirildiyi rayon mərkəzi xəstəxanası ən müasir tibbi avadanlıq və aparatlarla təchiz edilib. Müayinələrə rayon üzrə ümumilikdə 93 min 556 nəfər cəlb edilib. Müayinələri əsasən, terapevt, oftalmoloq, nevropatoloq, stomatoloq, kardioloq və digər tibb mütəxəssisləri aparıblar. Vətəndaşlar ehtiyac olduqda kardioqram, ultrasəs, rentgen, laborator müayinələrdən də keçirilib. Aşkara çıxarılan xəstəliklər üzrə müalicə kursları təyin edilib. Yüksəkixtisaslı mütəxəssislərdən ibarət həkim briqadası tərəfindən rayonun qəsəbə və kəndlərində də əhalinin tibbi müayinəsi həyata keçirilib.

Bərdədə 110 yaşayış məntəqəsinin sakinləri, 172 idarə, müəssisə, təşkilat kollektivi olmaqla, 135 min 309 nəfər tibbi aksiyadan yararlanıb. Rayon mərkəzi xəstəxanasında, Müalicə Diaqnostika Mərkəzində, şəhər poliklinikasında və kəndlərdəki tibb məntəqələrində təşkil edilən tibbi müayinələr zamanı 513 nəfər ambulator, 180 nəfər stasionar müalicəyə cəlb edilib, 139 nəfər Bakı şəhərinə göndərilib.

Ölkəmizin hər yerində olduğu kimi, cəbhə xəttində yerləşən Tərtər rayonunun sakinləri də kütləvi dispanserizasiyaya cəlb edilib. Fevralın 12-də başlanan və üç ay davam edən aksiya çərçivəsində rayonda yaşayan 58 min 365 nəfər sakin müayinədən keçib, onlardan 4316 nəfəri ambulator, 76 nəfəri stasionar müalicəyə cəlb edilib.

Füzuli rayonunun işğaldan azad olunmuş ərazilərində yaşayan 54 min 115 nəfər sakin müayinədən keçərək öz sağlamlıqları barədə məlumat əldə edib. Rayon mərkəzi xəstəxanasında, Horadiz şəhər, Əhmədbəyli kənd, Qayıdış qəsəbə xəstəxanalarında və Füzuli Tibb Mərkəzində təşkil edilən tibbi aksiya zamanı müayinə olunan vətəndaşlardan 8756 nəfəri ambulator, 121 nəfəri stasionar müalicəyə cəlb edilib, 53 nəfər ixtisaslaşmış tibb müəssisələrinə göndərilib, 61 nəfərin üzərində cərrahiyə əməliyyatı aparılıb.

Azərbaycan Prezidenti İlham Əliyevin tapşırığına əsasən respublikamızın hər yerində olduğu kimi, Beyləqan rayonu ərazisində xocavəndli məcburi köçkünlər üçün salınmış Xocavənd qəsəbəsində də əhalinin tibbi müayinəsi uğurla başa çatıb. Beyləqan rayonu ərazisindəki Xocavənd, Yeni Xocavənd, Yeni Tuğ, Yeni Qaradağlı və 320 ailəlik qəsəbələrdə məskunlaşan xocavəndli məcburi köçkünlərin tibbi müayinəsi rayon mərkəzi xəstəxanasında aparılıb. Bundan başqa səyyar həkim briqadaları Ağcabədi rayonu ərazisindəki 556 ailəlik qəsəbədə və Beyləqan rayonu ərazisində məskunlaşmış xocavəndli məcburi köçkünlərin müayinəsini həyata keçiriblər. Tibbi müayinələrdən 6923 nəfər xocavəndli məcburi köçkün yararlanıb.

Ağcabədi rayonu ərazisində məskunlaşmış laçınlı məcburi köçkünlərin tibbi dispanserizasiyası da uğurla həyata keçirilib. Əhalinin sağlamlığının qorunmasına yönələn bu mühüm aksiyanı müvəffəqiyyətlə yerinə yetirmək üçün xüsusi komissiya yaradılıb, rayon sakinlərinin tibbi müayinə barədə məlumatlandırılması məqsədilə geniş təbliğat işləri aparılıb. Aksiya zamanı terapevt, cərrah, nevropatoloq, stomatoloq, dermatoloq və digər ixtisaslı həkimlər tərəfindən ümumilikdə 54 min 974 nəfər müayinə olunub ki, onlardan da 1291 nəfər müalicəyə cəlb edilib, 184 nəfər ixtisaslaşmış tibb müəssisəsinə göndərilib.

Dövlətimizin başçısının Azərbaycanın hər vətəndaşının sağlamlığına diqqəti və qayğıkeş münasibəti ölkə vətəndaşları tərəfindən minnətdarlıqla qarşılanır. Sakinlər vətəndaşların sağlamlıqlarının etibarlı şəkildə qorunması məqsədilə keçirilən aksiyanı yüksək qiymətləndirir, Prezident İlham Əliyevin bu humanist təşəbbüsünə razılıqlarını bildirirlər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.