Naxçıvan, 30 iyun, AZƏRTAC

Türkiyə Respublikasının İqtisadiyyat Nazirliyinin idxal üzrə baş direktoru Ahmet Erkan Çetinkayış Naxçıvana gəlib.

AZƏRTAC xəbər verir ki, qonaq əvvəlcə müstəqil Azərbaycan dövlətinin qurucusu və memarı, görkəmli dövlət xadimi Heydər Əliyevin Naxçıvan şəhərinin baş meydanında əzəmətlə ucalan abidəsi önünə gül qoyub, Ulu Öndərin xatirəsini dərin ehtiramla yad edib.

Ahmet Erkan Çetinkayış Heydər Əliyev Muzeyini ziyarət edərək, ümummilli lider Heydər Əliyevin həyatını və çoxşaxəli dövlətçilik fəaliyyətini əks etdirən eksponatlara baxıb. Məlumat verilib ki, bu gün muzeyin fondunda ulu öndər Heydər Əliyevin həyat və fəaliyyətini əks etdirən 4 min 500-dən çox eksponat toplanıb. Muzey Naxçıvan Muxtar Respublikası Ali Məclisi Sədrinin 1999-cu il fevralın 18-də imzaladığı Sərəncam əsasında yaradılıb və 1999-cu il mayın 10-da fəaliyyətə başlayıb. Muzeydə ümummilli lider Heydər Əliyevin uşaqlıq və gənclik illərinə həsr olunmuş stendlər, onun Naxçıvan Muxtar Respublikası Ali Məclisinin Sədri işlədiyi dövrə aid (1991-1993) şəxsi sənəd və materiallar, imzaladığı sərəncamlar, qərarlar, Türkiyə Respublikası və İran İslam Respublikası ilə əməkdaşlıq sahəsində imzaladığı müqavilələrin surətləri, həmin illərdə Azərbaycan Respublikasının müxtəlif bölgələrində yaşayan vətəndaşların müraciətləri toplanıb. Muzeyin kitabxanasında ulu öndər Heydər Əliyevin həyat və fəaliyyətini əks etdirən jurnal, albom və kitablar saxlanılır.

Sonra Türkiyə Respublikasının İqtisadiyyat Nazirliyinin idxal üzrə baş direktoru Naxçıvan Biznes Mərkəzində olub. Burada müxtəlif müəssisələrə aid pavilyonlarla tanış olan türkiyəli qonağa muxtar respublikanın ixrac potensialı haqda ətraflı məlumat verilib. Bildirilib ki, iqtisadiyyatın şaxələndirilməsi və rəqabətqabiliyyətli müəssisələrin yaradılması istiqamətində aparılan işlər regionun ixrac imkanlarını da artıraraq dünya bazarına çıxa bilən məhsul istehsalına təkan verib. Naxçıvan Muxtar Respublikasının ixrac potensialının artmasında müasir texnologiyaya əsaslanan müəssisələrdə, əsasən, yerli xammaldan istifadə olunması ilə yüksəkkeyfiyyətli məhsul istehsalı mühüm rol oynayır. Naxçıvanlı sahibkarların xarici bazarlara çıxışının təmin edilməsində muxtar respublikada fəaliyyət göstərən şirkətlərə ixrac təşviqlərinin verilməsi, onlara dəstək göstərilməsinin də mühüm rolu olub. Muxtar respublika iqtisadiyyatı ölkəmizin iqtisadi təhlükəsizliyinin təmin olunmasında mühüm paya malikdir və Azərbaycanın iqtisadi rayonları arasında öncül sıradadır.

Sonra mərkəzdə ixracat əlaqələrinin inkişafı istiqamətində fikir mübadiləsi aparılıb.

Naxçıvan şəhərində yerləşən əl işlərinin və sənət əsərlərinin satışı mağazasını, “Naxçıvanqala” Tarix-Memarlıq Muzey Kompleksini və Nuh Peyğəmbərin məzarüstü türbəsini ziyarət edən qonağa həmin məkanlar haqqında ətraflı məlumat verilib. Daha sonra türkiyəli qonaq “Əshabi-Kəhf Ziyarətgahı” Dini-Mədəni Abidə Kompleksində, Duzdağ Fizioterapiya Mərkəzində olub.

Ahmet Erkan Çetinkayış AZƏRTAC-a müsahibəsində bildirib ki, ilk dəfədir Naxçıvana gəlir və bu qədim diyarla tanış olduğu üçün çox məmnundur: “Naxçıvan Biznes Mərkəzində olarkən bir daha şahidi oldum ki, muxtar respublikanın istehsal və ixrac potensialı çox yüksəkdir. Naxçıvana gəlişimin əsas məqsədi buradan Türkiyəyə ixracın həcminin artırılması yollarını müzakirə etmək, bu sahədə mövcud vəziyyəti öyrənmək və görüləcək işləri müəyyənləşdirməkdir”.

Qonaq qeyd edib ki, Naxçıvanda istehsal olunan məhsulların Türkiyədə daha geniş alıcı kütləsi tapması üçün işlər mərhələli şəkildə aparılacaq. O, əminliyini bildirdi ki, göstərilən səylər öz nəticəsini verəcək və muxtar respublikada istehsal olunan, ən müasir tələblərə cavab verən məhsullar Türkiyə bazarında layiqli yerini tuta biləcək.