Naxçıvan, 1 iyul, AZƏRTAC

Ailələrə hərtərəfli qayğı göstərmək, gənc ailələrin milli-mənəvi dəyərlər üzərində inkişaf etməsini diqqətdə saxlamaq və onların sosial vəziyyətlərinin yaxşılaşdırılmasını təmin etmək dövlətimizin prioritet sahələrindən biridir. Çünki ailə mənsub olduğu xalq, millət haqqında ilkin təsəvvürlər yaradır, həm də milli-mənəvi dəyərlərin təcəssümü, daşıyıcısı rolunda çıxış edir.

AZƏRTAC-ın Naxçıvan bürosu xəbər verir ki, bu fikirlər Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin, Naxçıvan Muxtar Respublikası Ədliyyə Nazirliyi və Naxçıvan Dövlət Universiteti ilə birgə keçirdiyi “Gənc ailələrin sağlam olması gələcək nəsillərin sağlam olması deməkdir” mövzusunda tədbirdə səslənib.

NDU-da keçirilən tədbirdə çıxış edən ali təhsil ocağının Tədris və tərbiyə işləri üzrə prorektoru Rafiq Rəhimov tədbirin əhəmiyyəti barədə danışıb. “Ailə dəyərlərimiz milli dəyərlərimizin əsasıdır” mövzusunda çıxış edən Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi Aparatının rəhbəri Eltun Həziyev muxtar respublikada gənc ailələrə göstərilən dövlət qayğısından ətraflı bəhs edib. Bildirib ki, ailə uşaqlara təhsilin, tərbiyənin öyrədildiyi, milli dəyərlərin köçürüldüyü əhəmiyyətli bir müəssisə, şəxsiyyətin və xarakterin formalaşdığı başlanğıc mühit, nüvə təşkilatıdır. Ölkəmiz müstəqilliyini əldə etdikdən sonra milli fundamental dəyərləri saxlamaqla müasir dünyanın çağırışları ilə ayaqlaşan ailələrin formalaşması dövlətin başlıca siyasi xəttinə çevrilib.

Diqqətə çatdırılıb ki, Azərbaycan Respublikasının Ailə Məcəlləsinə edilən dəyişiklik əsasında qızlar və oğlanlar üçün nikah yaşının 18-ə qaldırılması ailə üzvlərinin sağlamlığı, xüsusilə ana və uşaqların sağlamlığının mühafizəsi üçün çox önəmli məsələlərdəndir. Tərəflərin nikahdan əvvəl məcburi tibbi müayinədən keçməsi ilə bağlı Azərbaycan Respublikasının Ailə Məcəlləsinə edilən dəyişiklik isə həm ailələrimizin, həm də gələcək nəsillərin sağlamlığına xidmət edən mühüm amildir.

Eltun Həziyev ailə dəyərlərinin qorunması, ailə institutunun gənclər arasında möhkəmləndirilməsi, onların hüquqi biliklərinin artırılması və sağlamlıqlarının qorunması istiqamətində görülən işlər barədə danışıb.

Sonra Naxçıvan Dövlət Universitetinin Tibb fakültəsinin Ümumi təbabət klinik fənlər kafedrasının müdiri, həkim-ginekoloq, tibb elmləri üzrə fəlsəfə doktoru Gültəkin Əliyeva “Nikahdan öncə gənclərin tibbi müayinələrdən keçməsi ailələrin sağlam olmasının əsas şərtlərindədir” mövzusunda çıxış edib. O, vizual vəsaitlərdən istifadə etməklə gənc ailələrin və dünyaya gələcək körpələrin sağlamlıqları üçün preventiv tədbirlər haqqında ətraflı məlumat verib.

“Nikah və nikah müqaviləsi ailələrin qorunma vasitələrindən biridir” mövzusunda çıxış edən Naxçıvan Muxtar Respublikası Ədliyyə Nazirliyinin Hüquqi şəxslər və vətəndaşlıq vəziyyəti bölməsinin rəisi Həbibə Əliyeva mövzu ilə bağlı danışıb, müvafiq sahə ilə bağlı sualları cavablandırıb.

Daha sonra tədbir qarşılıqlı diskussiya şəraitində davam edib.

Tədbirin sonunda tələbələrə mövzu ilə bağlı hazırlanmış broşürlər paylanılıb.