CƏMİYYƏT


“Ailəliklə kitabxanaya” layihəsi ailələrdə mütaliə ənənəsinin təbliği baxımından mühüm əhəmiyyətə malikdir

Bakı, 14 fevral, Nəriman Həsənov, AZƏRTAC

Fevralın 14-də Ailə, Qadın və Uşaq Problemləri üzrə Dövlət Komitəsi (AQUPDK), Mədəniyyət Nazirliyi və Sabunçu Rayon İcra Hakimiyyəti “Ailəliklə kitabxanaya” layihəsi çərçivəsində tədbir təşkil ediblər.

AZƏRTAC xəbər verir ki, tədbirin keçirilməsində məqsəd cəmiyyətin diqqətinin mütaliəyə cəlb olunması, ailədə mütaliə ənənəsinin təbliği və asudə vaxtın mənalı, səmərəli və düzgün nizamlanması olub.

Sabunçu rayonundakı Asudə Vaxt Mərkəzində təşkil olunan tədbir uşaqların milli nağıllarımızdan səhnələşdirdiyi bədii hissə ilə başlayıb.

Sabunçu Rayon İcra Hakimiyyəti başçısının müavini Rəna Fərəcova mütaliənin gənc nəslin maariflənməsində, dünyagörüşünün artmasında, təfəkkürünün inkişafında mühüm rol oynadığını qeyd edib. Bildirib ki, kitab insanda bir sıra müsbət keyfiyyətləri formalaşdırmaqla hər kəsin ən etibarlı dostuna çevrilir.

AQUPDK-nın sədr müavini Aynur Sofiyeva cəmiyyətin mənəvi və intellektual inkişafında mütaliənin vacibliyindən danışaraq, uşaq və gənclərdə mənəvi zənginliyi formalaşdırmaqda kitabın xüsusi əhəmiyyətinin olduğunu bildirib. O, məhz layihənin də Azərbaycan ailələrində müasir düşüncəli, savadlı gənclərin yetişməsində böyük rolu olacağını bildirib.

Milli Məclisin ailə, qadın və uşaq məsələləri komitəsinin üzvü Dilarə Cəbrayılova layihənin həyata keçirilməsində dəstəyi olan təşkilatlara minnətdarlığını bildirib. O, bu cür maarifləndirici silsilə tədbirlərin təşkil olunmasının ailə münasibətlərinin möhkəmləndirilməsi istiqamətində də böyük rolunun olacağını, ailədə kitaba sevginin hər kəsə uşaq yaşlarından aşılanmalı olduğunu, xüsusilə də bu işdə valideynlərin üzərinə böyük məsuliyyətin düşdüyünü bildirib.

Bakı Şəhər Mədəniyyət Baş İdarəsinin əməkdaşı Şücayət Piriyeva, YAP Sabunçu rayon təşkilatının sədri Mehriban Abasquliyeva, Sabunçu rayon MKS-nin direktoru Nəcibə Hüseynova, Asudə Vaxt Mərkəzinin direktoru Vüsalə Kərimova, rayon Gənclər və İdman İdarəsinin rəisi Rakif Əliyev, “Azərkitab” Mərkəzinin direktoru Misirxan Həsənov layihənin əhəmiyyətindən bəhs ediblər.

Sonra tədbir iştirakçıları Asudə Vaxt Mərkəzində oxucular üçün yaradılan şəraitlə tanış olublar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.