SİYASƏT
Akkan Suver: Ümummilli Liderinin mübarizəsində nə qədər haqlı olduğunu ötən günlərdə yazılan Qarabağ dastanında bir daha gördük
İstanbul, 12 dekabr, AZƏRTAC
Böyük insanların yalnız doğum tarixləri olur. Onlar bizi tərk edə bilərlər, lakin, düşüncələri və idealları ilə hər zaman yanımızdadırlar. Belə insanlardan biri olan Azərbaycan xalqının ulu öndəri Heydər Əliyev də uzaqgörənliyi və dünyaya baxışı ilə yalnız Azərbaycan torpaqlarında deyil, bütün türk dünyası coğrafiyasında yaşayır.
AZƏRTAC xəbər verir ki, bu fikirlər “Mərmərə Qrupu” Strateji və Sosial Araşdırmalar Vəqfinin sədri, professor Akkan Suverin Azərbaycan xalqının ümummilli lideri Heydər Əliyevin vəfatının 17-ci ildönümü ilə bağlı Türkiyənin nüfuzlu “Milliyyət” qəzetindəki məqaləsində yer alır.
Məqalədə bildirilir ki, Heydər Əliyev Azərbaycanda ikinci dəfə hakimiyyətə gələrkən ölkə ən çətin və ağır günlərini yaşayırdı: “Ölkə daxilində qarşıdurma ən üst həddə idi. Azərbaycan tarixinin ən böhranlı dövrünü yaşayırdı. Ölkə vətəndaş müharibəsi astanasında idi və müstəqillik təhlükə qarşısında qalmışdı. Belə bir dövrdə bütün bu çətinliklərə baxmayaraq, xalqın dəvətinə cavab olaraq Heydər Əliyev hakimiyyətə gəldi. Əvvəlcə ölkədaxili sabitliyi bərqərar edən Ulu Öndər, həmçinin Azərbaycanın xaricdə nüfuzunu artırmaq və erməni işğalı altında olan torpaqların danışıqlar yolu ilə qaytarılmasına nail olmaq istiqamətində fəaliyyətini davam etdirdi”.
Ümummilli Liderin ATƏT-in Lissabon Zirvəsində yüksək inandırma qabiliyyəti nümayiş etdirərək Qarabağın Azərbaycan ərazisi kimi qeydə alınmasını təmin etməsinin o günün şərtlərinə fövqəladə bir uğur olduğunu deyən professor bildirib: “1997-ci ildə Lissabonda əldə edilən bu müvəffəqiyyət 23 il sonra onun əbədi yuxusunda rahatlığa çatmasını təmin edən Qələbənin ilk addım idi. Heydər Əliyev ömrü boyu Qarabağ məsələsini öndə tutub, Ermənistanın işğalı və törətdiyi bütün qanunsuzluqları hər platformada beynəlxalq aləmə çatdırıb. O, Qarabağ mövzusunda çox həssas və qərarlı idi. Ümummilli Lider bu qərarlılığını Mixail Qorbaçovun Qarabağ və Bakı siyasətində SSRİ-yə etiraz edərək, Kommunist Partiyası üzvlüyündən istefası ilə də nümayiş etdirdi. Bu, o günün şərtləri daxilində asan bir davranış deyildi. Ancaq, Qarabağ məsələsinə olan həssaslığı və o dövrdə Rusiyanın irəli sürdüyü Bakı siyasəti onu bu addımı atmağa vadar etdi. Ulu Öndər on illik hakimiyyəti dövründə əvvəlcə Azərbaycanın birliyini təmin etdi, sonra da milli və beynəlxalq aləmdə, ölkənin sosial, mədəni və iqtisadi sahələrdə inanılmaz ölçülərdə nailiyyətlər əldə etməsinə nail oldu. Bu nailiyyətlərdən biri də müasir Azərbaycan Ordusudur. Onun hakimiyyəti dövründə Azərbaycan Silahlı Qüvvələrinin modernləşdirilməsi və Qərb normalarında formalaşmasına nail olmaq üçün mühüm səylər göstərilmişdi. Təməlini qoyduğu bu addımların nəticəsi olaraq onun əbədiyyətə qovuşmasından 17 il sonra, bu gün Şuşada, Zəngilanda, Kəlbəcərdə, Ağdamda, Qubadlıda, Cəbrayılda, Füzulidə, Laçında Azərbaycan bayrağı dalğalanır. Dahi Heydər Əliyevin siyasi kursunu uğurla davam etdirən Azərbaycan Prezidenti İlham Əliyev Ulu Öndər tərəfindən başladılan danışıqlar yolunu səbrlə davam etdirdi. Azərbaycanın haqlarını tanımamaqda israr edən Ermənistanı şanlı Azərbaycan Ordusu diz çökdürtdü”.
O qeyd edib ki, həyatı boyu bütün əsərlərini türk dünyasına, türk birliyinə və Türkiyə Respublikasına inamı, uzaqgörənliyi ilə formalaşdıran, Azərbaycanla Türkiyəni onun sözləri ilə desək qalın zəncir olan Bakı-Tiflis-Ceyhan kəməri ilə bağlayan Azərbaycanın Ümummilli Liderinin inancında və mübarizəsində nə qədər haqlı olduğunu ötən günlərdə yazılan şanlı Qarabağ dastanında bir daha gördük. Azərbaycanın əldə etdiyi Qarabağ Zəfəri Azərbaycan dövləti və onun Prezidenti İlham Əliyevin Heydər Əliyev siyasi kursuna sadiqliyinin sübutudur.
Günel Məlikova
AZƏRTAC-ın xüsusi müxbiri
İstanbul