CƏMİYYƏT
Aksiz markası olmayan spirtli içkilərin realizə edilməsi cəhdinin qarşısı alınıb
Bakı, 5 mart, AZƏRTAC
Dövlət Gömrük Komitəsinin Əməliyyat-İstintaq Baş İdarəsinin əməkdaşları Azərbaycan Respublikasının gömrük ərazisinə qaçaqmalçılıq yolu ilə gətirilmiş xeyli miqdarda aksiz markası olmayan spirtli içkilərin realizə edilməsi cəhdinin qarşısını alıblar.
Komitənin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, Əməliyyat-İstintaq Baş İdarəsinin Əməliyyat İdarəsinin Narkotiklərlə mübarizə şöbəsi və Qərb Ərazi Baş Gömrük İdarəsinin Əməliyyat-Təhqiqat İdarəsinin əməkdaşları tərəfindən keçirilən birgə əməliyyat tədbiri nəticəsində Ağstafa rayonu ərazisində Azərbaycan Respublikası vətəndaşı idarə etdiyi “Mercedes-Benz” markalı nəqliyyat vasitəsində olan spirtli içkiləri şərti alıcı qismində cəlb edilmiş gömrük əməkdaşına satmaq istəyərkən saxlanılıb. Daha sonra Qərb Ərazi Baş Gömrük İdarəsinin Tovuz gömrük postunda avtomobilə gömrük baxışı keçirilib. Baxış zamanı nəqliyyat vasitəsində 1 litrlik, ümumilikdə 90 ədəd “Nemiroff Delikat” markalı spirtli içki aşkarlanıb.
Faktla bağlı araşdırma aparılır.