CƏMİYYƏT
Aktauda keçirilən Beynəlxalq Xəzəryanı Gənclər Forumu işini başa çatdırıb
Bakı, 25 sentyabr, AZƏRTAC
Qazaxıstanın Aktau şəhərində keçirilən Beynəlxalq Xəzəryanı Gənclər Forumu işini başa çatdırıb.
Gənclər və İdman Nazirliyinin mətbuat xidmətindən AZƏRTAC-a bildiriblər ki, Forumda Azərbaycan, Qazaxıstan, İran, Rusiya və Türkmənistan nümayəndə heyətləri iştirak ediblər.
Qazaxıstanın Mangistau vilayətinin rəhbəri Yeralu Toğjanov tədbirdə çıxış edərək Prezident Nursultan Nazarbayevin və Prezident İlham Əliyevin təşəbbüsü ilə həyata keçirilən Beynəlxalq Xəzəryanı Gənclər Forumunun iki ölkə arasında dostluq və qardaşlıq münasibətlərinin inkişafına töhfə verəcəyinə əminliyini bildirib. Qeyd edib ki, Forum çərçivəsində gənclər faydalı fikir mübadiləsi apararaq yeni bilik və təcrübələrə yiyələnəcəklər.
Qazaxıstanın dini işlər və vətəndaş cəmiyyəti naziri Nurlan Yermekbaev, təhsil və elm nazirinin müşaviri Arin Orsariyev, İranın baş konsulu Mahmud Adib və digərləri çıxışlarında Forumun əhəmiyyətindən danışıblar.
Azərbaycanın gənclər və idman nazirinin müavini İntiqam Babayev çıxışında gənclərin ictimai-siyasi proseslərdə fəal rol oynadıqlarını bildirib. Nazir müavini Forum iştirakçılarına Azərbaycanda həyata keçirilən gənclər siyasəti, qəbul olunan Dövlət proqramları, yerli və beynəlxalq səviyyədə təşkil edilən tədbirlər, reallaşdırılan layihələr haqqında məlumat verib. İ.Babayev Azərbaycanın və Qazaxıstanın dövlət başçılarının təşəbbüsü ilə keçirilən Forumun ölkələrimiz və xalqlarımız, xüsusən də gənclər arasında əməkdaşlığın inkişafı baxımından önəmini vurğulayıb.
Sonra Azərbaycanın müxtəlif dövlət və qeyri-hökumət gənclər təşkilatlarının təmsilçilərinin iştirakı ilə “Mədəni həyatda gənclərin rolu: dəyərlər, arxetiplər və hədəflər”, “Gənclər həyatının dizaynı”, “Yeni liderlərin hazırlanması” və digər mövzularda panel iclasları keçirilib.
Forum Azərbaycanın və Qazaxıstanın incəsənət ustalarının maraqlı konsert proqramı ilə başa çatıb.