İDMAN


Aleksandra Kiroy-Boqatıryova: Azərbaycan dünyanın ən yaxşı məşq mərkəzlərindən biridir

Bakı, 24 yanvar, AZƏRTAC

Bakıda təlim-məşq toplanışında olan Avstraliyanın bədii gimnastika üzrə yığma komandasının üzvü Aleksandra Kiroy-Boqatıryova Azərbaycan Gimnastika Federasiyasının (AGF) mətbuat xidmətinə müsahibə verib.

AZƏRTAC AGF-yə istinadla həmin müsahibəni təqdim edir.

- Azərbaycana xoş gəlmisiniz. Zəhmət olmasa, özünüzü təqdim edin.

İlk növbədə, Azərbaycanda məni səmimi qəbul etdiyiniz üçün təşəkkür edirəm. On doqquz yaşım var və Yeni Zelandiyada anadan olmuşam. Avstraliyada yaşayıram, amma valideynlərim rus əsillidir. Mən Avstraliyanın Monaş Universitetinin Hüquq fakültəsində oxuyuram. On üç ildir ki, bədii gimnastika idman növü ilə məşğul oluram.

- Bədii gimnastika idman növündə qazandığınız nailiyyətlər barədə məlumat verərdiniz.

İdmanda ən böyük və yaddaqalan uğurum Birlik Ölkələri Oyunlarında iki bürünc medal, həmçinin 21 qat Avstraliya çempionu adını qazanmağımdır.

-Bu, sizin Azərbaycana ilk səfəriniz deyil. Burada nə qədər qalmağı planlaşdırırsınız?

Mən Bakıya müxtəlif vaxtlarda keçirilən dünya kubok yarışları və dünya çempionatları zamanı səfər etmişəm. Təxminən may və ya avqust aylarınadək burada qalmağı planlaşdırıram. Təəssüf ki, Avstraliyada COVID-19 pandemiyası ilə bağlı çox böyük problemlər mövcuddur və hazırda ölkəyə qayıtmaq çox çətindir. Buna görə də burada mənim üçün yaradılan yüksək şəraitdən yararlanaraq yığma üzvləri ilə məşqlərimi davam etdirəcəyəm.

- Burada keçirilən məşqlərdə əsasən nə üzərində işləyirsiniz?

Hər gün müxtəlif məşqlər edirik. Burada inanılmaz məşq sistemi mövcuddur. Proqrama dartınma hərəkətləri, güc, fitnes, kardio məşqləri daxildir. Bundan əlavə, hovuz və saunadan da istifadə edirik. Demək olar ki, məşqlər hər gün yeni proqramı və fərqliliyi ilə seçilir. Mən deyərdim ki, bu cür peşəkar məşqlərin nəticəsidir ki, Azərbaycanın güclü milli komandası var.

- Milli Gimnastika Arenasında yaradılan şəraiti necə dəyərləndirirsiniz?

Azərbaycan dünyada ən yaxşı məşq şəraitinə malik olan ölkələrdən biridir. Burada hər bir şəraiti olan zallarla yanaşı, hovuz, sauna, yataqxana, yeməkxana mövcuddur. İdmançıların düzgün qidalanmasına diqqət yetirilir, onlarla peşəkar məşqçilər və xoreoqraflar işləyir. Burada hamı qonaqpərvər və mehribandır. Bir sözlə, Azərbaycan dünyanın ən yaxşı məşq mərkəzlərindən biridir.

-Bakı haqqında təəssüratlarınız necədir?

Bakının bütün görməli yerlərini gəzmişəm. Paytaxtınızdakı “Alov qüllələri” binaları, Heydər Əliyev Mərkəzi ilə tanış olmuşam. Yığma komandanın üzvləri ilə birlikdə filmə baxmağa getmişik və onlar mənə demək olar ki, şəhərin bütün gəzməli yerlərini göstəriblər.

-Qarşıda sizi hansı yarışlar gözləyir?

Qarşıda məni Ukraynada keçiriləcək Qran-Pri “Deryuqina Kuboku” gözləyir. Həmçinin Bakıda və Daşkənddə keçiriləcək dünya kubokları yarışlarında iştirak edəcəyəm.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.