SİYASƏT
Əli Əşrəf Moctəhed Şəbüstəri: Azərbaycan Üçüncü Bakı Beynəlxalq Humanitar Forumunda humanizm prinsiplərinin qorunması istiqamətində israrlığını dünyaya nümayiş etdirmişdir
Tehran, 30 dekabr (AZƏRTAC). Bu il oktyabrın 31-i, noyabrın 1-də Azərbaycan paytaxtında keçirilmiş Üçüncü Bakı Beynəlxalq Humanitar Forumunun iştirakçısı olmuş İran Ekologiya Nazirliyinin müşaviri, Dünya Dinlər Araşdırma Mərkəzinin üzvü, səfir Əli Əşrəf Moctəhed Şəbüstəri Azərbaycan Respublikası ilə bağlı təəssüratlarını AZƏRTAC ilə bölüşmüşdür.
-Cənab səfir, Üçüncü Bakı Beynəlxalq Humanitar Forumu barədə nə deyə bilərsiniz?
- Birmənalı olaraq qənaətim belədir ki, Üçüncü Bakı Beynəlxalq Humanitar Forumu müasir dünyanın həyatında çox mühüm hadisə olmuşdur. Bu Forum mahiyyətinə, məqsəd və nəticələrinə görə iki mühüm cəhəti özündə ehtiva etmişdir. Birincisi, Forumda dünyadakı mövcud problemlər ciddi müzakirə olunmuş və onların həllinə dair yeni fikirlər, çıxış yolları barədə konkret təkliflər beynəlxalq ictimaiyyətin diqqətinə çatdırılmışdır. İkincisi, Azərbaycan Respublikası öz siyasətinin əsl mahiyyətini - humanizm prinsiplərinin qorunması istiqamətində israrlığını bir daha dünyaya nümayiş etdirmişdir. Forumun yüksək səviyyədə təşkili, burada dünyanın demək olar ki, bütün qitələrindən olan nüfuzlu qonaqların - görkəmli elm və mədəniyyət, siyasət və dövlət xadimlərinin iştirakı, dinindən və irqindən asılı olmayaraq hamıya bərabər münasibətin bəslənilməsi və digər mühüm məqamlar Azərbaycan dövlətinin beynəlxalq aləmdə nüfuzunun daha da artmasına müsbət təsir göstərən amillər sırasındadır.
- Sizin Azərbaycanın bugünkü inkişaf səviyyəsi barədə fikrinizi eşitmək çox maraqlı olardı.
-Kimin istəyib-istəməməsindən, kimin sevinib-sevinməməsindən asılı olmayaraq həqiqət budur ki, Azərbaycan çox surətlə və dəqiq hədəflərlə inkişaf edir. Azərbaycanda gördüklərim, xüsusilə ölkənizdə cərəyan edən sürətli inkişaf, insanların azad və firavan həyatı məni hədsiz dərəcədə sevindirdi. Forum çərçivəsində bir qrup iştirakçı ilə Gəncədə olduq. Gəncə qədimliyini qoruyub saxlamaqla bərabər, Azərbaycan xalqının milli mənəvi dəyərləri çərçivəsində surətlə müasirləşən bir Şərq şəhəridir. Qardaş ölkədə məscidlərə, pirlərə və ziyarətgahlara dövlət qayğısı, insanların böyük ehtiramla bu müqəddəs yerləri ziyarət etmələri, azad ibadət şəraiti məni bir müsəlman olaraq ruhlandırdı, Azərbaycanın bizlərə doğmalığını bir daha hiss etdim.
- Azərbaycan-İran münasibətləri barədə nə deyə bilərsiniz?
- Dövlətlərimizi və xalqlarımızı elə mühüm tellər bağlayır ki, bunları bir-birindən ayırmaq mümkünsüzdür. Qeyd etdiyim kimi, Azərbaycanın hərtərəfli inkişafını görməkdən hədsiz sevindim. Bununla bərabər, məni narahat edən ciddi bir məqamlar da var. Bu narahatçılıq hər iki ölkədəki həqiqətlərin qarşı tərəfə təhrif olunmuş halda çatdırılmasıdır. Sülh, sabitlik və inkişaf hər iki ölkə üçün hava və su qədər vacibdir. Biz doğma və qonşu xalqlar olaraq imkan verə bilmərik ki, münasibətlərimizin pozulmasında maraqlı olan başqa qüvvələr aranı qarışdırsınlar. Bu məsələdə hər iki ölkənin kütləvi informasiya vasitələrinin üzərinə böyük məsuliyyət düşür. Nümunə kimi xalqlarımızın və ölkələrimizin doğmalığının qorunması istiqamətində AZƏRTAC-ın böyük işlər gördüyünü göstərə bilərəm. Amma hesab edirəm ki, hələ görüləsi işlər də çoxdur. Ölkələrimizlə bağlı informasiyaların üçüncü tərəfin mənbələrindən əldə edilməsinə imkan verməməliyik. Hesab edirəm ki, ölkələrimizin və xalqlarımızın elm, təhsil, mədəniyyət, ədəbiyyat və digər humanitar sahələrdə ikitərəfli əməkdaşlıq əlaqələrinin genişləndirilməsi çox vacibdir.
Bu sahələr üzrə konfrans və forumların təşkilinə üstünlük verməliyik. Məsələn, 2014-cü ilin yayında İranda Əlişir Nəvainin həyat və yaradıcılığına həsr olunmuş konfrans keçirmək niyyətindəyik. Azərbaycan Respublikasını təmsil edən alimlərin bu konfransın ən mötəbər qonaqları olmasını arzu edirik. Yaxşı olar ki, Bakıda Azərbaycanda geniş tanınan və sevilən Firdovsinin yaradıcılığına həsr olunmuş bir mərasim keçirilsin. Düşünürəm ki, bu istiqamətlərdə fəaliyyətimizi daha da genişləndirsək, bütün bunlar münasibətlərimizin inkişafına əhəmiyyətli təsir göstərə bilər.
Sabir Şahtaxtı
AZƏRTAC-ın xüsusi müxbiri
Tehran