REGİONLAR


“Alıcımız çoxdur, qapımıza gəlib aparırlar” – Lənkəranın feyxoa bağlarından reportaj VİDEO

Lənkəran, 26 oktyabr, İsmayıl Cəfərli, AZƏRTAC

Cənub bölgəsinin ən böyük sitrusçuluq rayonlarından olan Lənkəranda feyxoa yığımı davam edir. Bu il məhsuldarlıq ürəkaçandır. Rusiya, digər MDB ölkələrinə göndərilən məhsul yaxşı qiymətə satılır.

AZƏRTAC xəbər verir ki, feyxoa əkini əsasən Lənkəranın Hirkan, Xanbulan, Vilvan, Qurunba, Rvo və Şovu ərazi nümayəndəliklərində yayılıb. Meyvə ağaclarının məhsuldarlığı onun yaşına görədir. Məsələn, 10 yaşlı ağacdan mövsüm ərzində 15-20 kiloqram məhsul yığmaq olur.

Oktyabrın əvvəllərindən bağlarda meyvə yığılır. Lənkəranlı fermer Əliheydər Həsənov deyir ki, bu il məhsul boldur: “Feyxoa elə bir ağacdır ki, qulluq etməsən yaxşı məhsul götürə bilməzsən. Şum aparırıq, peyin, gübrə veririk, alaq otlarını təmizləyirik. Bu il bağlarda məhsul yaxşıdır. On gün qabaq 2 manata, 2 manat 50 qəpiyə satırdıq. İndi bağların hamısından məhsul yığıldığına görə qiymət bir az aşağıdır. Məhsulumuz daha çox Moskva bazarlarına göndərilir. Alıcımız çoxdur, qapımıza gəlib aparırlar”.

İşçi Sürəyya Cavadova hər il bu feyxoa bağında işləyir, ağaclara qulluq edir. “Yığım zamanı iri və xırda feyxoaları çeşidləyərək ayrı-ayrı yeşiklərə tökürük. Çünki hərəsinin ayrı alıcısı olur. İşimizdən razıyıq”, - deyə o vurğulayıb.

Digər sitrus və subtropik ağaclara nisbətən feyxoa az məsrəf, qulluq tələb edir. Buna görə də daha rentabelli sayılır. Əvvəllər satışı zəif olduğuna görə bu sahəyə maraq az idi. Son illər vəziyyət dəyişib. Qurunba kənd sakini fermer Kamal Hüseynovun sözlərinə görə, əvvəllər qiymətlər yüksək olduğundan məhsulu daha çox ixrac etməyə üstünlük verirdilər: “Son 2-3 ildə MDB-yə, digər dövlətlərə göndəririk. Gəlib elə qapıda məhsulu yığırlar. Məhsul hissə-hissə yığılır. Sonra kütləvi yığım başlayır. Hələlik hər şey yaxşıdır, subsidiya da verilir. Subsidiyanın, xüsusilə gübrələrin güzəştli qaydada verilməsi əhalidə bu sahəyə marağı artırdı. Dövlət dəstəyi olduğu üçün son dövrdə feyxoa bağları daha çox salınıb”.

Qeyd edək ki, feyxoa bağlarında yığım dekabrın əvvəllərinədək davam edəcək. Lənkəranda ümumilikdə 500 hektardan çox feyxoa bağı var ki, bunun da 80 faizi məhsuldardır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.