CƏMİYYƏT
Əlilliyi olan şəxslərə reabilitasiya vasitələri verilib
Bakı, 18 noyabr, AZƏRTAC
Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzi tərəfindən növbəti səyyar xidmət tədbiri keçirilib. Salyan, Neftçala, Biləsuvar, Cəlilabad rayonlarında yaşayan əlilliyi olan şəxslərə ehtiyac duyduqları reabilitasiya vasitələri həmin rayonlara, onlardan bir hissəsinə isə evlərinə aparılaraq təqdim edilib.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, Salyan rayonu üzrə 26, Biləsuvar rayonu üzrə 19, Cəlilabad rayonu üzrə 34, Neftçala rayonu üzrə 8 nəfər olmaqla, dörd rayon üzrə 87 nəfər əlilliyi olan şəxsə ümumilikdə 403 reabilitasiya vasitəsi verilib. Onlar 12 əlil arabası, aşağı və ətraf protezləri, ortopedik və protez ayaqqabılar, dirsəkaltı və qoltuqaltı ağaclar, əsalar və digər vasitələrlə təmin ediliblər.
Səyyar formada xidmət göstərilən vətəndaşlar, eləcə də onların ailə üzvləri tədbirdən, ümumən əlilliyi olan şəxslərin sosial müdafiəsi, tibbi və sosial reabilitasiyası istiqamətində aparılan işlərdən razı qaldıqlarını bildiriblər.
Ehtiyac duyduqları reabilitasiya vasitələrini almaq üçün özlərinin və yaxud yaxınlarının Bakıya, Protez-Ortopedik Bərpa Mərkəzinə getmək imkanı olmayan fiziki məhdudiyyətli insanlara Mərkəzin əməkdaşları bu vasitələri ya yaşadıqları rayonlara apararaq təqdim edir, ya da evlərinə çatdırırlar. Bu istiqamətdə tədbirlər davam etdiriləcək.