SİYASƏT
Almaniya nümayəndə heyəti Milli Məclisdə olub
AZƏRTAC xəbər verir ki, görüşdə Milli Məclisin sədri Almaniya-Azərbaycan Forumunun işini yüksək qiymətləndirdiyini deyib. Əminliklə bildirilib ki, görülən işlər ölkələrimiz arasındakı əlaqələrin inkişafına öz töhfəsini verəcək.
Azərbaycan-Almaniya əlaqələrinə toxunan Oqtay Əsədov deyib ki, ölkələrimiz arasındakı münasibətlər sürətlə inkişaf edir. Vurğulanıb ki, Almaniya Azərbaycanın Avropa İttifaqındakı önəmli tərəfdaşlarından biridir. Ötən il ölkələrimiz arasında ticarət dövriyyəsi 2 milyard 200 milyon dollardan çox olub. Bu ilin altı ayında isə bu rəqəm 1 milyard 300 min dollar təşkil edib. Bildirilib ki, ölkələrimiz arasında ticarət əlaqələrini daha da inkişaf etdirmək üçün kifayət qədər imkanlar var.
Oqtay Əsədov ölkələrimizin parlamentləri arasında əlaqələrin daha da inkişaf etdirilməsinin vacibliyini bildirib. Milli Məclisdə Azərbaycan-Almaniya parlamentlərarası əlaqələr üzrə işçi qrupunun fəaliyyət göstərdiyini xatırladan sədr Almaniya parlamentində də Cənubi Qafqaz üzrə dostluq qrupunun olduğunu diqqətə çatdırıb. Sədr dostluq qrupları arasında əməkdaşlığın önəmli olduğunu deyib.
Oqtay Əsədov üç il əvvəl Azərbaycanın Xanlar rayondan bir qrup şagirdin Almaniyanın Ştutqart şəhərinə səfər etdiyini xatırladaraq deyib ki, bu günlərdə Ştutqartdan da Xanlar rayonuna bir qrup şagird gələcək. Bu, yetişməkdə olan nəsillər arasında gələcək əlaqələrin yüksək səviyyədə olacağından xəbər verir.
Hans-Eberhard Şlayer Almaniya-Azərbaycan Forumunun ölkələrimiz arasındakı əlaqələrin inkişafına xidmət etdiyini deyib. Qeyd edilib ki, hər iki tərəf Forumun işinin səmərəliyini artırılması üçün öz töhfələrini verir. O, Forumun Azərbaycan parlamenti ilə də əməkdaşlığının sevindirici hal olduğunu bildirib.
Azərbaycan-Almaniya münasibətlərinə toxunan qonaq qeyd edib ki, xalqlarımız arasında böyük tarixə malik əlaqələr var.