CƏMİYYƏT


Almaniyada təyyarə ilə uçmağa görə “xəcalət çəkənlər”in sayı artır

Berlin, 17 sentyabr, AZƏRTAC

Almaniyada yeni ictimai hərəkat yaranmaqdadır. Bu hərəkatın iştirakçıları insanları aviaşirkətlərin xidmətlərindən az istifadə etməyə, daha çox yerüstü və ya dəniz nəqliyyatına üstünlük verməyə çağırırlar. Alman dilində hətta “ilin sözü” tituluna iddia edə biləcək yeni bir söz yaranıb: “Flugscham”. Bu sözün tərcüməsi “uçuşa görə xəcalət” deməkdir. Hər dəfə təyyarəyə minməyə gedərkən belə hisslər keçirən almanların sayı getdikcə artmaqdadır, çünki təyyarə uçarkən atmosferə böyük miqdarda karbon qazı (CO2) atılır, bu isə qlobal iqlim dəyişmələrinə səbəb olur.

Bununla belə, həmin hərəkat aviabiletlərin satışının həcmində hər hansı şəkildə əks olunmur. Üstəlik, bu ilin əvvəlindən indiyə qədər almanların aldığı aviabiletlərin sayı ötən ilin müvafiq dövrü ərzində satılmış aviabiletlərin sayından 4 faiz çoxdur.

Deyəsən təyyarədə uçmağa görə xəcalət çəkənlər İlf və Petrovun “On iki stul” əsərinin qəhrəmanı Starsobes Aleksandr Yakovleviçin alman variantıdır. “Alxen” ləqəbli həmin qəhrəman hər dəfə oğurluq edərkən daxili narahatlıq keçirir, lakin xəcalət hissi onu bu əməl ilə məşğul olmağa davam etdirməkdən çəkindirə bilmir. “Xəcalət çəkənlər” hərəkatının üzvləri də belədir – uçurlar və xəcalət çəkirlər.

Vüqar Seyidov

AZƏRTAC-ın xüsusi müxbiri

Berlin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.