SİYASƏT
Almaniyadakı Azərbaycanlıların Koordinasiya Mərkəzi idarə heyətinin illik iclası keçirilmişdir
Berlin, 15 dekabr (AZƏRTAC). Dekabrın 11-də Berlində yerləşən Almaniyadakı Azərbaycanlıların Koordinasiya Mərkəzinin (AAKM) idarə heyətinin illik iclası keçirilmişdir. Azərbaycanın Almaniyadakı səfirliyinin dəstəyi və iştirakı ilə keçirilən toplantıda bu ölkədəki diasporumuzun təşkilatlanması məsələləri müzakirə olunmuşdur.
İclasda Azərbaycanın Almaniyadakı səfiri Pərviz Şahbazov, səfirliyin birinci katibi Fikrət Axundov, Almaniya Bundestaqının keçmiş üzvü Hakkı Kəskin, AKKM idarə heyətinin üzvləri, AAK-ın prezidenti Başar Kömür, bu qurumun fəxri prezidenti Bahəttin Kaya, qurumun icraçı direktoru xanım Samirə Patzer-İsmayılova, Frankfurt Azərbaycan Cəmiyyətinin sədri Kəmalə İskəndərova, Azərbaycan Federasiyasının sədri Nüsrət Delbaste, Berlin-Bakı Qalereyasının rəhbəri İbrahim Əhrari iştirak etmişlər.
Səfir Pərviz Şahbazov çıxışında AAKM-in fəaliyyətini yüksək qiymətləndirmiş, qurumun qarşısına qoyulan vəzifələrin öhdəsindən layiqincə gəldiyini vurğulamışdır.
Sonra AAKM-in icraçı direktoru Samirə Patzer-İsmayılova AAKM-in 2 illik fəaliyyəti haqqında hesabatla çıxış etmişdir. Hesabat ətrafında müzakirələr olmuş, idarə heyətinin üzvləri müxtəlif təkliflər irəli sürmüş və sənəd müsbət qiymətləndirilmişdir.
Sonra təşkilati məsələlərə baxılmış, AAKM-in idarə heyəti seçilmişdir. Hakkı Kəskin, Azərbaycan Kültür Cəmiyyətinin üzvü, alman dili üzrə mütəxəssis Naiba Hantel, Alman-Azərbaycan Forumunun üzvü, hüquqşünas Pərviz Yazdani də idarə heyətinə seçilmişlər.
İclas Almaniyada fəaliyyət göstərən Azərbaycan icmalarının sədrləri və diasporumuzun fəallarının iştirakı ilə davam etmişdir.
P.Şahbazov Almaniyada yaşayan azərbaycanlıların bu ölkənin ictimai həyatına dərindən inteqrasiya olmalarının vacibliyini vurğulamış, bütün iştirakçıları Koordinasiya Şurasının üzvü olmağa dəvət etmişdir. Samirə Patzer-İsmayılova Almaniyanın müxtəlif əyalət və şəhərlərindən gəlmiş diaspor nümayəndələrinə AAKM-in çoxşahəli fəaliyyəti haqqında hazırladığı vizual görüntülərlə müşayiət olunan məruzə təqdim etmişdir.
Cəmiyyət sədrləri və diaspor fəalları çıxış etmişlər. Münhendən gəlmiş Kamalə Kərimova yaşadığı şəhərdə fəaliyyət göstərən Alman Azərbaycan Mədəniyyət Cəmiyyətinin fəaliyyətindən danışmışdır.
Frankfurtdakı diasporumuzun təmsilçisi Cümə Məmmədov da 2010-cu ilin noyabr ayında Frankfurt şəhəri üzrə keçirilən seçkilərdə iştirak edərək Əcnəbilər Şurasına üzv seçildiyini bildirmişdir. Hannover Xəzər Cəmiyyətinin sədri Etibar Qəniyev isə qurumun gördüyü işlər haqqında məlumat vermiş, cəmiyyətin fəaliyyətində alman siyasi partiya və ictimai təşkilatları ilə əlaqələrin möhkəmlənməsinə üstünlük verildiyini bildirmişdir. Kölndən gəlmiş professor Reza Talebi-Daryani Alman–Azərbaycan Forumunun üzvü olaraq Kölndə çalışdığı ali məktəbdə Azərbaycanın iqtisadiyyatı haqqında tədris proqramı hazırlayaraq çap etdiyini söyləmiş və onun bir nüsxəsini AAKM-ə təqdim etmişdir.
İclasda gəncləri təmsil edən Leypsiq Universitetinin tələbəsi Polad Poladlı azərbaycanlı tələbələrin respublikamıza aid keçirdikləri tədbirlər barədə məlumat vermişdir. Ermənilərin informasiya təxribatlarının qarşısının alınması istiqamətində, eləcə də Dağlıq Qarabağ münaqişəsinə dair həqiqətlərin alman ictimaiyyətinə çatdırılması sahəsində gördükləri işlərdən danışan P.Poladlı Almaniyaya təhsil almağa gələn gənc nəslə daha çox himayədarlıq edilməsinin vacibliyini vurğulamışdır. Maqdeburqda fəaliyyət göstərən Saksen-Anhalt Azərbaycan Mədəniyyəti Cəmiyyətinin sədri Yaşar Niftəliyev isə təşkil etdikləri boks turnirlərindən və bu turnirlərdə Azərbaycan bayrağının qaliblər sırasında ucaldılmasından danışmışdır. O, bu turnirlərdə Azərbaycan Dövlət himnini, xalq musiqisini səsləndirməklə dövlətimizin, mədəniyyətimizin təbliğinə xidmət etdiklərini bildirmişdir. Drezdendə fəaliyyət göstərən “ALM.AZ” Cəmiyyətinin sədri Ağa Hüsseyn Babayev Azərbaycan, xüsusilə də Qarabağ həqiqətlərini əks etdirən materialların ictimai kitabxanalara paylanması, milli bayramların və qan yaddaşımızla bağlı tədbirlərin mütəmadi qeyd olunması barədə hesabat vermişdir.
Sonda diaspor nümayəndəsi İlter Tosun AAKM və səfirliyə müraciət edərək gənc nəslin işlə təmin olunmasına mümkün formada yardım göstərilməsini təklif etmişdir.
Sonra 2011-ci il üçün tədbirlər planı müzakirə edilmiş, müvafiq qərar qəbul olunmuşdur.
Vüqar Seyidov
AZƏRTAC-ın xüsusi müxbiri
Berlin