İQTİSADİYYAT
Almaniyanın Federal İqtisadi İnkişaf və Xarici Ticarət Assosiasiyasının saytında Azərbaycanda tikinti sektoru ilə bağlı məqalə dərc edilib
Berlin, 2 iyul, AZƏRTAC
Almaniyanın Federal İqtisadi İnkişaf və Xarici Ticarət Assosiasiyasının internet səhifəsində səfir Ramin Həsənovun “Azərbaycanın tikinti-inşaat materialları sənayesi: icmal və perspektivlər” adlı məqaləsi dərc olunub.
AZƏRTAC xəbər verir ki, BWA-nın Arxitektura və Şəhər İnkişafı Komissiyasının rəhbəri Klaus Trepte məqalə və alman şirkətləri üçün Azərbaycandakı inşaat sənayesinin potensialı ilə bağlı şərhlərini bölüşərək bildirib ki, Cənubi Qafqazda Almaniyanın ən böyük ticarət tərəfdaşı qismində Azərbaycanda davamlı və gələcəyə yönəlmiş inşaat layihələrini reallaşdırmaq üçün cəlbedici imkanlar mövcuddur. Azərbaycan hökuməti ekstensiv maliyyələşdirmə imkanlarını təmin edir. Məqalədə vurğulanır ki, BWA-nın Arxitektura və Şəhər İnkişafı Komissiyası alman şirkətlərinin Azərbaycandakı biznes planları üçün lazımi dəstək göstərməyə hazırdır. Eyni zamanda, bildirilir ki, adıçəkilən sektorda alman və beynəlxalq şirkətlər üçün Azərbaycanda mövcud olan imkanlar kontekstində, BWA səfir Ramin Həsənovun məqaləsini dərc edir.
Məqalədə ölkəmizdə inşaat-tikinti materialları sektorundakı cari vəziyyət, potensial və perspektivlər, eləcə də bu sahədəki institusional mexanizmlər və beynəlxalq sərgilər barədə məlumatlar diqqətə çatdırılır.
Bildirilir ki, Azərbaycan tikinti sektorunda istifadə edilə biləcək xammallarla zəngin olan ölkədir. Həmin xammallar ölkənin bir çox inşaat resursları üzrə özünü və böyük ixrac imkanlarını təmin edir. Qeyri-neft sektorunun inkişafı və iqtisadi şaxələndirmə kontekstində ölkə, həmçinin inşaat sektorunun irəlilədilməsinə diqqət yetirir. Azərbaycan nəqliyyat, informasiya-kommunikasiya texnologiyaları və enerji üzrə böyük layihələr reallaşdırır, eləcə də ictimai mənzil, təhsil və səhiyyə obyektlərini inkişaf etdirir. Heydər Əliyev Mərkəzi, Bakı Ağ Şəhər, Alov qüllələri, “SOCAR Tower”, Bakı Kristal Zalı dünya arxitekturasının seçilmiş əsərləri sırasındadır. Azərbaycanın inşaat bazarı son illərdə davamlı şəkildə inkişaf edib. 2018-ci ildə inşaat sahəsində ÜDM-də yaradılmış əlavə dəyərin payı 8 faiz olub. Yaxın gələcəkdə tikinti materialları istehsalının daha da genişlənməsi gözlənilir. Dövlət dəstəyi və stimullaşdırıcı tədbirlər sayəsində inşaat sənayesi güclü artım nümayiş etdirib və Azərbaycanda rəqabətqabiliyyətli sektora çevrilib. Son illər ərzində tikinti materiallarının yerli istehsalı əhəmiyyətli dərəcədə artıb, eləcə də məhsul çeşidinin genişlənməsinə və ixracın strukturunun təkmilləşməsinə müsbət təsir göstərib. Azərbaycanda fəaliyyət göstərən sənaye və texno-parklar (Sumqayıt Kimya Sənaye Parkı, Sumqayıt Texnologiyalar Parkı), eləcə də sənaye məhəllələri (Masallı, Sabirabad), həmçinin inşaat sahəsində də çoxlu əlverişli biznes imkanları və stimullar (məsələn, vergi və gömrük) təmin edir. Aparıcı inşaat-tikinti şirkətlərinin ölkədə mövcudluğu inşaat sektorunun uzunmüddətli artım dinamikasına olan beynəlxalq etimadı nümayiş etdirir. Bu kontekstdə, xarici şirkətlər Azərbaycanın inşaat-tikinti sektoruna sərmayə yatırmaqdan gəlir əldə edə bilərlər. Azərbaycanın əhalisinin sayı davamlı olaraq artır və hazırda 10 milyondan artıqdır. Bununla əlaqədar olaraq, ölkənin sosial siyasət prioritetlərindən biri vətəndaşların, xüsusən də aşağı və orta gəlirli kateqoriyanın, o cümlədən gənc ailələrin mənzil şəraitlərinin təkmilləşdirilməsindən ibarətdir. Bu xüsusda, əhalinin mənzil ehtiyaclarının qarşılanması, ekoloji cəhətdən dayanıqlı və enerji-səmərəli yaşayış evlərinin inşasının təmin olunması məqsədilə Azərbaycanın Mənzil İnşaatı Dövlət Agentliyi təsis olunub. Eyni zamanda, əhalinin kövrək və az-təminatlı qrupunun mənzil ehtiyaclarının cavablandırılması məqsədilə Qaradağ rayonunda “Qobu-Park” yaşayış kompleksləri inşa edilib. Sosial mənzillərin inşası və ağıllı-intellektual tikintinin reallaşdırılması inşaat sektorunda sahibkarlığın gücləndirilməsini təşviq edəcək, eləcə də yeni iş imkanları yaradacaq.
Xüsusən inşaat-tikinti sahəsində yerli əmək bazarının tələbatının ödənilməsi məqsədilə Azərbaycan Memarlıq və İnşaat Universiteti mülki mühəndislik və arxitektura sahəsində təhsil üzrə ixtisaslaşır. Eyni zamanda, inşaat sənayesinin ümidverici artım potensialını nəzərə alaraq, fərdi həllərin hazırlanmasının irəlilədilməsi, eləcə də proseslərin və məhsulların optimallaşdırılması və rasionallaşdırılması məqsədilə ölkədə bir neçə tədqiqat institutu fəaliyyət göstərir.
Məqalədə qeyd edilir ki, müvafiq sənaye sahəsində vəziyyətin və tendensiyaların təhlil olunması, müvafiq şirkətlərlə interaktiv dialoqun gücləndirilməsi, sektorun inkişafına təsir edən faktorların nəzərdən keçirilməsi və şirkətlərarası əməkdaşlığın təşviqi məqsədilə Azərbaycanın İqtisadiyyat Nazirliyi tərəfindən İnşaat-Tikinti Materialları İstehsalı üzrə işçi qrup təsis olunub. İşçi qrup çərçivəsində müzakirələrin nəticəsi olaraq, sənayenin daha da inkişaf etdirilməsi və istehsalın dəstəklənməsi, qabaqcıl texnologiyaların və beynəlxalq standartların tətbiqi, eləcə də tikinti materialları bazarının təhlükəsizliyinin təmin olunması, tədqiqatların aparılması və işçilərin bacarıqlarının gücləndirilməsi məqsədilə Azərbaycan Tikinti Materialları İstehsalçıları Assosiasiyası yaradılıb.
Layihələrin həyata keçirilməsinin dəstəklənməsi və ictimai infrastrukturun daha da inkişaf etdirilməsi məqsədilə Azərbaycanın Kiçik və Orta Biznesin (KOB) İnkişafı Agentliyinin nəzdində Dövlət-Sahibkar Tərəfdaşlığı Mərkəzi fəaliyyət göstərir. Xarici investisiyaların cəlb olunması, müasir texnologiyaların tətbiqi, innovativ layihələrin hazırlanması və KOB “klastr”larına maliyyə dəstəyinin göstərilməsi məqsədilə KOB İnkişaf Fondu yaradılıb. Startapların inkişaf etdirilməsi, innovativ sahibkarlığın dəstəklənməsi və biznesin inkişafı proqramlarının tərtib olunması məqsədilə KOB İnkişaf Mərkəzləri formalaşdırılıb. Eyni zamanda, İnvestisiya Təşviqi Sənədinin sahibləri müəyyən vergi və gömrük güzəştləri ilə təmin edilir. Bununla yanaşı, sərmayə layihələrinin maliyyələşdirilməsi məqsədilə İqtisadiyyat Nazirliyinin tabeliyindəki Sahibkarlığın İnkişafı Fondu vasitəsilə güzəştli kreditlər təmin olunur. İqtisadiyyat Nazirliyi tərəfindən yaradılmış Azərbaycanda İxracın və İnvestisiyaların Təşviqi Fondu qeyri-neft ixraclarının və xarici sərmayələrin stimullaşdırılması üzrə məsuldur. Azərbaycan İnvestisiya Şirkətinin portfelinə, həmçinin inşaat-tikinti sənayesi də daxildir. Bu xüsusda, Azərbaycan İnvestisiya Şirkəti ilə birlikdə sərmayələrin yatırılması üzrə bir sıra faydalar mövcuddur və potensial investisiya üçün layihələr nəzərdən keçirilməsi üçün adıçəkilən quruma təqdim oluna bilər. Azərbaycan Sənaye Korporasiyasının (ASK) vəzifəsi sənaye istehsalı potensialının artırılmasından ibarətdir.
Azərbaycan Respublikası Sahibkarlar (İşəgötürənlər) Təşkilatları Milli Konfederasiyası nəzdində fəaliyyət göstərən İnşaat və Tikinti Materialları İstehsalı Müəssisələri ilə İş Komissiyası sözügedən sahədə yeniliklərin və perspektivlərin müzakirəsi üçün platformadır. Yerli və qlobal bazarlarda məhsulların və xidmətlərin satışının asanlaşdırılması məqsədilə www.azexport.az internet saytı yaradılıb. Satınalmaların həyata keçirilməsi məqsədilə https://www.etender.gov.az/ virtual platforması hazırlanmış və yeni tenderlər mütəmadi olaraq həmin rəqəmsal sistemdə yerləşdirilir. Strateji layihələrin implementasiyası üçün yeni mexanizmin formalaşdırılması, şəhərlərin və regionların inkişafına təkan verilməsi məqsədilə Azərbaycan İnşaat Korporasiyasının təsis olunması planlaşdırılır.
Səfir yazır ki, Cənubi Qafqazın və Xəzər regionunun ən böyük ixtisaslaşmış platforması olan 26-cı Azərbaycan Beynəlxalq İnşaat Sərgisinin 21-23 oktyabr 2020-ci il tarixlərində Bakı şəhərində keçirilməsi nəzərdə tutulur. Eyni zamanda, 5-ci Beynəlxalq Daşınmaz Əmlak və İnvestisiya Sərgisinin 26-28 noyabr 2020-ci il tarixlərində Bakıda təşkil olunması planlaşdırılır.
1300-dən artıq üzvü olan BWA-nın məqsədi beynəlxalq iqtisadi inkişafın, xarici ticarətin, üzvlərin iqtisadi maraqlarının və kommersiya layihələrinin, bizneslər arasında əməkdaşlığın təşviq olunmasından, eləcə də xarici dövlətlərə işgüzar səfərlərin təşkil olunmasından ibarətdir.
Vüqar Seyidov
AZƏRTAC-ın xüsusi müxbiri
Berlin