DÜNYA


Almaniyanın biznes dairələri Trampın İrana dair mövqeyindən narazıdır

Berlin, 6 noyabr, AZƏRTAC

Almaniyanın biznes dairələri hesab edir ki, Amerika Birləşmiş Ştatlarının İrana qarşı yeni sanksiyaları Avropanın maraqları ilə ziddiyyət təşkil edir.

AZƏRTAC xəbər verir ki, Almaniyanın Topdansatış və Xarici Ticarət üzrə Federal Birliyi (BGA) Amerika sanksiyalarının ikinci paketini “ABŞ hökumətinin Avropaya qarşı daha bir hücumu” adlandırıb və Vaşinqtonun xarici siyasətinin təsirindən azad olmağın zəruriliyini bəyan edib.

Almaniyanın Ticarət-Sənaye Palatası Federal Birliyi (DHIK), öz növbəsində, ehtiyat edir ki, ABŞ sanksiyaları alman şirkətlərinin İrandakı biznesini tamamilə iflic halına sala bilər. “Almaniya-İran iqtisadi münasibətlərinin xilasının zəruriliyini bildirən saat əqrəbləri gecə yarısına 5 dəqiqə qaldığını göstərir”, - deyə DHIK-in prezidenti Erik Şvaytser bildirib.

DHIK-in saytında dərc olunmuş bəyanatda Şvaytser, həmçinin qeyd edib ki, İranın neft-qaz sektoruna qarşı sanksiyalar bu ölkənin büdcəsinin əsas gəlir mənbəyinə toxunur. Onun sözlərinə görə, ABŞ-ın cərimə tədbirləri yaxın gələcəkdə İran iqtisadiyyatının zəifləməsinə gətirib çıxaracaq. Bundan başqa, sanksiya rejimi fonunda daha çox alman şirkəti bu ölkəni tərk edir və İrandakı nümayəndəliklərini bağlayır.

Berlin üstüörtülü şəkildə anladıb ki, alman biznesini ABŞ-ın İrana qarşı tətbiq etdiyi sanksiyalardan tam olaraq qoruya bilmir. AFR hökumətinin rəsmi nümayəndəsi Şteffen Zaybert kansler Merkelin federal hökumətin iqtisadiyyatın bütün sahələri üzrə tamdəyərli kompensasiya ödəyəcəyi barədə “illüziyalara qapılmağa dəyməz” sözlərini xatırladıb. Zaybert deyib ki, eyni zamanda, kiçik və orta müəssisələr üçün ayrı-ayrı güzəştlər ola bilər.

Vüqar Seyidov

AZƏRTAC-ın xüsusi müxbiri

Berlin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.