Almaniyanın federal hökuməti Kiyevə ağır hərbi texnikanın tədarükünə ilk icazəni verib

Berlin, 27 aprel, AZƏRTAC

Almaniyanın müdafiə idarəsinin başçısı Kristina Lambrext bu gün özünün tviter mikrobloqunda bildirib ki, ölkənin federal hökuməti Ukraynaya “Hepard” zenit komplekslərinin tədarükünə icazə verib. Bu, Almaniyanın Ukraynaya ağır hərbi texnika tədarükünə birinci icazədir.

AZƏRTAC xəbər verir ki, adıçəkilən hava hücumundan müdafiə kompleksləri “Krauss-Maffei Wegmann” konserninin zavodlarında istehsal olunur. Hökumətin bu qərarı barədə NATO-nun Almaniyadakı “Ramştayn” aviabazasında keçirilən konfransın yekunlarına həsr olunmuş brifinqdə də bəyan edilib. Lambrext ukraynalı hərbçilərə alman istehsalı olan zenit komplekslərindən istifadə vərdişlərinin öyrədiləcəyini də vəd edib.

Ağır hərbi texnika Bundesverin ehtiyatlarından ayrılacaq.

Vüqar Seyidov

AZƏRTAC-ın xüsusi müxbiri

Berlin