Bakı, 7 iyun, AZƏRTAC

Almaniyanın “ThyssenKrupp” sənaye konserni Hindistan Hərbi Dəniz Qüvvələri üçün 5,2 milyard dollarlıq altı ədəd sualtı qayıq tədarükü ilə bağlı tenderdə iştirak etmək niyyətindədir.

AZƏRTAC “The Economic Times” qəzetinə istinadla xəbər verir ki, bu məlumat Dehli şəhərində səfərdə olan AFR-in müdafiə naziri Boris Pistorius tərəfindən təsdiqlənib.

“Alman sənayesinin Hindistan üçün “stealth” texnologiyasının elementləri ilə sualtı qayıq istehsal etmək üzrə müqavilə bağlamaq üçün yaxşı şansı var”, - deyə Almaniyanın müdafiə naziri bildirib.

“Almaniyaya Hind okeanında sərbəst gəmiçilik və təhlükəsiz ticarət üçün Hindistan kimi strateji tərəfdaşlar lazımdır”, - deyən Boris Pistoriusun sözlərinə görə, AFR və Avropanın digər ölkələri Hind-Sakit okean regionunda mövcudluğunu artırmalıdır.