İQTİSADİYYAT


“Alstom” şirkəti Azərbaycan üçün istehsal etdiyi ilk yük lokomotivinin təqdimatını keçirib

Bakı, 27 iyun, AZƏRTAC

Qazaxıstanın “Astana” xüsusi iqtisadi zonasının ərazisində yerləşən EKZ zavodunda “Alstom Transportation S.A.” şirkətinin Azərbaycan Respublikası üçün istehsal etdiyi ilk yük lokomotivinin - Prima T8-in (AZ8A) təqdimat mərasimi keçirilib.

“Azərbaycan Dəmir Yolları” QSC-nin ictimaiyyətlə əlaqələr şöbəsindən AZƏRTAC-a bildirilib ki, təqdimat mərasimində Azərbaycan və Qazaxıstan dəmir yollarının, “Alstom Transportation S.A.” şirkətinin, eləcə də Azərbaycan və Qazaxıstan kütləvi informasiya vasitələrinin nümayəndələri iştirak ediblər.

Tədbir iştirakçılarına “Alstom Transportation S.A.” şirkətinin fəaliyyəti barədə videoçarx təqdim olunub. “Alstom”un Qərbi və Mərkəzi Asiya klasterinin idarəedici direktoru Bernar Pey şirkətin fəaliyyəti haqda ətraflı məlumat verib.

Astanadakı elektrovoz istehsalı zavodunun baş direktoru Jülyen Nodi müəssisənin fəaliyyəti haqqında məlumat verib.

Təqdimetmə mərasimində “Alstom Transportation S.A.” şirkətinin Yaxın Şərq və Afrika ölkələri üzrə vitse-prezidenti Didye Pfleger çıxış edərək, Prima T8 (AZ8A) lokomotivinin üstünlüklərindən danışıb. Sonra lokomotiv tədbir iştirakçılarına təqdim olunub.

Təqdimetmə mərasiminin iştirakçıları üçün “EXPO-2017” Beynəlxalq sərgisinin muzeyi, eləcə də Qazaxıstanın Milli muzeyinə ekskursiyalar da təşkil olunub.

Prima T8 (AZ8A) Qazaxıstanda istehsal olunan və Azərbaycanın dəmir yollarında istifadə ediləcək dünyanın ən güclü lokomotivlərindən biridir və elektrikləşdirilmiş dəmir yollarında yüksək effektli dartı maşınları arasında liderdir. Bu lokomotiv yüklərin uzun məsafələrə daşınması zamanı maksimal rahatlıq və təhlükəsizliyi təmin edir. Saatda 120 kilometrə qədər sürətlə hərəkət edə bilən Prima T8 (AZ8A) lokomotivi 9000 tona qədər yükdaşıma qabiliyyətinə malikdir.

Qeyd edək ki, “Azərbaycan Dəmir Yolları” QSC ilə Fransanın “Alstom Transportation S.A.” şirkəti arasında 2014-cü il mayın 12-də bağlanmış müqaviləyə əsasən, ADY “QSC” Alstom şirkətinin istehsalı olan 50 ədəd dəyişən cərəyanla işləyən yük lokomotivinin almasını planlaşdırır. Bu lokomotivlərdən 40 ədədi yük daşınmasında, 10 ədədi isə sərnişin daşınmasında istifadə olunacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.