CƏMİYYƏT
Əmək və Əhalinin Sosial Müdafiəsi Nazirliyində UNICEF-in regional direktoru ilə görüş olub
Bakı, 22 noyabr, AZƏRTAC
Əmək və Əhalinin Sosial Müdafiəsi Nazirliyində BMT Uşaq Fondunun (UNICEF) Mərkəzi və Şərqi Avropa, MDB ölkələri üzrə regional direktoru xanım Afşan Xanla görüş keçirilib.
Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, görüşdə ölkəmizin BMT-nin Cenevrə şəhərindəki bölməsində və digər beynəlxalq təşkilatlar yanında daimi nümayəndəsi Vaqif Sadıqov, UNICEF-in ölkəmizdəki nümayəndəliyinin rəhbəri Edvard Kavardin və nümayəndəliyin digər rəsmi şəxsləri iştirak ediblər.
Əmək və əhalinin sosial müdafiəsi naziri Səlim Müslümov görüş zamanı deyib: “Hazırda respublikada sosial təminat sistemi vasitəsilə sağlamlıq imkanları məhdud uşaqlara, müharibə əlillərinin, şəhid ailələrinin, aztəminatlı ailələrin, Çernobıl əlillərinin uşaqlarına, beşdən çox uşağı olan anaların uşaqlarına sosial ödənişlər həyata keçirilir. Eyni zamanda, sağlamlıq imkanları məhdud uşaqların sağlamlığının bərpası sahəsində məqsədyönlü işlər aparılır və bu işlərin davamı kimi, cari ildə nazirliyin Uşaq Bərpa Mərkəzində və Xüsusi Qayğıya Ehtiyacı olan Uşaqların Dövlət Reabilitasiya Müəssisəsində 3 min nəfərə yaxın uşağa bərpa müalicəsi xidmətləri göstərilib. Nazirliyin sağlamlıq imkanları məhdud uşaqlar üçün iki sosial xidmət müəssisəsində 330 nəfər uşaq daimi olaraq stasionar şəraitdə sosial xidmətlərlə təmin edilir. Sağlamlıq imkanları məhdud uşaqlar üçün həm reabilitasiya, həm də sosial xidmət müəssisələrində yüksək standartlara uyğun nümunəvi şərait yaradılıb”.
İcra olunan sosial xidmət layihələrinin və həmin layihələr çərçivəsində xidmət göstərilən şəxslərin, o cümlədən uşaqların sayının ildən-ilə əhəmiyyətli şəkildə artdığı diqqətə çatdırılıb. Nazir layihələr üzrə ölkənin ayrı-ayrı bölgələrində günərzi qayğı və icma əsaslı reabilitasiya mərkəzlərinin fəaliyyət göstərdiyini, eşitmə və nitq qabiliyyəti olmayan, habelə autizm sindromlu uşaqların, risk qrupundan olan uşaqların və ailələrinin reabilitasiya məqsədli sosial xidmətlərlə təmin edildiklərini diqqətə çatdırıb: “Priortet istiqamətlərdən biri də gələcəkdə həmin sosial xidmətlərin əhatə dairəsinin ölkənin bölgələrində sosial xidmətlərə ehtiyacları müəyyən edən sosial xəritələşmə əsasında genişləndirilməsidir. Digər tərəfdən, bu sahədə çalışan işçi heyətinin ixtisas səviyyəsinin yüksəldilməsi, sosial xidmətlər formatında reabilitasiya işinin keyfiyyətinin və növlərinin artırılması, yeni yanaşmalar, metodlar əsasında təkmilləşdirilməsi diqqətdə dayanan məsələlərdəndir”.
Nazir bu sahədə ötən dövrdə UNICEF-lə əməkdaşlıqda görülən işlərin əhəmiyyətini diqqətə çatdırıb: “2014-2015-ci illəri əhatə edən birgə Fəaliyyət Planımız “Uşaq qayğı sistemində islahatlar” üzrə birgə Tədbirlər Planının yerinə yetirilməsi, uşaqlarla bağlı sosial xidmətlər sisteminin təkmilləşdirilməsi və bu sahədə aparılan işlərin, eləcə də çətin həyat şəraitində olan uşaqların və onların ailələrinin sosial xidmətlərə çıxışının texniki dəstəklənməsi, müvafiq peşəkar kadr potensialının bilik və bacarıqlarının artırılması, uşaqlarla bağlı sosial xidmətlərə olan tələbatın və bu əsasda sosial sifarişlər üzrə prioritetlərin müəyyən olunması və s. istiqamətləri əhatə edib. Ötən il isə Əmək və Əhalinin Sosial Müdafiəsi Nazirliyi və UNICEF arasında 2016-2020-ci illərə dair Əməkdaşlıq Proqramı çərçivəsində “2016-2017-ci illər üçün Uşaq Müdafiəsi və Sosial Müdafiəyə dair Dövri Fəaliyyət Planı” imzalanıb. Bu sənəddə də uşaqlarla bağlı sosial xidmətlər sisteminin qabaqcıl dünya təcrübəsinə uyğun inkişaf etdirilməsinə dəstək məqsədilə vacib istiqamətlər əksini tapıb”.
Görüş zamanı qeyd olunub ki, ölkəmizdə sağlamlıq imkanları məhdud uşaqların və sosial təhlükəli vəziyyətdə olan yetkinlik yaşına çatmayanların reabilitasiyayönümlü sosial xidmətlərlə təminatı sisteminin təkmilləşdirilməsi işlərində bundan sonra da UNICEF-lə fəal əməkdaşlıq edilməsinə və əməkdaşlığı daim genişləndirməyə xüsusi əhəmiyyət veriləcək.
Xanım A.Xan Azərbaycanda uşaqların hərtərəfli təminatı, o cümlədən sağlamlıq imkanları məhdud uşaqların sosial müdafiəsi və reabilitasiyası, onların cəmiyyətə inteqrasiyası sahəsində aparılan işlərin UNICEF-in fəaliyyət prinsiplərinə uyğun olduğunu qeyd edib. O, ötən müddətdə Əmək və Əhalinin Sosial Müdafiəsi Nazirliyi və UNICEF arasında uğurlu əməkdaşlıq təcrübəsinin yarandığını, birgə fəaliyyətin qarşıdakı dövrdə də məqsədyönlü şəkildə davam edəcəyinə əminliyini bildirib.
Görüşdə uşaqlara yönələn sosial xidmətlər sisteminin təkmilləşdirilməsi sahəsində əməkdaşlığın gələcək istiqamətləri, Əmək və Əhalinin Sosial Müdafiəsi Nazirliyi və UNICEF arasında 2016-2020-ci illərə dair Əməkdaşlıq Proqramı çərçivəsində imzalanmış “2016-2017-ci illər üçün Uşaq Müdafiəsi və Sosial Müdafiəyə dair Dövri Fəaliyyət Planı”nın icra vəziyyəti və bu sənəd üzrə görüləcək işlər müzakirə olunub.