CƏMİYYƏT
Ölkədə sosial sabitliyin təmin olunmasında Ümummilli Liderin rolu əvəzolunmazdır
Bakı, 11 dekabr, AZƏRTAC
Dekabrın 11-də Əmək və Əhalinin Sosial Müdafiəsi Nazirliyində Azərbaycan xalqının ümummilli lideri Heydər Əliyevin vəfatının 15-ci ildönümü ilə əlaqədar anım mərasimi keçirilib.
AZƏRTAC xəbər verir ki, Ulu Öndərin əziz xatirəsinin bir dəqiqəlik sükutla yad edilməsi ilə başlayan tədbirdə bu dahi şəxsiyyətin həyat və fəaliyyətindən bəhs edən film nümayiş olunub.
Tədbiri giriş sözü ilə açan əmək və əhalinin sosial müdafiəsi nazirinin müavini Mətin Kərimli müasir dünyanın böyük siyasi şəxsiyyətlərindən biri olan ulu öndər Heydər Əliyevin Azərbaycanın hərtərəfli inkişafı, müstəqil Azərbaycan dövlətinin qurulması və ildən-ilə gücləndirilməsi üçün göstərdiyi xidmətlərindən danışıb: “Ötən əsrin 70-80-ci illərində yüksək əzmkarlığı və təşkilatçılıq qabiliyyəti, yorulmaz səyləri ilə respublikamızı həmin dövrdə keçmiş sovetlər birliyində qabaqcıl respublikalar sırasına çıxaran Ümummilli Lider 1982-1987-ci illərdə keçmiş SSRİ Nazirlər Soveti sədrinin birinci müavini kimi yüksək vəzifədə olarkən də Azərbaycanın inkişafı naminə əvəzolunmaz xidmətlər göstərib. 1993-cü ildə xalqın iradəsi ilə yenidən respublika rəhbərliyinə qayıdan ulu öndər Heydər Əliyev müstəqil dövlət quruculuğu kimi olduqca çətin və şərəfli tarixi vəzifəni də yüksək siyasi müdrikliklə həyata keçirib, müstəqil ölkəmizin ictimai-siyasi sabitlik şəraitində uzunmüddətli inkişafı üçün etibarlı əsaslar formalaşdırıb”.
M.Kərimli Azərbaycanın sosial dövlət konsepsiyasının müəllifi olan ulu öndər Heydər Əliyevin qəbul etdiyi qərarlar, imzaladığı fərman və sərəncamlar nəticəsində hələ ötən əsrin 90-cı illərində yeni iqtisadi münasibətlərə keçidlə bağlı islahatlar zamanı əhalinin sosial müdafiəsinin təmin edildiyini, sosial müdafiə sisteminin yaxşılaşdırılması üçün ciddi addımlar atıldığını bildirib. O, ölkədə sosial sabitliyin təmin olunması, həssas əhali qruplarının təminatının gücləndirilməsi istiqamətində ümummilli lider Heydər Əliyevin xidmətlərini qeyd edib.
Nazir müavini şəhid ailəsi üzvlərinin, müharibə iştirakçılarının, fiziki məhdudiyyətli insanların sosial vəziyyətinin yaxşılaşdırılmasına Ulu Öndərin xüsusi diqqət və qayğısından bəhs edib. Bildirilib ki, həssas qruplarla bağlı mühüm sosial proqramlara, o cümlədən şəhid ailələri və müharibə əlillərinin mənzillə, müharibə əlillərinin minik avtomobili ilə təminatına, fiziki məhdudiyyətli insanların qabiliyyət və istedadlarının tanıdılması üçün ümumrespublika tədbirlərinə ümummilli lider Heydər Əliyevin təşəbbüsü ilə başlandığını deyib. Ulu Öndərin müdrik və uzaqgörən siyasətinin Prezident İlham Əliyev tərəfindən uğurla davam etdirildiyini vurğulayan nazir müavini ölkəmizin bütün istiqamətlər üzrə əldə etdiyi nailiyyətləri diqqətə çatdırıb. O, eyni zamanda, Azərbaycanda güclü sosial siyasətin aparıldığını, sosial proqramların, aktiv məşğulluq tədbirlərinin miqyasının getdikcə genişləndiyini, sosial cəhətdən həssas qruplara dövlət qayğısının ildən-ilə artırıldığını bildirib.
Tədbirdə Azərbaycan Milli Elmlər Akademiyasının Qafqazşünaslıq İnstitutunun direktoru, Milli Məclisin deputatı Musa Qasımlı ümummilli liderimiz Heydər Əliyevin müasir müstəqil Azərbaycan dövlətinin qurulması və inkişafı sahəsində tarixi xidmətlərindən, Ulu Öndərin azərbaycançılıq ideologiyasından bəhs edib.
Digər çıxış edənlər Ümummilli Liderimizin bütün həyat və fəaliyyətini ölkəmizin inkişafına həsr etdiyini, bu məram naminə yorulmaz fəaliyyətini vurğulayıb, onun işıqlı xatirəsinin xalqımızın qəlbində əbədi yaşayacağını bildiriblər.