MƏDƏNİYYƏT
Əməkdar Rəssam İnna Kostinanın “Təsadüf” adlı fərdi sərgisi açılıb
Bakı, 14 aprel, AZƏRTAC
Aprelin 14-də Azərbaycan Xalça Muzeyində Əməkdar Rəssam İnna Kostinanın “Təsadüf” adlı fərdi sərgisi açılıb.
AZƏRTAC xəbər verir ki, açılış mərasimində sərginin əhəmiyyətindən danışan muzeyin direktoru və ICOM Azərbaycan Milli Komitəsinin sədri Şirin Məlikova ekspozisiyada rəssamın isti və soyuq batika texnikaları ilə yaratdığı “Simurq” və “Təsadüf” silsilələrindən olan rəsm nümunələrinin yer aldığını bildirib.
Qeyd edilib ki, İnna Kostinanın əsərlərində obrazların ifadəliliyi heyranedicidir. Rəssam 1990-cı illərin sonu – 2000-ci illərin ortalarınadək batika texnikası ilə “Simurq” mövzusunda silsilə əsərlər yaradıb. Simurq quşu fantastik obraz olmaqla türkdilli xalqların mifologiyasında çox məşhur varlıqdır. “Simurq” silsiləsi Azərbaycanın orta əsrlər miniatür sənətini və qotik kilsələrin monumental şəbəkələrini xatırladır. Bu, “Səmavi” sənətdir.
2016-cı ilin oktyabr ayında isə rəssamın “İstidir, qaqaş” adlı sərgisi keçirilib. İnna Kostina yaratdığı silsilə əsərlərində gündəlik həyatın reallığını qrotesk formada əks etdirir. Bu silsilədən olan rəsmlərdə qadın və kişi obrazları öz dolğun həyatlarını yaşayırlar. Ancaq bu həyat cismani varlığın yeknəsəq ritmlərinin alatoranlığında keçir.
Bu iki layihədən sonra İnna Kostinanın yaradıcılığında növbəti dönüş baş verir. Rəssam iki silsilədən olan elementləri birləşdirərək, “Təsadüf” adlı yeni batik silsiləsi yaradır. Burada mifoloji Simurq quşu yerə enərək, müasirlərimizin yaşadığı torpağa öz mistik enerjisini ötürür. Silsilədə Mif və Reallıq varlığın vahid axınında qovuşur.
Muzeyin direktoru diqqətə çatdırıb ki, batika sənəti dünyanın ən qədim tətbiqi sənət növlərindən biridir və müxtəlif texnikaları ilə seçilir. Azərbaycanda batika kəlağayı sənətində çox qədim dövrlərdə inkişaf edib. Azərbaycan Xalça Muzeyinin kolleksiyasında çox gözəl, əsrarəngiz kəlağayılar da toplanır. Təsadüfi deyil ki, “Təsadüf” adlı sərgi məhz Azərbaycan Xalça Muzeyində açılıb. Sərgi üçün Fəxriyyə Məmmədova tərəfindən film hazırlanıb. Muzey son vaxtlar təhsil proqramları ilə çıxış edir və İnna Kostina sərgi çərçivəsində batika üzrə ustad dərsləri keçəcək.
Azərbaycan Milli Elmlər Akademiyasının Memarlıq və İncəsənət İnstitutunun direktoru, AMEA-nın müxbir üzvü Ərtegin Salamzadə qeyd edib ki, hər dəfə İnna Kostinanın yaradıcılığının yeni bir tərəfi ilə rastlaşmaq mümkündür. Müxtəlif ifadə vasitələrilə həm özünün, həm də İnna Kostinanın eyni mövzuya – “Simurq” mövzusuna toxunduğunu deyən Ə.Salamzadə diqqətə çatdırıb ki, əslində Simurq böyük sirlərlə dolu obrazdır. Simurq haqqında əfsanə və miflər bütün türk dünyasında mövcuddur. İnna Kostinanın bu silsilədən olan əsərlərinə baxarkən insan havanı hiss edir. Bu əsərlərdə bir uçuş hissiyyatı var. Buna batika texnikasında nail olmaq, həqiqətən, hər rəssamın işi deyil. İnna Kostina 2013-cü ildə Özbəkistanda Daşkənd Biennalesində Azərbaycanı öz batika əsərləri ilə uğurla təmsil edib.
Azərbaycan Dövlət Mədəniyyət və İncəsənət Universitetinin tədris işləri üzrə prorektoru, Əməkdar İncəsənət Xadimi Validə Məmmədova deyib: “Rəssamın “Təsadüf” sərgisində yer alan əsərlərdə biz təsadüfü yox, həyatın məqamlarını görürük. Əsərlərə baxanda biz rəng çalarlığının müxtəlifliyini görürük. Rənglər bir-birinə təzad təşkil etsə də, kompozisiya daxilində vəhdət yaradır. Rənglərin seçimi, incə bənövşəyidən tutmuş tünd çalarlaradək – bu bizim yaşadığımız həyatdır. Bütün türk xalqlarında Simurq pozitiv, sabaha inam yaradan obrazdır. İnna Kostinanın əsərlərində o, müxtəlifdir. Bəzi şəkillərdə Simurq bakirədir, üzünü tutur, digər şəkillərdə isə mərd türk obrazıdır. Bu əsərlərdə sabaha inam görürük. İnna xanım həm də gözəl pedaqoqdur və sənətin sirlərini tələbələrinə ürəkaçıqlığı ilə öyrədir”.
İnna Kostina sərginin təşkilində əməyi olan hər kəsə təşəkkür edib.
Tədbir iştirakçıları sərgi ilə tanış olublar.
Rəssamın 48 ədəd batika nümunəsinin yer aldığı sərgi mayın 2-dək davam edəcək.