ELM VƏ TƏHSİL
Əməkdar Rəssam Mübariz Əkbərov metalişləmə sənətini yaşadan nadir sənətkarlardandır
Bakı, 28 noyabr, P.İmanova, AZƏRTAC
Noyabrın 28-də Azərbaycan Milli Elmlər Akademiyasının (AMEA) Nizami Gəncəvi adına Milli Azərbaycan Ədəbiyyatı Muzeyində metal üzərində işləmə sahəsində tanınmış sənətkar, Əməkdar Rəssam Mübariz Əkbərovun əsərlərindən ibarət “Gəncəli sənətkarın gözəllik dünyası” sərgisinin açılışı olub.
AZƏRTAC xəbər verir ki, tədbirdə muzeyin direktoru, akademik Rafael Hüseynov metalişləmə sənətinin Azərbaycanın ən qədim sənətlərindən biri olduğunu qeyd edib, metal üzərində bədii işləmənin tarixindən danışıb, onun gələcək nəsillərə çatdırılmasının vacibliyini vurğulayıb. Qeyd edilib ki, ki, bu gün dünyanın bir sıra məşhur muzeylərində Azərbaycanın qədim metalişləmə sənətinin köklərindən xəbər verən qiymətli əsərlər saxlanılır.
Akademik R.Hüseynov bildirib ki, M.Əkbərov metal üzərində işləmə sənətinin müasir dövrdə ən layiqli davamçılarındandır. Onun hazırladığı və milli ornamentlərlə bəzədilən müxtəlif silahlar, qılınc və xəncərlər, hərbi geyimlər, çeşidli aksesuarlar nəfisliyi ilə diqqəti cəlb edir. Sənətkarın yaratdığı bu qəbil silahlardan bir sıra bədii və sənədli filmlərin çəkilişində də istifadə olunub. O, metalişləmə sənəti üzrə ölkəmizdən kənarda tanınan mütəxəssisdir. Rəssamın əsərləri Türkiyə, Fransa, İngiltərə, Almaniya, Rusiya və digər ölkələrdəki sərgilərdə nümayiş etdirilib, onun dəyərli sənət nümunələri şəxsi kolleksiyalarda saxlanılır. M.Əkbərov unudulmaqda olan bu qədim sənəti yaşadan nadir sənətkarlardandır.
Akademik bildirib ki, əvvəlcə bu sərgi Şah İsmayıl Xətainin anadan olmasının 530 illiyinə həsr edilən “Xətainin qılıncı və qələmi” mövzusunda respublika konfransında nümayiş olunub və iştirakçılar tərəfindən maraqla qarşılanıb. Yaxın vaxtlarda isə rəssamın əsərlərinin fotoşəkillərindən ibarət albom nəşr olunacaq.
Professor Kubra Əliyeva, Xalq Rəssamı Ağəli İbrahimov, Əməkdar Rəssam Rais Rəsulzadə və digər çıxış edənlər Azərbaycanda metalişləmə sənətinin tarixi köklərindən, ölkəmizdə bu sənətin yaranmasından və inkişafından, qədim nümunələrindən, görkəmli rəssamın yaradıcılığından söz açıblar. Bildirilib ki, qədim Təbriz sənətkarlıq məktəbinin ən gözəl nümayəndələrindən olan Xalq Rəssamı Lətif Kərimovun Azərbaycana gəlişi bu sahədə bir sıra məşhur sənətkarların, o cümlədən M.Əkbərovun yetişməsinə səbəb olub. Bu rəssamların və M.Əkbərovun metalişləmə sənəti üzrə yaratdıqları dəyərli nümunələr hazırda dünyanın məşhur muzeylərini bəzəyir. Rəssamın milli ornament və naxışlarla bəzədilən əl işləri unikallığı ilə diqqət çəkir.
Yaradıcılığı barədə məlumat verən M.Əkbərov bədii metal üzrə işləmənin ölkəmizdə nadir sənətlərdən olduğunu deyib. Bildirilib ki, sərgidə əsasən Azərbaycanın qədim milli xəncər və qılınc nümunələri, qadın bəzək əşyaları, həmçinin ərəb, ispan, ingilis xəncərləri təqdim olunur. İlk sərgisinin Danimarkada təşkil olunduğunu deyən rəssam əsərlərinin dünyanın müxtəlif ölkələrində uğurla nümayiş edildiyini bildirib. O, əsərlərinin bir sıra dövlət başçılarına hədiyyə olunduğunu, həmçinin məşhur muzeylərdə və şəxsi kolleksiyalarda saxlanıldığını söyləyib.
Əməkdar Rəssam deyib ki, onun istedadını görən Xalq Rəssamı Lətif Kərimov rəssama bu sahədə çalışmağı tövsiyə edib.
M.Əkbərov tədbirin yüksək səviyyədə təşkilinə görə Ədəbiyyat Muzeyinin rəhbərliyinə və iştirakçılara minnətdarlığını bildirib.
Sonra tədbir iştirakçıları sərgi ilə tanış olublar. Sərgidə naxışlarla bəzədilmiş qılınc, xəncər, dəbilqə və digər nümunələr, həmçinin sənətkarın 60-dan çox əl işi nümayiş olunub. Burada rəssamın poladdan, gümüşdən və digər metallardan düzəldilən sənət nümunələri ilə yanaşı, dəri materiallardan istifadə ilə hazırlanan əl işləri də təqdim edilib.