DÜNYA
Amerikalılar Baydenin ABŞ-da inflyasiyaya qarşı mübarizə siyasətinə əvvəlki kimi tənqidi yanaşırlar
Vaşinqton, 14 mart, AZƏRTAC
“ABC News/Ipsos” tərəfindən “KnowledgePanel Ipsos”un məlumat bazasından istifadə etməklə aparılan yeni sorğunun nəticələrinə görə, amerikalıların böyük əksəriyyəti Ağ evin Rusiya neftinin idxalına qadağa qoyulması təklifini dəstəkləyirlər. Buna baxmayaraq, onlar Prezident Co Baydenin bütövlükdə iqtisadiyyatın bərpası məsələsinin və xüsusilə inflyasiyanın öhdəsindən necə gəlməsinə əvvəlki kimi çox tənqidi yanaşırlar.
AZƏRTAC xəbər verir ki, son bir neçə ay ərzində amerikalıların maliyyə baxımından rifah halı inflyasiyanın sürətlə artmasından ziyan çəkib və bu, şübhəsiz ki, Baydenin reytinqinə mənfi təsir göstərəcək. Amerikalıların 70 faizi onun inflyasiyaya qarşı mübarizə siyasətini bəyənmir.
Bundan başqa, “ABC News/Ipsos” sorğusuna əsasən, amerikalıların 58 faizi, - bu da 12 aylıq ən yüksək göstəricidir, - Bayden administrasiyasının ABŞ iqtisadiyyatının bərpası üzrə siyasətini bəyənmir. Cari ilin sonunda ABŞ Konqresinə aralıq seçkilər keçiriləcəyini nəzərə alsaq, bu, özlüyündə Bayden üçün siyasi problemdir. Bayden bir neçə ştatda elektoratın getdikcə artan məyusluğunun və xarici siyasət, o cümlədən Avropada müharibə problemlərinin öhdəsindən gəlməlidir.
Buna baxmayaraq, amerikalılar Baydenin Ukraynaya münasibətdə qəbul etdiyi addımları bəyənirlər: bəyənilmə və bəyənilməmə nisbəti 48 faizə qarşı 51 faiz təşkil edir. Sorğunun nəticələrinə görə, Ukraynada müharibənin başlanmasında kimin məsuliyyət daşıması barədə suala cavablarda orta hesabla hər beş nəfər amerikalıdan dördü müharibədə “günahın böyük hissəsi”ni Rusiya Prezidenti Vladimir Putində görür. Amerikalıların az bir qismi bu “günahın böyük hissəsi”ni Baydendə (16 faiz) və ya sabiq Prezident Donald Trampda (13 faiz) görürlər. Rəyi soruşulanların daha az hissəsi – 6 faizi məsuliyyətin çoxunu Ukrayna Prezidenti Volodimir Zelenskinin üzərinə qoyurlar.
Bununla belə, amerikalılar müharibənin genişlənməsi səbəbindən Baydenin baş xəbər lentində yer almayan başqa məsələlərin həllinə səmimiyyətlə yanaşırlar. Bütün ştatlarda maska taxılması və vaksinləmə tələbinin zəiflədiyi bir vaxtda Baydenin COVID-19 əleyhinə mübarizənin öhdəsindən gəlməsi ilə bağlı bəyənilmə reytinqi 56 faizə qalxıb, bu da yanvar ayı ilə müqayisədə 6 bənd yuxarıdır.
AZƏRTAC-ın Vaşinqton bürosu