İQTİSADİYYAT


Əmlak Məsələləri Dövlət Komitəsi: 17 dövlət əmlakına 28 sifariş verilib

Bakı, 20 avqust, AZƏRTAC

Əmlak Məsələləri Dövlət Komitəsi (ƏMDK) avqustun 20-də dövlət əmlaklarının özəlləşdirilməsi üzrə növbəti hərrac keçirib.

Komitədən AZƏRTAC-a bildirilib ki, hərracda iştirak üçün vətəndaşlar tərəfindən 17 dövlət əmlakı üzrə 28 sifariş verilib. Özəlləşdirilən dövlət əmlakları arasında kiçik dövlət müəssisəsi, yarımçıq tikililər, qeyri-yaşayış sahələri və nəqliyyat vasitələri var. Vətəndaşlardan 3-ü seçdiyi dövlət əmlakı üzrə sifarişi əlavə vaxt itirmədən elektron formada verib.

Budəfəki hərracda özəlləşdirilən əmlaklardan biri Cəlilabad rayonunun H.Əliyev prospektində yerləşir. Kiçik dövlət müəssisəsinin ümumi faydalı sahəsi 38,2 kvadratmetrdir. Paytaxt üzrə özəlləşdirilən qeyri-yaşayış sahəsi Nizami rayonu, B.Nuriyev küçəsindədir. Xidmət və ya ofis obyekti kimi istifadə üçün uyğun olan dövlət əmlakının ümumi faydalı sahəsi 76,2 kvadratmetr, son hərrac qiyməti isə 25 min manatdır. Hərracda sahibini tapan digər qeyri-yaşayış sahəsi isə Bərdə şəhərində yerləşir.

Cəlilabad rayonunun Privolnoye kəndində özəlləşdirilən yarımçıq tikilinin torpaq sahəsi isə 8 min kvadratmetrdir. Digər yarımçıq tikili isə rayonun Gülməmmədli kəndində yerləşir.

Nəqliyyat vasitələri üzrə keçirilən hərracda bu dəfə rəqabətli mühit müşahidə olunub. Belə ki, 11 avtomobil üzrə 22 sifariş qəbul edilib. Buraxılış tarixi 2007 olan nəqliyyat vasitəsinə ilkin qiymət 6 min manat təyin olunub. İştirakçılar arasında rəqabət dövlət əmlakının son hərrac qiymətini 7 min 900 manata yüksəldib.

Qeyd edək ki, Əmlak Məsələləri Dövlət Komitəsi tərəfindən növbəti hərrac avqustun 27-də keçiriləcək. Hərraca ümumilikdə 61 dövlət əmlakı çıxarılıb. Bunlardan 29-u kiçik dövlət müəssisəsi, 19-u səhmdar cəmiyyəti, 8-i nəqliyyat vasitəsi, 5-i isə qeyri-yaşayış sahəsidir. Dövlət əmlakları üzrə hərracda iştirak etmək istəyən şəxslər komitənin rəsmi saytı (emdk.gov.az) və Özəlləşdirmə portalına (privatization.az) daxil ola bilər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.