Bakı, 14 mart, AZƏRTAC

Əmlak Məsələləri Dövlət Komitəsi (ƏMDK) istifadəyə verdiyi elektron xidmətlər nəticəsində vətəndaşlar heç bir yerə getmədən, yalnız internet resursları və mobil telefonlar vasitəsilə sahib olduqları əmlaklar barədə lazım olan əməliyyatı həyata keçirmək imkanı əldə ediblər.

ƏMDK-dan AZƏRTAC-a bildirilib ki, komitə göstərilən 46 xidmətin 41-ni elektron müstəvidə yerinə yetirir və bunun sayəsində vətəndaş məmnunluğunu təmin etməklə istifadəçilərin sayı artıb. Vətəndaşlara, fiziki və hüquqi şəxslərə müxtəlif fəaliyyət istiqamətləri üzrə ümumilikdə 902 min elektron xidmət göstərilib. Ötən il ərzində isə elektron və onlayn xidmətlərdən istifadə edənlərin sayı 266 mindən çox olub. Statistikanın yüksək olmasının əsas səbəbi fəaliyyətdə şəffaflığın daha da artırılması, operativliyin təmin edilməsi, vətəndaş maraqlarının qorunmasıdır.

Qeyd etmək lazımdır ki, təqdim edilən 41 elektron xidmətdən 26-sı daşınmaz əmlakın qeydiyyatı, 10-u dövlət əmlakının özəlləşdirilməsi, 3-ü dövlət əmlakının idarə edilməsi və icarəsi, 2-si kadastr sahəsi ilə bağlıdır. Bu xidmətlərin 38-i interaktiv, 3-ü isə informativ xidmətlərdir.

Aparılan təhlillərdən məlum olur ki, istifadəçilərin böyük əksəriyyəti daşınmaz əmlakın qeydiyyatı ilə bağlı elektron xidmətlərə müraciət edir. Ümumilikdə daşınmaz əmlakın qeydiyyatı üzrə 26 elektron xidmətdən istifadə edənlərin sayı 150 mindən çox olub. Komitənin www.e-gov.az portalı üzərindən ən çox istifadə olunan elektron xidməti ipoteka əməliyyatlarının dövlət qeydiyyatı və ləğvi ilə bağlı xidmətlərdir. Həmin xidmətlərdən istifadə edənlərin sayı bütövlükdə 107 mini ötüb. Daha çox istifadə olunan xidmətlərdən biri də dövlət reyestrindən məlumatın verilməsi barədə elektron xidmətdir. İndiyədək həmin müraciət edənlərin sayı 20 minə yaxın olub.

Çıxarışların elektron qaydada alınması imkanları vətəndaşın marağını daha da artırıb. Artıq müvafiq əməliyyatı yerinə yetirərkən çıxarışın kağız versiyasını gətirməyə ehtiyac qalmır. Elektron çıxarışa sahib olan vətəndaşlar üçün yaradılan xidmətlə onlar öz sənədlərinin həqiqiliyini onlayn qaydada yoxlaya bilirlər. Bunun üçün isə istifadəçilərdən heç bir ödəniş tələb olunmur. Xidmət ödənişsiz olaraq yerinə yetirilir. Vətəndaşlar Elektron Hökumət Portalına (http://e-emdk.gov.az/eemdk/az/CheckElectronExtract) daxil olaraq çıxarışın qeydiyyat və reyestr nömrələrini qeyd etməklə sənədin düzgünlüyünü yoxlamaq imkanına malikdirlər. Hazırda 10 minə yaxın elektron çıxarış sahibi var.

Bundan başqa indi ölkə vətəndaşları, fiziki və hüquqi şəxslər əmlakla bağlı kadastra dair dövlət rüsumu və xidmət haqqını onlayn qaydada hesablaya bilirlər. “Kadastr kalkulyatoru” vasitəsilə yaradılan imkanlar vətəndaşın işini xeyli rahatlaşdırıb.

Həmçinin vətəndaşın özəlləşmədə iştirakını sadələşdirən elektron hərracın tətbiqi də investor kütləsinin artmasına imkan verib. Hərraclarda qeydiyyatdan keçmək, sifariş vermək elektron qaydada yerinə yetirilir. Qeyd edilməlidir ki, ümumilikdə 30-dan çox elektron hərrac keçirilib, 950-yə yaxın elektron sifariş qəbul olunub.

Komitənin onlayn xidmətləri də bu sahədə rahatlığı və operativliyi kifayət qədər artırıb. Belə ki, vətəndaşlar daşınmaz əmlakın yüklülüyünə dair arayışları (Forma-1) notariuslarda onlayn rejimdə əldə edirlər. Bundan ötrü ərazi qeydiyyat idarələrinə müraciət etməyə ehtiyac yoxdur. Yaradılan imkanlar nəticəsində həmin arayışı almaq istəyənlərin sayı 725 minə qədər artıb.

Əmlak Məsələləri Dövlət Komitəsi əmlak idarəçiliyi sahəsində göstərilən bütün xidmətləri tam olaraq elektronlaşdıracaq.