REGİONLAR
Əmlak Məsələləri Dövlət Komitəsinin sədri Yardımlıda vətəndaşları qəbul edib VİDEO
Bakı, 26 may, AZƏRTAC
Azərbaycan Respublikası Prezidentinin tapşırıqlarına uyğun olaraq, Əmlak Məsələləri Dövlət Komitəsinin sədri Kərəm Həsənov mayın 26-da Yardımlıda növbəti vətəndaş qəbulu keçirib. Komitə sədri Yardımlı, Masallı, Cəlilabad və Biləsuvar rayonlarından olan vətəndaşların müraciətlərinə baxıb.
Komitədən AZƏRTAC-a bildirilib ki, qəbulda müxtəlif sosial təbəqədən və yaş həddindən olan vətəndaşların əksəriyyəti daşınmaz əmlakın qeydiyyatına aid müraciətlərini çatdırıblar. Müraciətlər fərdi həyət evi, mənzillər, sovet dövründə kolxoz və ya sovxozlar tərəfindən verilmiş həyətyanı torpaq sahələrinə çıxarış, texniki pasport və digər sənədlərin alınması ilə bağlı olub. Eyni zamanda, bir sıra müraciətlər pay torpaqlarının, kənd təsərrüfatı təyinatlı torpaqların dövlət reyestrində qeydiyyatı ilə bağlı olub. Bir neçə vətəndaş dövlət əmlakının özəlləşdirilməsi və icarəsi ilə bağlı müraciət edib. Bir sıra müraciətlər isə torpaqların təyinatına və hüquqi rejiminə uyğun istifadəsi barədə olub.
Həmçinin vətəndaşlar işlə təmin olunma və digər məsələlərlə bağlı kömək göstərilməsi barədə xahişlərini də çatdırıblar.
Qəbulda səsləndirilən bir sıra müraciətlərin dərhal həlli üçün komitə sədri tərəfindən göstərişlər verilib. Araşdırılması zəruri olan müraciətlər isə qeydiyyata alınıb. Komitənin səlahiyyətinə aid olmayan müraciətlərin isə aidiyyəti üzrə çatdırılacağı vətəndaşlara bildirilib.
Komitə sədri fəaliyyət sahələri üzrə göstərilən xidmətlərdə məmnunluğun və çevikliyin artırılması məqsədilə bütün zəruri tədbirlərin görüldüyünü diqqətə çatdırıb. Mütəmadi olaraq “Kütləvi çıxarış” kampaniyası və mobil ofis xidmətlərinin, daşınmaz əmlakın və torpaq sahələrinin qeydiyyatı və idarəçiliyi ilə bağlı “bir pəncərə” sisteminin tətbiq edildiyini və vətəndaşlara təmənnasız maarifləndirmə tədbirləri olan hüquqi məsləhət xidmətlərinin göstərildiyini vurğulayıb.
Torpaq idarəçiliyi və uçotu barədə məsələlər barədə məlumat verilib. Müvafiq qanunvericiliyə əsasən, torpaqların hüquqi rejiminə və kateqoriyasına uyğun istifadəsi vurğulanıb. Dövlət başçısı tərəfindən imzalanmış müvafiq Fərmana əsasən, Torpaqların Elektron Uçotu İnformasiya Sistemi yaradılması barədə məlumat verilib. Bildirilib ki, bu tədbirlərin məqsədi torpaqların vahid elektron uçotunu aparmaq, faktiki və sənəd uyğunsuzluqlarını aradan qaldırmaq və ondan daha səmərəli istifadəni təmin etməkdir.
Qəbul günü birbaşa müraciət edən vətəndaşların da komitə sədri tərəfindən müraciətlərinə baxılıb və həlli istiqamətində zəruri tapşırıqlar verilib.