Əmman, 25 fevral, AZƏRTAC

Azərbaycanın İordaniyadakı səfirliyində Xocalı soyqırımının 23-cü ildönümünə həsr edilən anım tədbiri keçirilib.

Tədbirdə İordaniyanın dövlət və hökumət rəsmiləri, parlamentin yuxarı və aşağı palatalarındakı Dostluq və Qardaşlıq cəmiyyətlərinin rəhbərləri, diplomatlar, universitet rektorları, İordaniya-Azərbaycan Dostluq Cəmiyyətinin üzvləri, Azərbaycan diasporunun nümayəndələri, səfirliyin əməkdaşları iştirak ediblər.

Səfir Sabir Ağabəyov Ermənistan-Azərbaycan, Dağlıq Qarabağ münaqişəsinin tarixindən danışaraq, erməni təcavüzü nəticəsində torpaqlarımızın 20 faizinin işğal edildiyini və bununla da bir milyondan artıq insanın öz yurdundan didərgin düşdüyünü bildirib. Xocalıda dinc əhaliyə qarşı törədilmiş vəhşilikdən bəhs edən səfir onların amansızcasına qətlinin bütün bəşəriyyətə qarşı cinayət olduğunu vurğulayıb. Səfir işğal edilmiş Azərbaycan torpaqlarının qeyd-şərtsiz azad edilməsi haqqında beynəlxalq təşkilatlar tərəfindən bir neçə qətnamənin qəbul edildiyini diqqətə çatdırıb. O, İordaniya Senatı tərəfindən Xocalı soyqırımına dair qəbul edilmiş bəyanata görə Azərbaycan Hökumətinin və xalqının təşəkkürünü çatdırıb, yaxın vaxtlarda parlamentin aşağı palatası tərəfindən də müvafiq qərarın qəbul ediləcəyinə ümidvar olduğunu bildirib. Diplomat Ermənistan-Azərbaycan, Dağlıq Qarabağ münaqişəsinin həllində Azərbaycanın haqlı mövqeyini dəstəklədiyinə görə Kral II Abdullaha və İordaniya xalqına təşəkkür edib.

Tədbirdə çıxış edən İordaniya Senatındakı İordaniya-Azərbaycan Qardaşlıq Cəmiyyətinin sədri senat Mirvan Hammud, İordaniya-Azərbaycan Dostluq Cəmiyyətinin idarə heyətinin üzvü Saleh Ruşeydat, İordaniya Nümayəndələr Palatasındakı Azərbaycan-İordaniya Dostluq Cəmiyyətinin sədri Hazim Qaşu Xocalı soyqırımının dünya tarixində ən kədərli və hüznlü tarix kimi qeyd edildiyini bildiriblər. Onlar Xocalı faciəsini bəşəriyyətə qarşı törədilmiş cinayət kimi qiymətləndiriblər. Bildiriblər ki, İslam Konfransı Təşkilatı Parlament İttifaqı Şurasının 9-cu iclası zamanı qəbul edilmiş qətnamənin 3-cü bəndində qeyd edilir ki, İKT Pİ-yə üzv parlamentlər erməni silahlı qüvvələri tərəfindən Azərbaycan Respublikasının Xocalı şəhərində dinc azərbaycanlı əhaliyə qarşı törədilmiş kütləvi qırğını “insanlığa qarşı törədilmiş cinayət” kimi tanıyır. Xocalı soyqırımının Ermənistan-Azərbaycan, Dağlıq Qarabağ münaqişəsi ərzində törədilmiş cinayətlərin ən dəhşətlisi olduğu bildirilərək, münaqişə nəticəsində torpaqlarımızın 20 faizinin Ermənistan tərəfindən işğal edildiyi diqqətə çatdırılıb. Azərbaycan xalqının ümummilli lideri Heydər Əliyevin təşəbbüsü ilə 1994-cü ildən başlayaraq Xocalı soyqırımı barədə həqiqətlərin dünya ictimaiyyətinə çatdırılması məqsədilə sistematik işlərin görüldüyü vurğulanıb.

İordaniyanın tanınmış yazıçı-publisisti və jurnalisti Ömər Əl-Armuti Azərbaycanın müstəqilliyini bərpa etməsindən sonra əldə etdiyi uğurlar barədə danışıb. O, Ermənistan-Azərbaycan, Dağlıq Qarabağ münaqişəsinin tarixi barədə tədbir iştirakçılarını məlumatlandıraraq Xocalı faciəsindən və məhv edilmiş bu şəhərin əhalisinin qəddarlıqla qətlə yetirilməsindən bəhs edib, faktlar və statistik göstəriciləri öz kitabında əks etdirdiyini tədbir iştirakçılarının diqqətinə çatdırıb.

BMT-nin sülhməramlı səfiri Ğazi Əl-Tayyib Xocalı soyqırımına ədalətli qiymət verilməsi üçün dünya ictimaiyyətinin daha çox məlumatlandırılmasının, bu faciədə rolu olanların cinayət məsuliyyətinə cəlb edilməsinin zəruriliyini qeyd edib.

İordaniya-Azərbaycan Dostluq Cəmiyyətinin Azərbaycanlı Qadınlar Komitəsinin sədri Zümrüd Dadaşova Xocalı həqiqətləri barədə söhbət açıb.

Tədbirdə Heydər Əliyev Fondu tərəfindən Xocalı soyqırımı haqqında ingilis dilində hazırlanmış qısametrajlı film nümayiş etdirilib.

Bununla yanaşı, səfirliyin əsas zalında İordaniyanın tanınmış tarixçisi, yazıçı-publisist Ömər Əl-Armutinin “Dağlıq Qarabağ münaqişəsi və beynəlxalq hüquq” adlı kitabının təqdimatı olub.

Daha sonra səfirliyin əsas zalında sərgi təşkil edilib, tədbir iştirakçılarına müxtəlif foto və videomateriallar nümayiş etdirilib, yeni nəşr olunan “Dağlıq Qarabağ və beynəlxalq hüquq” kitabı və digər çap materialları paylanıb.

Azərbaycanın insan hüquqları üzrə müvəkkili Elmira Süleymanovanın Xocalı soyqırımının 23-cü ildönümü ilə əlaqədar bəyanatı, Qafqaz Müsəlmanları İdarəsinin sədri şeyxülislam Allahşükür Paşazadənin soyqırımının 23-cü ildönümü ilə bağlı dünya liderlərinə, parlamentlərə, beynəlxalq təşkilatlara və İnsan Hüquqları üzrə Avropa Məhkəməsinə ünvanlanmış müraciəti Xarici İşlər Nazirliyinə, həmçinin digər nazirliklərə, ölkədə akkreditə olunmuş səfirliklərə və beynəlxalq təşkilatlara göndərilib.

Asya Hacızadə

AZƏRTAC-ın xüsusi müxbiri

Əmman