CƏMİYYƏT


“Amnesty International”ın Şərqi Avropa və Mərkəzi Asiya Regional İdarəsinin direktoru Azərbaycanın Baş prokuroruna rəsmi məktub ünvanlayıb

Bakı, 11 noyabr, AZƏRTAC

Bu il noyabrın 5-də insan hüquqları sahəsində dünyanın aparıcı təşkilatlarından olan “Amnesty International”ın Şərqi Avropa və Mərkəzi Asiya Regional İdarəsinin direktoru xanım Marie Struthers Azərbaycan Respublikasının Baş prokuroruna rəsmi məktub ünvanlayıb.

Baş Prokurorluğun mətbuat xidmətindən AZƏRTAC-a verilən məlumata görə, Marie Struthers Baş prokuror Kamran Əliyevin “Amnesty International”ın “Ermənistan/Azərbaycan: Mülki əhali qadağan edilmiş kaset bombalarının istifadəsindən qorunmalıdır” hesabatında Ermənistan silahlı qüvvələri tərəfindən törədilmiş cinayət hadisələrinin tam əks olunmaması ilə bağlı 2020-ci il 5 oktyabr tarixli məktubunda ifadə etdiyi narahatlığa və təşkilatın fəaliyyətini yaxından izlədiyinə görə öz təşəkkürünü bildirib.

Eyni zamanda, “Amnesty International” təşkilatı tərəfindən həqiqətən də Gəncə şəhər sakinlərinə qarşı ballistik raketlərdən və raket artilleriya yaylım atəş sistemlərindən, Bərdə rayonunun isə “claster” (kaset) bombalarından istifadə edilməklə müxtəlif tarixlərdə atəşə tutulması faktlarının da qeydə alınması məktubda göstərilib.

Xanım Marie Struthers vurğulayıb ki, “Amnesty International” silahlı münaqişənin qərəzsiz izlənməsini təmin etmək üçün hər cür səy göstərərək iştirak edən bütün tərəfləri beynəlxalq humanitar hüquqa tam riayət etməyə və mülki insanları qorumağa çağırır.

Bu noyabrın 9-da Baş prokuror “Amnesty International” təşkilatına növbəti dəfə məktub ünvanlayaraq Dağlıq Qarabağ münaqişəsi ilə əlaqədar 2020-ci il oktyabrın 5-dən sonra qeydə alınmış cinayət faktlarını xanım Marie Struthersin diqqətinə çatdırıb. Belə ki, Baş prokuror Ermənistanın hərbi siyasi rəhbərliyi və diasporu tərəfindən xarici ölkələrin vətəndaşları olan erməni əsilli, özlərini “könüllülər” adlandıran muzdluların Azərbaycan Respublikasının ərazisində döyüş əməliyyatlarında iştirak etmələri üçün dəvət edilməsi və maliyyələşdirməsinin müəyyən edilməsi, həmin faktlarla bağlı Baş Prokurorluğun İstintaq İdarəsində Cinayət Məcəlləsinin müvafiq maddələri ilə cinayət işlərinin başlanılması barədə məlumatlandırmaqla, həmin muzdluların adlı siyahısını məktuba əlavə edib. Həmçinin diqqətə çatdırılıb ki, hazırkı vaxtadək “Skad” və “Smerç” raket qurğularından yalnız döyüş meydanında deyil, eləcə də mülki şəxslərə qarşı istifadə edilib, həmin faktlar “Human Rights Watch” və “Amnesty İnternational” təşkilatları tərəfindən də qeydə alınmaqla “qəddar və ağılasığmaz” kimi qiymətləndirilib. Belə ki, “Skad” raket qurğusundan Azərbaycanın ikinci böyük şəhəri, yarım milyon əhalisi olan və münaqişə zonasından 100 kilometrdən artıq məsafədə yerləşən Gəncə şəhəri gecə vaxtı oktyabrın 5-də, 8-də, 11-də və 17-də atəşə tutulub və nəticədə 26 nəfər mülki şəxs həlak olub, 143 nəfər isə yaralanıb.

Oktyabrın 27-də və 28-də Ermənistan silahlı qüvvələri tərəfindən “Smerç” tipli ballistik raket qurğularından münaqişə zonasından kənarda yerləşən və 30 min əhalisi olan Bərdə şəhərinin atəşə tutulması nəticəsində ümumilikdə 26 nəfər şəxsin həlak olması, aralarında Qızıl Aypara Cəmiyyətinin könüllüsü də daxil olmaqla 90 nəfərin yaralanması barədə də xanım Marie Struthers məlumatlandırılıb.

Noyabrın 7-də 16 yaşlı Şahmalı Rəhimovun Bərdə rayonuna növbəti mərmi atılması nəticəsində həlak olması və bununla da həlak olan mülki şəxslərin sayının 93 nəfərə çatması vurğulanıb.

Qeyd edilib ki, Ermənistan həm döyüş meydanında, həm də münaqişə zonasından kənarda yerləşən Tərtər, Ağcabədi və Goranboy rayonlarını qadağan edilmiş və son dərəcə təhlükəli olan fosfor bombalarından 5 dəfə istifadə etməklə müxtəlif vaxtlarda atəşə tutub.

Xüsusilə vurğulanıb ki, Azərbaycan Ordusu tərəfindən heç bir vaxt mülki dinc əhali hədəfə alınmayıb.

Baş prokuror, həmin cinayət əməllərinə dair ətraflı foto və videomaterialları təqdim etməklə, göstərilən faktların “Amnesty International” təşkilatının gələcək bəyanat və hesabatlarında qeyd edilməsini xahiş edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.