Bakı, 25 fevral, AZƏRTAC

Xocalı faciəsinin 28-ci ildönümü ilə əlaqədar paytaxtın Xətai rayonundakı “Ana harayı” abidəsinin yerləşdiyi parkda hazırlıq işləri yekunlaşıb. Artıq bu gündən insanlar abidəni ziyarət etməyə başlayıblar.

AZƏRTAC xəbər verir ki, abidənin yerləşdiyi parkda müxtəlif naxış formalarını özündə əks etdirən çoxlu gül və bəzək kolu əkilib. Həmçinin Yusif Səfərov küçəsi və Xocalı prospektində yaşıllıq örtüyü yenilənib, rəngarəng güllər və dekorativ kollar əkilib.

Parkın ərazisini əhatə edən yaşayış binaları və inzibati obyektlərin fasadlarında Xocalı faciəsini əks etdirən fotobannerlərin quraşdırılması həyata keçirilib. Bununla yanaşı, anım günü ilə bağlı ziyarətçilərin gediş-gəlişini rahat təmin etmək məqsədilə parkın ətrafında da abadlıq işləri görülüb.

İnsanlar soyqırımı qurbanlarını ziyarət etməyi vətəndaşlıq borcu hesab edirlər. Bu məkanı ziyarət edənlər arasında qanlı qətliamın şahidləri, şəhid ailələri, məktəblilər, veteranlar da var. Onlar faciədən 28 il ötməsinə baxmayaraq, 26 fevral gününü eyni ağrı-acı ilə yad edirlər.

Qeyd edək ki, Azərbaycan xalıqının qan yaddaşı olan Xocalı soyqırımına həsr olunan “Ana harayı” abidə kompleksi 1993-cü ildə inşa edilib. Hər il fevralın 26-da Xocalı soyqırımının ildönümü ilə əlaqədar abidəni minlərlə insan ziyarət edir.

Xatırladaq ki, 1992-ci il fevralın 25-dən 26-na keçən gecə erməni təcavüzkarları Azərbaycanın Xocalı şəhərində bəşəriyyət tarixində ən qanlı faciələrlə bir sırada duran soyqırımı törədiblər. Bu faciədən 28 il keçir. Həmin kütləvi qırğın nəticəsində 106-sı qadın, 63-ü uşaq, 70-i qoca olmaqla 613 nəfər amansızlıqla qətlə yetirilib. 487 nəfər şikəst olub, 1275 dinc sakin girov götürülüb, onlardan 150 nəfərin taleyi hələ də məlum deyil. Bu soyqırımı aktı nəticəsində 8 ailə tamamilə məhv edilib, 25 uşaq hər iki valideynini itirib.

Hər il dünya azərbaycanlıları və ədaləti uca tutanlar Xocalı soyqırımı qurbanlarının xatirəsini anırlar.