CƏMİYYƏT


Ana, sentyabrın 28-i tarixini unutma...

Bakı, 28 sentyabr, AZƏRTAC

Bu gün Vətən müharibəsinin gənc qəhrəmanlarından olan Cəbrayıl Dövlətzadənin şəhadətə yüksəlməsindən bir il ötür. Əslən Zəngilan rayonundan olan Cəbrayıl Dövlətzadə 2001-ci il sentyabrın 11-də Sumqayıt şəhərində anadan olub. Cəbrayıl da minlərlə gənc kimi işğaldan azad edilmiş torpaqları görmədən onun uğrunda canını verənlərdəndir...

Cəbrayıl Dövlətzadənin ən böyük arzusu hərbçi olmaq, əsasən də xüsusi təyinatlı qüvvələrin mənsubu olmaq idi.

Vətən müharibəsi başlayanda Cəbrayıl Dövlətzadə bir ilə yaxın idi ki, Sərhəd Qoşunlarının sıralarında Cəlilabad rayonunda yerləşən "N" saylı hərbi hissəsində müddətli həqiqi hərbi xidmətdə idi. O, ölkəmizin ərazi bütövlüyünün bərpa olunması üçün başlanan Vətən müharibəsi zamanı Murovdağ istiqamətində gedən döyüşlərdə xüsusi təyinatlıların tərkibində savaşıb. C.Dövlətzadə sentyabrın 28-də Murovdağ döyüşləri zamanı Kəlbəcər rayonu ərazisində şəhid olub. II Fəxri xiyabanda dəfn olunub.

Azərbaycanın ərazi bütövlüyünün bərpa edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin müvafiq sərəncamları ilə Cəbrayıl Dövlətzadə ölümündən sonra “Azərbaycan Bayrağı” ordeni, “Vətən uğrunda”, “Kəlbəcərin azad olunmasına görə” medalları ilə təltif edilib.

Cəbrayıl Dövlətzadənin nənəsi Əminə Məmmədzadə AZƏRTAC-a nəvəsi haqqında danışarkən kövrəlir. Niyə də kövrəlməsin, 19 illik ömrünə yaşından böyük qəhrəmanlıq sığdırmışdı axı nəvəsi...

“Cəbrayıl uşaqlığından qəhrəman olub. Heç kimlə mübahisə, dava edən deyildi. Lakin haqqın və zəiflərin yanında olurdu. Kiçik yaşlarından “elə bir əsgər olacağam ki, düşmənlərimizə qan udduracağam, mənimlə fəxr edəcəksiniz” deyirdi. Böyüdü, xalqın qəhrəmanı oldu.

Müharibə başlayanda bir ilə yaxın idi ki, hərbi xidmətdə idi. 19 yaşı da yenicə olmuşdu. Hələ iyul ayında general-mayor Polad Həşimovun şəhid olduğunu eşidəndə çox qəzəblənmişdi. General-mayorun qisasını almağı qarşısına məqsəd qoymuşdu. Vətən müharibəsinin başlanması sanki onun arzusuna çatması üçün bir imkan oldu. Öz istəyi ilə döyüş bölgəsinə yollanıb. Sentyabrın 28-də anası ilə əlaqə saxlayaraq deyib ki, bugünkü tarixi unutma. Elə o tarixi nəinki biz, Azərbaycan xalqı unutmayacaq. Uzun müddət cüdo ilə məşğul olmuşdu. Hərbçi olmaq, xüsusi təyinatlı qüvvələrin üzvü olmaq istəyirdi. İki arzusuna da çatdı, xüsusi təyinatlı qüvvələrin tərkibində döyüşdü, əlbəyaxa döyüşə girərək ermənilərin generalını, polkovnikini boğaraq öldürdü. Şəhid general-mayorun qisasını ala bildi. Özü də ən uca zirvəyə yüksəldi. Elə bir nəvəni, oğulu itirmək çox ağrılıdır. Lakin Cəbrayıl elə bir iz qoyub getdi ki, ondan əsrlər boyu danışılacaq. Nəvəmlə fəxr edirəm”, - deyə Əminə xanım qürurla deyir.

Bu gün Vətən uğrunda canından keçənlərin məzarları xalqımız üçün ziyarətgaha çevrilib. Cəbrayıl Dövlətzadənin məzarı da tər çiçəklərlə örtülmüşdü. Başdaşından boylanan məğrur baxışlarında isə 19 illik şərəfli ömrünün əksi var idi...

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.