CƏMİYYƏT


Anım Günü ilə bağlı Xəzər rayonunda silsilə tədbirlər keçirilib

Bakı, 27 sentyabr, AZƏRTAC

Sentyabrın 27-də Anım Günü ilə bağlı Xəzər rayonunda silsilə tədbirlər keçirilib.

AZƏRTAC xəbər verir ki, əvvəlcə Xəzər rayonu, Buzovna qəsəbəsindəki Şəhidlər xiyabanında anım tədbiri keçirilib.

Tədbirdə Xəzər Rayon İcra Hakimiyyətinin başçısı Elşən Salahov, Milli Məclisin deputatı Soltan Məmmədov, hüquq-mühafizə orqanlarının, ictimai birliklərin rəhbərləri, şəhid ailələrinin üzvləri, Vətən müharibəsi iştirakçıları, qazilər, din xadimləri və ictimaiyyət nümayəndələri iştirak ediblər.

Tədbir iştirakçıları şəhidlərin məzarlarını ziyarət edib, önlərinə gül dəstələri düzüblər. Şəhidlərimizin ruhlarına dualar oxunub, xatirələri ehtiramla yad edilib.

XXX

Vətən müharibəsi şəhidlərinin dəfn olunduğu Binə qəsəbəsindəki Şəhidlər xiyabanında da anım tədbiri keçirilib.

Əvvəlcə şəhidlərimizin əziz xatirəsi bir dəqiqəlik sükutla yad edilib.

Daha sonra Xəzər Rayon İcra Hakimiyyətinin başçısı Elşən Salahov çıxış edərək təcavüzkar Ermənistanın təxribatlarına cavab olaraq Azərbaycanın öz ərazi bütövlüyünün bərpası və tarixi torpaqlarımızın işğaldan azad edilməsi naminə başladığı Vətən müharibəsindən bəhs edib. Qeyd edib ki, qazanılan şanlı Qələbə xalqımızın birliyi, həmrəyliyi, rəşadətli Azərbaycan Ordusunun əsgər və zabitlərinin misilsiz qəhrəmanlıqları nəticəsində əldə edilib.

O bildirib ki, Müzəffər Ali Baş Komandanın müdrik sərkərdəlik məharəti, hücum diplomatiyası sayəsində əldə olunan bu Zəfər dövlətçilik tariximizdə bənzəri olmayan hadisədir.

Tədbirdə çıxış edən deputat Soltan Məmmədov şəhidlərimizin keçdikləri şərəfli döyüş yollarından və dövlətimiz tərəfindən şəhid ailələrinə göstərilən yüksək diqqət və qayğıdan geniş söz açıb. Deputat bildirib ki, Vətən müharibəsi Azərbaycan gənclərində, torpaq, Vətən sevgisinin nə qədər böyük olduğunu bir daha nümayiş etdirdi, xalqımız Ali Baş Komandan İlham Əliyevin ətrafında yumruq kimi birləşdi və xalqımızın 30 illik həsrətinə son qoyuldu.

Tədbirdə Azərbaycan Yazıçılar Birliyinin Xəzər rayon bölməsinin sədri Arif Buzovnalı, Azərbaycan Respublikası Şəhid ailələrinə “Qayğı” Cəmiyyətinin sədri Müşviq Əliyev və digərləri çıxış edərək 44 gün davam edən Vətən müharibəsinin məhz igid, qəhrəman oğullarımızın fədakarlığı sayəsində tarixi Qələbəmizlə başa çatdığını qeyd ediblər.

Tədbirdə Vətən Müharibəsi Qəhrəmanı şəhid Mansurov Elçinin anası Məleykə xanım Məcidova, şəhid Cabbarov Şahgündüzün atası Habil Cabbarov çıxış edərək Vətən müharibəsində xüsusi şücaət göstərərək şəhid olanların ailə üzvlərinə və qazi olanlara dövlət tərəfindən göstərilən diqqət və qayğıya görə Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevə, Birinci vitse-prezident Mehriban Əliyevaya minnətdarlıqlarını bildiriblər.

Tədbirin davamında Azərbaycan Yazıçılar Birliyinin Xəzər rayon bölməsinin üzvləri tərəfindən Vətən müharibəsi şəhidlərinin xatirəsinə şeirlər səsləndirilib.

Sonra şəhidlərin məzarları üzərinə gül dəstələri düzülərək ruhlarına dualar oxunub, şəhidlərin xatirəsinə ehtiram ifadəsi olaraq xiyabanda ağacəkmə aksiyası keçirilib.

XXX

Tədbirlər çərçivəsində Xəzər rayonu, Mərdəkan qəsəbəsində yerləşən Şəhidlər parkında şəhidlərin xatirəsinə ucaldılmış bulaq kompleksinin açılış mərasimi keçirilib.

Mərasimdə 44 günlük Vətən müharibəsində şanlı Qələbə qazanan Azərbaycan Ordusunun şəhidlərinin qanının yerdə qalmadığı, Prezident, Müzəffər Ali Baş Komandan İlham Əliyevin rəhbərliyi ilə torpaqlarımızın işğaldan azad edildiyi və qazanılan böyük Qələbənin tarixi əhəmiyyəti xüsusi qeyd edilib.

XXX

Daha sonra Vətən müharibəsi şəhidlərinin xatirəsinə ağacəkmə aksiyası keçirilib.

Xəzər rayonu, Mərdəkan qəsəbəsi, Mərdəkan-Qala avtomobil yolunun sol hissəsində baş tutan aksiyada Vətən müharibəsi şəhidlərinin xatirəsinə ümumilikdə 500 ədəd müxtəlif növ ağac əkilib, ağaclara aqrotexniki qulluq göstərilib.

Ağacəkmə aksiyası bitdikdən sonra RİH başçısı E.Salahov, deputat S.Məmmədov və digər tədbir iştirakçıları şəhidlərin ailə üzvləri ilə görüşərək onların problemləri, qayğıları ilə maraqlanıblar.

XXX

Anım günü münasibətilə tədbir iştirakçıları tərəfindən rayonun Türkan və Zirə qəsəbələrində dəfn olunan şəhidlərin məzarları ziyarət edilib, üzərilərinə gül dəstələri düzülüb, şəhidlərimizin ruhlarına dualar oxunub, xatirələri ehtiramla yad edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.