İQTİSADİYYAT


Aqrar Ticarət Şirkəti ilə Nar istehsalçıları və İxracatçıları Assosiasiyası əməkdaşlıq memorandumu imzalayıblar  YENİLƏNİB

Bakı, 2 oktyabr, AZƏRTAC

Oktyabrın 2-də Kənd Təsərrüfatı Nazirliyi nəzdində Dövlət Aqrar Ticarət Şirkəti ilə Azərbaycan Nar istehsalçıları və İxracatçıları Assosiasiyası arasında əməkdaşlıq memorandumu imzalanıb.

AZƏRTAC xəbər verir ki, memorandumun imzalanmasında məqsəd Dövlət Aqrar Ticarət Şirkətinin layihəsi olan "Kənddən şəhərə" şəbəkələrində assosiasiyanın üzvü olan fermerlərin məhsullarının satışını həyata keçirmək və birgə maarifləndirmə işlərinin reallaşdırılmasıdır.

Tədbirdə çıxış edən Azərbaycan Nar istehsalçıları və İxracatçıları Assosiasiyasının rəhbəri Fərhad Qaraşov bu əməkdaşlığın tərəflər arasında böyük əhəmiyyətə malik olacağını vurğulayıb.

O qeyd edib ki, sözügedən şirkətlə əlaqələrin qurulması nəticəsində fermerlər öz məhsullarını rahat şəkildə şəhər bazarlarına çıxara biləcəklər, onlar üçün bu sahədə lazımi şərait yaradılacaq.

Dövlət Aqrar Ticarət Şirkətinin direktoru Leyla Məmmədova rəhbərlik etdiyi şirkətlə bağlı məlumat verib. Bildirib ki, şirkət yeni yaradılmasına baxmayaraq, kənd təsərrüfatı sahəsində ixtisaslaşan bir sıra qurumlar və fermerlərlə əməkdaşlığa başlayıb.

Onun sözlərinə görə, bəzən fermerlərin öz məhsullarının satışı ilə bağlı problemlər olur: “Qarşıya çıxan problemləri fermerlərlə və eləcə də assosiasiya ilə birgə həll etməyə çalışacağıq”. Bundan başqa, assosiasiya ilə əməkdaşlıq memorandumunun imzalanması birgə maarifləndirici tədbirlərin təşkilində də müsbət rol oynayacaq.

L.Məmmədova bildirib ki, gələcəkdə xarici ölkələrdən mütəxəssislərin dəvət edilməsi və maarifləndirici tədbirlərin keçirilməsi nəzərdə tutulur. O, həmçinin vurğulayıb ki, rəhbərlik etdiyi şirkətdə fermerlərlə iş şöbəsi yaradılıb.

Nəzərə çatdırılıb ki, cari ilin oktyabrında "Kənddən şəhərə" layihəsi ilə bağlı paytaxtda mağaza və yarmarkaların açılışı planlaşdırılır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.