MƏDƏNİYYƏT


Argentinanın Buenos-Ayres şəhərində İmadəddin Nəsiminin 650 illiyi qeyd olunub

Bakı, 14 noyabr, AZƏRTAC

Argentinadakı İslam Mərkəzində dahi Azərbaycan şairi İmadəddin Nəsiminin 650 illik yubileyinə həsr olunmuş tədbir keçirilib.

Azərbaycanın Argentinadakı səfirliyindən AZƏRTAC- bildirilib ki, tədbirdə ilk olaraq çıxış edən İslam Mərkəzinin katibi Hüseyn Hallar dünya ədəbiyyatının və Şərq fəlsəfi fikrinin incilərindən olan İmadəddin Nəsimi irsinin Argentina ictimaiyyətinə təqdim edilməsinin təqdirəlayiq olduğunu bildirib və bu tədbirin Argentinada Nəsimi yaradıcılığının təbliğinə xidmət edəcəyinə ümidvar olduğunu söyləyib.

İslam Mərkəzinin Mədəniyyət məsələləri üzrə katibi professor Rikardo Elia çıxışında Nəsiminin həyat və yaradıcılığından bəhs edərək, şairin Yaxın və Orta Şərqdə geniş yayılmış dillər əzbəri olan divanlarının xalqlar arasında mədəni əlaqənin və fikir vəhdətinin yaranmasında mühüm rol oynadığını söyləyib. R.Elia Nəsimi yaradıcılığında hürufi görüşlərin xüsusi yer tutduğunu bildirərək, hürufi təriqəti haqqında məlumat verib və Nəsimi şeirlərində ən qabarıq müşahidə olunan cəhətlərin Quran surələri və insanın surəti arasındakı bənzərlik, kainat, Quran və insanın mahiyyət baxımından harmoniya təşkil etməsi istiqamətində axtarış cəhdləri və məntiqi qənaətləri olduğunu deyib.

Daha sonra çıxış edən səfir Rəşad Aslanov 2019-cu ildə İ.Nəsiminin anadan olmasının 650 illiyinin tamam olduğunu, Azərbaycanın ədəbi-mədəni fikir tarixinin bu əlamətdar hadisəsinin dövlət səviyyəsində qeyd edilməsi məqsədilə Azərbaycan Prezidentinin Sərəncamı ilə 2019-cu ilin ölkəmizdə “Nəsimi ili” kimi qeyd olunduğunu bildirib. R.Aslanov Nəsiminin dünya poeziyasının ən kamil nümunələri sırasında xüsusi yeri olan əsərlərində daim insan əzəmətini, insani məhəbbət və şəxsiyyətin azadlığını tərənnüm etdiyini deyib. Nəsiminin Azərbaycan şeir dilini yüksək bir zirvəyə qaldırdığını bildirən R.Aslanov onun Azərbaycan ədəbi dilinin inkişafında böyük xidmətləri olduğunu və əsərlərinin ədəbiyyatımızda ana dilimizdə yaranan fəlsəfi şeirin əsasını qoyduğunu vurğulayıb. O, Nəsiminin Azərbaycan klassik poeziyasının məzmun, ideya və yeni janrlarla zənginləşdirən, ona yeni nəfəs gətirən novator bir şair kimi tanındığını əlavə edib.

Tədbirin sonunda Azərbaycan əsilli Britaniya sənətçisi Sami Yusifin “Şur” muğamının çalarları ilə ərsəyə gətirdiyi “Nəsimi” kompozisiyası iştirakçılara təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.