İDMAN
“Arsenal”ın oyunçusu Angela Merkel ilə selfi şəklini satışa çıxarıb
Bakı, 6 dekabr, AZƏRTAC
Londonun “Arsenal” klubunun və Almaniya yığmasının oyunçusu Lukas Podolski xeyriyyə hərracı təşkil edərək, Almaniya kansleri Angela Merkel ilə çəkdirdiyi selfi şəkli satışa çıxarıb. Şəkil 2014-cü ilin dünya çempionatının finalında Almaniya yığmasının qələbəsindən sonra komandanın soyunub-geyinmə otağında çəkilib. Bu barədə hücumçu “Tvitter” səhifəsində yazıb.
AZƏRTAC xarici KİV-lərə istinadla yazır ki, Podolski Xeyriyyə Fondunun keçirdiyi aksiya çərçivəsində “Arsenal”ın baş məşqçisi, fransız Arsen Vengerin gödəkcəsi də satışa çıxarılıb.
Arzu edənlər Almaniya yığmasının qolkiperi Manuel Noyerin əlcəklərini, “Liverpul”un italyan futbolçusu Mario Balotellinin butslarını, 2014-cü ilin dünya çempionatının finalındakı qələbədən sonra Podolskinin və onun komanda yoldaşı Bastian Şvaynştaygerin çəkdirdikləri selfi şəkilləri və digər xatirə suvenirləri ala bilərlər.
Hərracdan əldə edilən bütün vəsait xeyriyyə məqsədlərinə xərclənəcək. L.Podolski 2012-ci ilin yayında “Köln” komandasından “Arsenal”ın heyətinə keçib. Futbolçu bu heyətlə birlikdə 2013/14-cü illər mövsümündə İngiltərə Kubokunu qazanıb. Hücumçu Almaniya yığmasının tərkibində keçirdiyi 120 matçda 47 qol vurub.