Neftçala, 28 may (AZƏRTAC). Azərbaycan Respublikasının Prezidenti İlham Əliyev mayın 28-də Neftçala rayonuna səfərini başa çatdırdıqdan sonra əsaslı şəkildə yenidən qurulmuş Tağıyev-Sahil avtomobil yolunun açılışında iştirak etmişdir.

Dövlətimizin başçısının göstərişi ilə Bakı və Bakıətrafı qəsəbələrin sosial-iqtisadi inkişafı üzrə layihələr ardıcıl olaraq həyata keçirilir. Prezident İlham Əliyevin Sərəncamı ilə təsdiq edilmiş “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nda yol infrastrukturunun əsaslı şəkildə yenidən qurulması, qəsəbələrarası və qəsəbədaxili yolların yüksək standartlara uyğun şəkildə təmiri və bərpası, eləcə də müasir tələblərə uyğun yeni yolların salınması davamlı şəkildə icra olunur. Ətraf qəsəbələrdə yolların ən müasir səviyyədə inşası, yol ötürücülərinin, körpü, tunel, yeraltı və yerüstü piyada keçidlərinin tikintisi nəqliyyatın gediş-gəlişini asanlaşdırmaqla əhalinin rahatlığının təmin olunmasına xidmət edir. Tağıyev-Sahil avtomobil yolunun bərpası layihəsi də Bakı və Bakıətrafı qəsəbələrin sosial-iqtisadi inkişafı baxımından olduqca əhəmiyyətlidir.

Nəqliyyat naziri Ziya Məmmədov Tağıyev-Sahil avtomobil yolunun bərpası layihəsi əsasında görülən işlər barədə Prezident İlham Əliyevə məlumat verdi. Qeyd edildi ki, ümumi uzunluğu 42 kilometrə yaxın olan yolun tikinti-quraşdırma işləri Azərbaycan Hökuməti ilə Beynəlxalq Yenidənqurma və İnkişaf Bankı arasında bağlanmış Saziş çərçivəsində maliyyələşdirilmişdir.

Prezident İlham Əliyevə yolun texniki göstəriciləri barədə məlumat verildi. Bildirildi ki, eni 15 metr olan yolun uzunluğu qovşaqlar da daxil olmaqla 48 kilometrdir. Avtomobil yolunun bərpasında yüksək keyfiyyətli tikinti materiallarından istifadə olunmuşdur. Layihəyə uyğun olaraq 11 yeni körpünün, 45 suötürücünün və 4 keçidin inşası başa çatdırılmışdır.

Dövlətimizin başçısı Tağıyev-Sahil avtomobil yolunun rəmzi açılışını bildirən lenti kəsdi.

Azərbaycan Prezidenti yenidən qurulmuş yolda avtomobili idarə etdi.

Sonra Prezident İlham Əliyev Bakı-Şamaxı-Yevlax avtomobil yolunun Sulutəpə-Biləcəri (9-10 kilometr) hissəsinin yenidən qurulması, Bakı-Quba-Rusiya Federasiyası ilə dövlət sərhədi avtomobil yolunun 6-9-cu kilometrlik hissəsinin genişləndirilməsi, yeni körpülərin inşası və mövcud körpülərin yenidən qurulması, Bakı Stend Atıcılığı İdman Kompleksi avtomobil yolunun və Bakı dairəvi yolla birləşmə layihələri ilə tanış olmaq üçün Biləcəri qəsəbəsinin ərazisinə gəldi.

Nəqliyyat naziri Ziya Məmmədov əvvəlcə Bakı-Şamaxı-Yevlax avtomobil yolunun Sulutəpə-Biləcəri hissəsinin yenidən qurulması layihəsi əsasında dövlətimizin başçısına məlumat verdi. Bildirildi ki, 1,5 kilometrlik yolun hərəkət hissəsi 8 zolaqlı olacaqdır. Asfalt-beton işlərinin aparılması üçün hazırlıq tədbirləri görülür.

Layihə həyata keçirildikdən sonra respublikanın şimal-qərb bölgəsindən Bakıya, eləcə də Lökbatan-Xocasən istiqamətinə hərəkət edən nəqliyyat vasitələrinin Bakı-Şamaxı-Yevlax və Bakı-Quba-Rusiya Federasiyası ilə dövlət sərhədi yollarına çıxışı asanlaşacaqdır.

Sonra Bakı-Quba-Rusiya Federasiyası ilə dövlət sərhədi avtomobil yolunun 6-9-cu kilometrlik hissəsinin genişləndirilməsi, yeni körpülərin inşası və mövcud körpülərin yenidən qurulması layihəsi əsasında görülən işlər barədə dövlətimizin başçısına məlumat verildi.

Bildirildi ki, layihədə iki yeni körpünün inşası, üç mövcud körpünün əsaslı şəkildə yenidən qurulması və yolun iki kilometrlik hissəsinin genişləndirilməsi nəzərdə tutulur. Bakı-Quba və əks istiqamətdə hərəkəti təmin edən yeni körpülərin inşası artıq başa çatdırılmışdır. Körpülər ən müasir standartlar səviyyəsində inşa olunmuşdur.

Prezident İlham Əliyevə mövcud körpülərin və yenidən qurulacaq yolun texniki göstəriciləri barədə məlumat verildi. Qeyd edildi ki, yolun tikinti sahəsində yerləşən bütün kommunikasiya xətlərinin, həmçinin yaşayış və qeyri-yaşayış tikililərinin köçürülməsi məsələsi də həll olunur.

Layihənin icrası başa çatdıqdan sonra respublikanın şimal, şimal-qərb bölgələrindən Bakı şəhərinə və əks istiqamətdə nəqliyyat vasitələrinin normal hərəkətinin təmin olunmasına şərait yaranacaqdır.

Daha sonra Bakı Stend Atıcılığı İdman Kompleksi avtomobil yolunun və Bakı dairəvi yolla birləşmə layihəsi barədə məlumat verildi. Bildirildi ki, 1,4 kilometr uzunluğu olan Bakı Stend Atıcılığı İdman Kompleksi avtomobil yolu və bir kilometrlik Bakı dairəvi yolla birləşmə yolu ən müasir standartlara uyğun şəkildə inşa ediləcəkdir. Bakı dairəvi yolla birləşmə yolunda eni 9, uzunluğu 230 metr olan yeni körpünün inşası da nəzərdə tutulur.

Layihələrlə yaxından tanış olan dövlətimizin başçısı müvafiq tapşırıqlarını verdi.