İQTİSADİYYAT
Əsəd Əhmədov küçəsində yenidənqurma işləri tam yekunlaşıb
Bakı, 11 iyul, AZƏRTAC
Əsəd Əhmədov küçəsində yenidənqurma işləri tam yekunlaşıb.
Azərbaycan Avtomobil Yolları Dövlət Agentliyindən AZƏRTAC-a bildirilib ki, agentliyin əsas öhdəliklərindən biri də hərəkət iştirakçılarının fasiləsiz və təhlükəsiz hərəkətini təmin etməkdir. Məhz sıxlığın aradan qaldırılması istiqamətində dövlət başçısının tövsiyə və tapşırıqlarına əsasən, dövlət agentliyi paytaxtın nəqliyyat sistemində mühüm əhəmiyyətə malik küçə və prospektlərin yenidən qurulması işlərini aparır.
Bu cür yollardan biri Yasamal rayonu, Yeni Yasamal yaşayış massivinin Əsəd Əhmədov küçəsidir ki, burda yenidənqurma işlər artıq tam olaraq yekunlaşdırılıb.
Küçə uzun müddət əsaslı təmir olunmadan istismar edildiyindən yolun hərəkət hissəsi deformasiyaya uğrayıb, qabarmalar, çökmələr və çatlar əmələ gəlib. Üstəlik küçənin ensiz olması və piyadalar üçün bəzi hissələrdə səkilərin olmaması, mövcudlarının isə dağılması bütün hərəkət iştirakçıları üçün problemlərə gətirib çıxarıb. Bu üzdən küçənin əsaslı şəkildə təmir olunması zərurəti yaranıb.
Uzunluğu 1,6 kilometr, eni əvvəllər 7-8 metr olan küçədə yenidənqurma işləri yüksək keyfiyyətlə aparılıb. Ümumilikdə layihə boyu aparılan işlər çərçivəsində küçənin eni ərazilərdən asılı olaraq 14-20 metrə qədər genişləndirilib. Bu məqsədlə yolboyu qazma-dolma işləri görülüb, zəruri olan yerlərdə yararsız qrunt çıxarılıb, əvəzinə yararlı material tökülərək kipləşdirilib.
Tikinti layihəsinə uyğun olaraq mövcud yeraltı kommunikasiya xətləri (su, qaz, rabitə, elektrik və sair) bərpa olunub, yeniləri çəkilib və ya yolun hərəkət hissəsindən kənarlaşdırılıb, 5 yerdə yolun altından 250 metr uzunluğunda ehtiyat borular atılıb. Bu işlərə paralel olaraq səth sularının yoldan normal kənarlaşdırılması üçün mövcud yağış-kanalizasiya sistemi bərpa olunub və zəruri olan yerlərdə yeni sistem qurularaq yağış barmaqlıqları qoyulub. Ümumilikdə sadalanan işlər çərçivəsində küçə boyu 21 ədəd yeni yağış barmaqlıqları quraşdırılıb, kommunikasiya xətlərinin dəmir-beton plitələri qaldırılaraq 110 ədəd yeni baxış qapaqları qoyulub.
Bundan başqa yolun relyefdən aşağı olan hissələrində torpaq yatağının qaldırılması üçün yararlı qrunt tökülərək yayılıb və kipləşdirilib. Yeni yol yatağı işlənən ərazilərdə optimal-qırmadaş və qum-çınqıl qarışıqlarından ibarət müxtəlif qalınlıqlarda yol əsasının tikintisi və bərpası işləri də aparılıb. Küçə boyu aparılan bu işlər gələcəkdə suyun yığılmasının qarşısını alacaq və asfalt-beton örtüyünün tez bir zamanda sıradan çıxmasını sığortalamış olacaq.
Küçənin yenidən qurulması zamanı bütün hərəkət iştirakçılarının normal, rahat və təhlükəsiz hərəkəti nəzərə alınıb. Belə ki, küçə boyu hər bir istiqamət üzrə ümumi uzunluğu 3,2 kilometr olan yeni piyada səkiləri inşa edilib. Piyada səkilərinin kənarlarına 6400 poqonmetr uzunluğunda yeni səki daşları düzülüb. Avtobusların ümumi hərəkətə maneə yaratmadan dayanacaqlara rahat giriş-çıxışını təmin etmək məqsədilə 4 yerdə 4 metr enində xüsusi “cib”li hissələr yaradılıb.
Texnoloji ardıcıllığa riayət olunmaqla daha sonra küçə boyu əlaqələndirici bitum səpilməklə 47 min 100 kvadratmetr sahədə yol örtüyünün alt qatının iri dənəli, üst qatının isə xırda dənəli asfalt–beton qarışığı ilə tikintisi aparılıb.
Asfaltlanma işləri bitən kimi küçə boyu avtonəqliyyat vasitələrinin normal hərəkətini təmin etmək məqsədilə 92 ədəd yol nişanları quraşdırılıb, yolun üfüqi nişanlanma xətləri çəkilərək, Azərbaycan Avtomobil Yolları Dövlət Agentliyinin rəhbərliyinin birbaşa nəzarəti altında sözügedən ünvanda hərəkətin normallaşmasına xidmət edən yeni və müasir yol infrastrukturunun yaradılması istiqamətində aparılan işlər yekunlaşdırılıb və Əsəd Əhmədov küçəsi tam olaraq vətəndaşların istifadəsinə verilib.