REGİONLAR


Asəf Ömərov: Əsas məqsədimiz heyvandarlıqda inkişafa intensiv üsullarla nail olmaqdır

Bakı, 13 avqust, AZƏRTAC

Ölkəmizdə heyvandarlıq məhsullarında artım dinamikasının saxlanılması və əhalinin bu məhsullara olan tələbatının daxili istehsal hesabına ödənilməsi məqsədi ilə yeni təsərrüfatların yaradılması, mövcud mal-qaranın cins tərkibinin yaxşılaşdırılması və digər istiqamətlərdə lazımi tədbirlər həyata keçirilir.

Bunu müsahibəsində Kənd Təsərrüfatı Nazirliyinin heyvandarlığın inkişafı şöbəsinin müdiri Asəf Ömərov deyib. AZƏRTAC müsahibəni təqdim edir.

- Asəf müəllim, son illər ölkəmizdə heyvandarlığın inkişafına xüsusi diqqət yetirilir, bu sahədə intensiv üsullar tətbiq olunur. Bu üsulun üstün cəhətləri nədən ibarətdir?

- Azərbaycanın əlverişli iqlim və münasib təbii-coğrafi şəraiti ölkəmizdə maldarlığın inkişafına müsbət təsir göstərib. Minilliklər boyu xalqımız qoyunçuluqla məşğul olub. Hazırda ölkəmizdə 2 milyon 672 min 990 baş iribuynuzlu, 8 milyon 454 min 308 baş xırdabuynuzlu heyvan var. Biz xaricdən əsasən “Aqrolizinq” vasitəsilə iri və xırdabuynuzlu heyvanları idxal edirik. Əsas məqsədimiz heyvandarlıqda inkişafa intensiv üsullarla nail olmaq, ət və süd məhsuldarlığını artırmaq, yerli cinsləri qorumaqla, bütövlükdə heyvanların cins tərkibini yaxşılaşdırmaqdır. İndi iş əsasən bu istiqamətdə aparılır. Ölkəyə həm yüksək məhsuldar heyvan cinsləri gətirilərək fermerlərə lizinq yolu ilə satılır, həm də süni mayalama işləri genişləndirilir.

- Yerli cinslərin qorunub saxlanmasının zəruri olduğunu qeyd edirsiniz...

- Qoyunçuluqda yerli cinslərimiz olan “Qarabağ”, “Qaradolaq”, “Şirvan”, “Qala” və “Balbas” qoyunları xalq seleksiyası vasitəsi ilə yaradılmış qoyunlardır. Fermer təsərrüfatlarımızda bu qoyunlar qorunub saxlanılır və bəslənilir. Xalq seleksiyasının yaratdığı bu qoyunların say artımı və qorunub saxlanması üçün Kənd Təsərrüfatı Nazirliyi tərəfindən daim dəstək verilir. Bu qoyunlar ölkəmizdə heyvandarlığın genefondu sayılır. İribuynuzlu heyvanlardan “Qonur Qafqaz”, “Qırmızı Qazax”, “Azərbaycan zebusu” və “Azərbaycan camışı” da ənənəvi olaraq həm nazirliyin tabeliyində olan təsərrüfatlarda, həm də özəl təsərrüfatlarda yetişdirilir. Zebu və camış xəstəliklərə davamlı, yemə, suya və insan qayğısına az tələbkar heyvanlardır. Bu heyvanların süd məhsuldarlığı az olsa da, südün yağlılığı qaramaldan üstündür. Biz bu sahənin də inkişafına xüsusi diqqət yetiririk. Ölkəmizdəki təsərrüfatlar əhalinin ət məhsullarına olan tələbatını nəzərə almaqla ən çox qoyunçuluğa önəm verirlər.

- Heyvandarlıqda hər zaman gündəmdə olan məsələlərdən biri iribuynuzlu və xırdabuynuzlu heyvanların xəstəliklərdən qorunmasıdır. Bu sahədə vəziyyət necədir?

- Hazırda Azərbaycanda epizootik durum sabitdir. Doğrudur, bizim region üçün bir sıra xəstəliklər xarakterikdir. Məsələn, dabaq, qara yara, bruselyoz və quduzluq. Kənd Təsərrüfatı Nazirliyi yanında Dövlət Baytarlıq Xidməti bu xəstəliklərə qarşı mütəmadi profilaktik tədbirlər aparır. Fermerlərimizə bildirmək istəyirəm ki, nazirlik tərəfindən görülən tədbirlər dövlət vəsaiti hesabına aparılır və bunun üçün fermerlərdən vəsait tələb olunmur. Ölkədə qeyd etdiyim xəstəliklərə qarşı aparılan baytarlıq tədbirləri pulsuzdur.

- Qarşıdan Qurban bayramı gəlir. Bu bayramda təbii olaraq heyvandarlıq məhsullarına tələbat artır. Vətəndaşlarımıza qurbanlıq heyvan seçimində hansı tövsiyələr verərdiniz?

- Biz nazirlik olaraq vətəndaşlara qurbanlıq heyvan seçərkən bir neçə amilə diqqət yetirməyi tövsiyə edirik. Əvvəla, qoyunun sağlam olmasına dəlalət edən bir çox göstəricilər var. Biz qurbanlıq qoyunun dərisinə, ayaqlarına, dırnaqlarına baxırıq ki, heç bir nöqsan olmasın. Əgər qoyun və ya qaramalın ağzından və ya gözlərindən selik axırsa, sallaq, büzüşmüş halda dayanıbsa, belə qoyunların alınmasını məqsədəuyğun hesab etmirik. Bundan əlavə, heyvanın qulağında birka, yəni qulağında baytarlıq tədbirlərinin aparıldığını göstərən üçbucaq şəkilli düzgün kəsilmiş nişan olmalıdır. Əgər heyvanın buynuzunda fiziki zədə varsa, bu, onun xəstə olmasına heç bir dəlalət etmir.

Qurbanlıq heyvan satıcılarından xahiş edirəm ki, ümumiyyətlə, damazlıq keyfiyyəti olan yerli və xaricdən gətirilmiş cins heyvanları qurbanlıq heyvan kimi bazara çıxarmasınlar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.