CƏMİYYƏT


Asiya İnkişaf Bankı ilə əmək və sosial müdafiə sahəsində gələcək əməkdaşlıq istiqamətləri müzakirə olunub

Bakı, 21 iyun, AZƏRTAC

Əmək və Əhalinin Sosial Müdafiəsi Nazirliyində Asiya İnkişaf Bankının (AİB) nümayəndə heyəti ilə görüş olub.

Əmək və əhalinin sosial müdafiəsi nazirinin müavini Anar Əliyev ölkəmizdə əmək bazarı, məşğulluq və sosial müdafiə sahəsində aparılan islahatları, aktiv məşğulluq proqramlarının əhəmiyyətli dərəcədə genişləndirildiyini diqqətə çatdırıb.

Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, o, son 4 ildə əmək müqavilələrinin sayının 30 faiz, əməkhaqqı fondunun 2,2 dəfə artdığını, məşğulluq orqanları vasitəsilə 340 min nəfərin işlə təmin edildiyini, 49 min ailə üçün özünüməşğulluq proqramı çərçivəsində kiçik təsərrüfat və müəssisələrin yaradıldığını bildirib.

Həmin dövrdə 4 milyon nəfəri əhatə edən 3 islahat paketinin həyata keçirildiyini, həmin paketlər üçün illik əlavə 6 milyard manat ayrıldığını, sosial ödənişlərdəki ciddi artımları qeyd edib.

Nazir müavini işsiz və işaxtaran şəxslərin peşə hazırlığı və əlavə təhsil kurslarının təşkili, eləcə də peşə reabilitasiyası işlərinin gücləndirilməsi, peşə təhsili mərkəzləri şəbəkəsinin genişləndirilməsi istiqamətində atılan addımları diqqətə çatdırıb. Əmək və məşğulluq sahəsində rəqəmsal xidmətlərin geniş tətbiqi, “Əmək və Məşğulluq” altsistemi barədə məlumat verib.

A.Əliyev sosial təminat sisteminin təkmilləşdirilməsi, pensiya, sosial yardım sahəsində aparılan islahatlarda AİB-lə əməkdaşlıq təcrübəsinin əhəmiyyətini vurğulayıb.

AİB-in Mərkəzi və Qərbi Asiya Departamentinin sosial bölmə müdiri Rie Hiraoka Azərbaycanda əmək, məşğulluq və sosial müdafiə sahələrində aparılan ardıcıl islahatlar prosesində əməkdaşlığın davam etdirilməsinin əhəmiyyətini qeyd edib.

Görüşdə əmək və sosial müdafiə, peşə hazırlığı sisteminin təkmilləşdirilməsi sahəsində nazirliklə AİB-in gələcək əməkdaşlıq istiqamətləri müzakirə olunub.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.