ELM VƏ TƏHSİL


Aşqarlar Kimyası İnstitutunda doktorant və dissertantların problemləri müzakirə olunub

Bakı, 5 may, AZƏRTAC

Akademik Əli Quliyev adına Aşqarlar Kimyası İnstitutunda təhsil müddəti bitmiş, lakin dissertasiyasını müdafiə etməmiş fəlsəfə və elmlər doktoru hazırlığı üzrə sabiq doktorant və dissertantlarla görüş keçirilib.

Bu barədə AZƏRTAC-a institutdan məlumat verilib. Görüşdə institutun direktoru akademik Vaqif Fərzəliyev vurğulayıb ki, elmi-tədqiqat müəssisələrinin əsas vəzifələrindən biri yüksəkixtisaslı kadr hazırlığından ibarətdir: “Çox təəssüf ki, bir çox hallarda fəlsəfə və elmlər doktoru hazırlığı üzrə doktorantura və dissertanturaya qəbul olunanlar təhsil müddətini başa vurduqdan sonra uzun müddət keçsə də müdafiə etmirlər. Bu isə institutun elmi dərəcə və elmi ada sahib yüksəkixtisaslı kadr təminatında problemlərin yaranmasına səbəb olur”.

Akademik Vaqif Fərzəliyev yaxın günlərdə Azərbaycan Respublikasının Prezidenti yanında Ali Attestasiya Komissiyası (AAK) tərəfindən institutların akkreditasiyasının aparılacağını və qiymətləndirmə meyarı kimi müəssisələrdə çalışan elmi işçilərin kəmiyyət və keyfiyyət göstəricilərinin əsas götürüləcəyini vurğulayıb. O, təhsil müddəti bitmiş doktorant və dissertantların dissertasiya işlərinin hazırlanması, elmi əsərlərin çapı və digər məsələlərlə bağlı üzləşdiyi problemlərin həllinə institut tərəfindən müəyyən kömək göstərilə biləcəyini diqqətə çatdırıb.

İnstitutun elmi işlər üzrə direktor müavini kimya elmləri doktoru, dosent Əfsun Sucayev AAK-ın qəbul olunan yeni əsasnaməsinə daxil edilən yeniliklər haqqında məlumat verib və doktorantların suallarını cavablandırıb. O, bu mövzuda doktorant və dissertantlar üçün maarifləndirmə seminarı keçiriləcəyini bildirib.

Sonra institutun təhsil müddəti əvvəlki illərdə başa çatmış, lakin dissertasiya müdafiə etməmiş doktorant və dissertantları yerinə yetirdikləri tədqiqat işlərinin icra vəziyyəti, çap olunmuş əsərlərinin sayı, çeşidi, dissertasiyanı müdafiə edə bilməmələrinin səbəbləri, qarşılaşdıqları problemlər haqqında geniş məlumat veriblər. Hər bir doktorant və dissertantın elmi rəhbərləri və məsləhətçilərinin də məsələ ilə bağlı izahatları dinlənilib. Dissertasiya işləri başa çatmaq üzrə olan doktorant və dissertantlara işi müdafiəyə təqdim etmələri üçün konkret vaxt qoyulub. Qərara alınıb ki, hər bir doktorant və dissertant dissertasiya mövzusu üzrə çap olunmuş elmi əsərlərinin sayı və tərkibi, dissertasiya işinin yerinə yetirilmə dərəcəsini əhatə edən yekun məlumatı hazırlayıb Təhsil şöbəsinə təqdim etsinlər. Eyni zamanda, dissertasiya işləri müdafiə ərəfəsində olan doktorant və dissertantların institutun seminarlarında dissertasiya işi üzrə məruzələri dinləniləcək.

Bildirilib ki, bu ilin sentyabr ayında təhsil müddəti başa çatmış, lakin müdafiə etməmiş doktorant və dissertantlarla növbəti görüş təşkil olunacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.