İQTİSADİYYAT


“Əsrin müqaviləsi”nin imzalanması Azərbaycanın inkişafının və dünya birliyi ilə tərəfdaşlığının həlledici amilidir

Bakı, 19 sentyabr, AZƏRTAC

"Əsrin müqaviləsi"nin imzalanmasının 25 illiyi münasibətilə sentyabrın 19-da Qaradağ Rayon İcra Hakimiyyətində tədbir keçirilib.

AZƏRTAC xəbər verir ki, tədbirdə çıxış edən Qaradağ Rayon İcra Hakimiyyəti başçısının müavini Nadir Muradov sentyabrın 20-də Xəzər dənizinin Azərbaycan sektorunda “Azəri”, “Çıraq” və “Günəşli” yataqlarının dərinlikdə yerləşən hissəsinin birgə işlənilməsi və hasilatın pay bölgüsü haqqında Azərbaycanla dünyanın tanınmış neft şirkətləri arasında müqavilənin imzalanmasının 25-ci ildönümünün tamam olduğunu diqqətə çatdıraraq bu tarixi hadisənin xalqımızın yaddaşında əbədi yaşayacağını qeyd edib. Bildirilib ki, 1994-cü il sentyabrın 20-si müstəqil Azərbaycan dövlətinin inkişafında tarixi bir gün oldu. “Əsrin müqaviləsi”nin ölkəmizin hərtərəfli inkişafı üçün əhəmiyyətindən danışan icra hakimiyyəti başçının müavini ümummilli lider Heydər Əliyevin Bakı-Tbilisi-Ceyhan boru kəməri layihəsinin gerçəkləşdirilməsində əvəzsiz xidmətlərini vurğulayıb.

Ə.Əmirov adına Neft və Qazçıxarma İdarəsinin (NQÇİ) rəisi Ramin Quliyev bildirib ki, “Əsrin müqaviləsi” imzalanandan sonrakı illərdə dünyanın 19 ölkəsini təmsil edən 41 neft şirkəti ilə daha 26 saziş imzalanıb. O deyib ki, Avrasiyanın yeni geoiqtisadi xəritəsini müəyyənləşdirən bu hadisə həm də yenicə müstəqillik əldə etmiş Azərbaycanın gələcək inkişafının və dünya birliyi ilə tərəfdaşlığının ən həlledici amilinə çevrilib.

Milli Məclisin deputatı, YAP Qaradağ rayon təşkilatının sədri Aydın Hüseynov vurğulayıb ki, 1993-cü ildə ümummilli lider Heydər Əliyevin hakimiyyətə qayıdışından sonra ölkədə vətəndaş qarşıdurmasına son qoyulub, ictimai-siyasi sabitlik təmin edilib. Eyni zamanda, qonşu ölkələrlə kəskin münasibətlər qismən yumşaldılıb, xarici sərmayələrə ciddi dövlət təminatı yaradılıb. Ulu Öndər uzaqgörən və qətiyyətli siyasət yürüdərək bəzi qonşu və beynəlxalq dairələrin Xəzər dənizinin statusu ilə bağlı mövcud olan problemi qabartmaq yolu ilə “Əsrin müqaviləsi”ni pozmaq planlarını puça çıxardı. O, müdrikcəsinə bütün narazı tərəfləri inandıraraq sübut etdi ki, Azərbaycan bu addımla heç bir ölkənin siyasi-iqtisadi maraqlarına toxunmur, əksinə, bölgədə hamı üçün bərabər əməkdaşlıq və tərəfdaşlıq şəraiti yaradır. Həmin dövrdə ARDNŞ-in vitse-prezidenti İlham Əliyevin xarici neft şirkətləri ilə aparılan danışıqlarda yüksək səriştəliliyi və bacarığı sayəsində bütün neft-qaz müqavilələrinin xalqımızın milli maraqlarına cavab verən şərtlər çərçivəsində hazırlanması təmin edildi.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.