REGİONLAR


Astara şəhər 1 nömrəli tam orta məktəbdə eyni sinfin bütün məzunları tələbə adını qazanıblar VİDEO

Astara, 5 sentyabr, İsmayıl Cəfərli, AZƏRTAC

Astara şəhər 1 nömrəli tam orta məktəb uğurlarını bu il də təkrarlayıb. Belə ki, bir sinfin şagirdlərinin hamısı - 17 məzun keçid balını toplayaraq arzuladıqları ali məktəblərə qəbul olublar.

AZƏRTAC xəbər verir ki, ali məktəbə hazırlaşan hər bir abituriyentin arzusu tələbə adını qazanmaqdır. Astarada şəhər Mirzə Ələkbər Sabir adına 1 nömrəli tam orta məktəbin 11b sinfini bitirən 17 məzununun hər biri builki buraxılış və qəbul imtahanlarında uğurlu nəticələr göstərərək tələbə adını qazanıblar.

Şagirdlərinin respublikanın nüfuzlu ali təhsil müəssisələrinə qəbul olması daha çox sinif rəhbəri Günel Hüseynovanı fərəhləndirib. Məzun olarkən sonuncu dəfə onların qarşısında çıxış edən sinif rəhbəri hər birinin potensialına inandığını, şagirdlərinin böyük uğura imza atacaqlarına əmin olduğunu bildirmişdi. Onların uğur qazanması həm də müəllim-şagird-valideyn əməkdaşlığının düzgün qurulmasının məntiqi nəticəsidir.

Sinfin 17 məzunu arasında ən yüksək nəticə göstərən abituriyentlərdən biri də Günel Dadaşovadır. O, 600-dən çox bal toplayıb: “IV ixtisas qrupu üzrə hazırlaşırdım. Qəbul və buraxılış imtahanları üzrə ümumilikdə 638 bal topladım. Seçimim həkimlik oldu, Azərbaycan Tibb Universitetinin Müalicə işi fakültəsinə daxil oldum. Bu yolda mənə daim dəstək olan müəllimlərimə, valideynlərimə və direktorumuz Xədicə müəllimə təşəkkürümü bildirirəm. Gələcəkdə savadlı ağxalatlı fədakar həkimlərimiz kimi xalqıma xidmət etmək istəyirəm”.

Tələbə adını qazananlar arasında Sərxan Səmədov da var. Deyir ki, ali məktəbə qəbul olmaq, tələbə adını qazanmaq hər bir şagirdin arzusudur. “Mən də arzuma çatdım. Bizim sinifdə bütün şagirdlərimiz ali məktəbə daxil oldu və buna görə də çox sevinirəm. Üzərimizdə əməyi keçən bütün müəllimlərə, valideynlərimizə təşəkkürümü bildirirəm. Məktəbimizin şagirdlərinə də gələcəkdə təhsil uğurları arzulayıram”, - deyə o bildirib.

Artıq bir neçə ildir məktəbdə yaradılan təmayül sinifləri öz yüksək nəticələrini verməkdədir. Astara şəhər 1 nörməli tam orta məktəbin direktoru Xədicə Əliyeva məzunların qazandığı bu uğurun müəllimlərin fədakar əməyinin nəticəsi olduğunu söyləyib: “Daha bir tədris ilinin sonuna gəldik. Keçən il olduğu kimi, bu il də uğurlarımız davam edir. Ötən il bir sinfin bütün şagirdləri ali məktəbə daxil olmuşdu, bu il də o uğuru təkrarladıq. İki şagirdimiz 600-dən, 10 şagird isə 500-dən çox bal toplayıb. Ümumilikdə, 45 şagirdimiz Azərbaycanın nüfuzlu ali məktəblərinə daxil olub. İnanıram ki, 2022-2023-cü tədris ilində də uğurlarımız davam edəcək və şagirdlərimiz daha yüksək nəticələr qazanacaqlar”.

Qeyd edək ki, Astara şəhər Mirzə Ələkbər Sabir adına 1 nömrəli tam orta məktəbdə 650 şagird təhsil alır. Bu şagirdlərin təlim-tərbiyəsi ilə 58 müəllim məşğul olur. Bu il məktəbi bitirən 48 məzundan 45-i ali məktəbə qəbul olub, 7-si isə fərqlənmə attestatına layiq görülüb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.