Astara, 3 dekabr, Bağır Əliyev, AZƏRTAC

Astara Rayon Mədəniyyət Mərkəzinin təşkilatçılığı ilə Sım Kənd Folklor Evində Azərbaycan aşıq sənətinin görkəmli nümayəndəsi, Əməkdar incəsənət xadimi Aşıq Şəmşirin anadan olmasının 125 illiyi qeyd edilib.

AZƏRTAC-ın bölgə müxbiri xəbər verir ki, tədbir iştirakçıları əvvəlcə Aşıq Şəmşirin yaradıcılığına həsr edilmiş fotosərgi ilə tanış olublar.

Tədbirdə çıxış edən Lənkəran Regional Mədəniyyət İdarəsinin baş məsləhətçisi Şadoğlan Bayramov Azərbaycan aşıq musiqisinin inkişaf tarixindən, Dədə Şəmşir məktəbinin Azərbaycan aşıq sənətinin inkişafına verdiyi töhfələrdən danışıb. Qeyd olunub ki, Aşıq Şəmşir Azərbaycanın çoxəsrlik şifahi sənət ənənələrini layiqincə davam etdirərək rəngarəng poetik-bədii nümunələrlə milli folklor xəzinəsini daha da zənginləşdirmiş görkəmli söz ustalarındandır. Qədim saz havalarının və dastanların mahir ifaçısı kimi tanınan el sənətkarı daim Vətənə bağlı olub, yaradıcılığı boyunca xalqın duyğu və düşüncələrini, yüksək mənəvi keyfiyyətləri və yurdun təbiət gözəlliklərini tərənnüm edib.

Diqqətə çatdırılıb ki, Azərbaycan Respublikası Prezidentinin Sərəncamına əsasən Aşıq Şəmşirin 125 illiyi ölkəmizin bütün regionlarında olduğu kimi, Astara rayonunda da geniş qeyd olunur.

Tədbirdə Sım kənd kitabxanasının müdiri Xaspolad Fətullayevin Aşıq Şəmşirin həyat və yaradıcılığı barədə məruzəsi dinlənilib.

Sım kənd tam orta məktəbin direktoru Nəbi Xalıqov, müəllimi Zahirəddin Məmmədov şifahi xalq yaradıcılığının əsas qolu olan aşıq sənətindən, el ağsaqqalı Dədə Şəmkirin yaradıcılığından, onun milli folklorumuzu inkişaf etdirərək daha da zənginləşdirməsindən danışıblar.

Pəlikəş bələdiyyəsinin sədri Xaqani Xalıqov Aşıq Şəmşirin özünün yaratdığı dastanları və xalq dastanlarının mahir ifaçısı kimi onun həyatında Xalq şairi Səməd Vurğunun rolunu yüksək dəyərləndirib.

Mərasimdə Sım kənd orta məktəbin şagirdləri Aşıq Şəmşirin şeirlərini ifa ediblər.

Azərbaycan Aşıqlar Birliyinin üzvü, Sım Kənd Folklor Evinin direktoru, aşıq Elxan Əliyevin, balabançı Əbdüləzim Nəcəfovun və müğənni Talıb Nəzərovun çıxışları tədbir iştirakçılarına xoş ovqat bəxş edib.